2 Mose

39 Amɛkɛ kpãa bluu kɛ kooloo hetsɔi afaseo* kɛ kpãa ni tsuɔ waa lɛ+ lo atadei kpakpai ni abaawo kɛsɔmɔ yɛ he krɔŋkrɔŋ lɛ. Amɛfee Aaron atadei krɔŋkrɔŋi lɛ,+ tamɔ bɔ ni Yehowa fã Mose lɛ pɛpɛɛpɛ.

2 Ekɛ shika tsuru kɛ kpãa bluu kɛ kooloo hetsɔi afaseo* kɛ kpãa ni tsuɔ waa kɛ klala ni alo lɛ jogbaŋŋ fee efɔd+ lɛ. 3 Amɛkɛ hamlɛ tswia shika tsuru tɛtrɛbii ni amɛfee fɛtɛfɛtɛ kwraa, ni amɛfolɔ lɛ tamɔ kpãi koni amɛkɛlo nii amɛwo efɔd lɛ ni akɛ kpãa bluu kɛ kooloo hetsɔi afaseo* kɛ kpãa ni tsuɔ waa kɛ klala kpakpa fee lɛ mli. 4 Amɛfee efɔd lɛ kɔɔji lɛ, ni amɛkɛtsa yɛ naabui enyɔ lɛ. 5 Ni mlifiinɔ ni alo ni yɔɔ efɔd lɛ he, ni akɛfiɔ efɔd lɛ mli koni emɔ mɔ jogbaŋŋ lɛ,+ nibii nɛɛ nɔŋŋ eko akɛfee, ni nomɛi ji, shika tsuru kɛ kpãa bluu kɛ kooloo hetsɔi afaseo* kɛ kpãa ni tsuɔ waa kɛ klala ni alo lɛ jogbaŋŋ, tamɔ bɔ ni Yehowa fã Mose lɛ pɛpɛɛpɛ.

6 Ni amɛkɛ onike tɛi tara shika tsuru nii amli, ni amɛkpɛ́ Israel bihii lɛ agbɛ́ii yɛ nɔ, tamɔ bɔ ni akpɛ́ɔ nii yɛ niianaasɔomɔnɔ nɔ lɛ.+ 7 Ekɛ enɛɛmɛi tara efɔd lɛ kɔɔji lɛ anɔ akɛ kaimɔ tɛi kɛhã Israelbii lɛ,+ tamɔ bɔ ni Yehowa fã Mose lɛ pɛpɛɛpɛ. 8 Kɛkɛ ni ekɛ niloo ŋaa fee tsitsinɔnii lɛ,+ tamɔ bɔ ni efee efɔd lɛ nɔŋŋ; ekɛ shika tsuru kɛ kpãa bluu kɛ kooloo hetsɔi afaseo* kɛ kpãa ni tsuɔ waa kɛ klala ni alo lɛ jogbaŋŋ fee.+ 9 Kɛ́ adɔ mli enyɔ lɛ, ekoji ejwɛ lɛ fɛɛ yeɔ egbɔ. Amɛfee tsitsinɔnii lɛ bɔ ni kɛ́ adɔ mli enyɔ lɛ, ekɛlɛ ji dɛ̃ ni agbɛ mli* kome ni elɛɛmɔ hu ji dɛ̃ ni agbɛ mli kome. 10 Amɛto tɛi amɛtara mli, amɛto lɛ liamɔi ejwɛ. Klɛŋklɛŋ liamɔ lɛ mli tɛi ji rubi kɛ topaz kɛ emerald. 11 Liamɔ ni ji enyɔ lɛ mli tɛi ji tɛkwais kɛ safiro kɛ yaspi. 12 Liamɔ ni ji etɛ lɛ mli tɛi ji leshʹem* kɛ agate kɛ amɛtisto. 13 Liamɔ ni ji ejwɛ lɛ mli tɛi ji krisolito kɛ onike kɛ yade. Akɛ tɛi lɛ tara shika tsuru nii amli. 14 Tɛi lɛ kɛ Israel bihii 12 lɛ agbɛ́ii lɛ nyiɛ, ni akpɛ́ gbɛ́ii lɛ tamɔ bɔ ni akpɛ́ɔ nii yɛ niianaasɔomɔnɔ nɔ lɛ, gbɛ́ii lɛ eko fɛɛ eko damɔ shi kɛhã wekui 12 lɛ ateŋ ekome.

15 Ni amɛkɛ shika tsuru krɔŋŋ fee tsein* ní agbɔ lɛ tamɔ kpãa yɛ tsitsinɔnii lɛ nɔ.+ 16 Ni amɛfee shika tsuru nii enyɔ ni akɛ tɛi lɛ baatara mli, kɛ shika tsuru gai enyɔ, ni amɛkɛ gai enyɔ lɛ wo tsitsinɔnii lɛ ŋwɛigbɛ koji enyɔ lɛ. 17 No sɛɛ lɛ, amɛkɛ shika tsuru kpãi enyɔ lɛ hɔlɔ gai enyɔ lɛ ni yɔɔ tsitsinɔnii lɛ ŋwɛigbɛ koji lɛ amli. 18 Ni amɛkɛ kpãi enyɔ lɛ naabui enyɔ lɛ hɔlɔ nibii enyɔ ni akɛ tɛi lɛ etara mli lɛ amli, ni amɛkɛmɔmɔ kɔɔji lɛ, yɛ efɔd lɛ hiɛgbɛ. 19 Enɛ sɛɛ lɛ, amɛkɛ shika tsuru fee gai enyɔ, ni amɛkɛwo tsitsinɔnii lɛ shishigbɛ naabui enyɔ lɛ ahe yɛ emligbɛ, ni ekwɛ efɔd lɛ hiɛ.+ 20 Ni amɛkɛ shika tsuru fee gai enyɔ krokomɛi hu amɛwo efɔd lɛ hiɛgbɛ, yɛ kɔɔji lɛ shishigbɛ, he ni efɔd lɛ mlifiinɔ ní alo lɛ tsaa efɔd lɛ yɛ lɛ yiteŋgbɛ. 21 Naagbee lɛ, amɛkɛ kpãa bluu fi tsitsinɔnii lɛ gai lɛ kɛyamɔ efɔd lɛ gai lɛ, koni emɔ tsitsinɔnii lɛ ekpɛtɛ efɔd lɛ nɔ, yɛ mlifiinɔ ni alo lɛ yiteŋgbɛ, tamɔ bɔ ni Yehowa fã Mose lɛ pɛpɛɛpɛ.

22 Ni ekɛ kpãa bluu sɔŋŋ fee efɔd lɛ shishi atade ní nine bɛ he lɛ, nilolɔ ko kɛ mamaloo tsɔne lo.+ 23 Ajie kuɛ awo atade ní nine bɛ he lɛ he, yɛ eteŋ, tamɔ gbɛ ni ajieɔ awoɔ dama he lɛ. Akɛ nɔ ko bã kuɛ ni ajie lɛ naa fɛɛ kɛkpe koni ekagbá. 24 No sɛɛ lɛ, amɛkɛ kpãa bluu kɛ kooloo hetsɔi afaseo* kɛ kpãa ni tsuɔ waa ni alo fɛɛ kɛtsa fee pomegranet yibii* yɛ atade ní nine bɛ he lɛ naamuu lɛ naa. 25 Ni amɛkɛ shika tsuru krɔŋŋ fee ŋmɛji amɛhɔlɔ pomegranet yibii lɛ ateŋ kɛbɔle atade ní nine bɛ he lɛ naamuu lɛ fɛɛ kɛkpe, amɛkɛhɔlɔ pomegranet yibii lɛ ateŋ; 26 kɛ́ amɛkɛ shika tsuru ŋmɛlɛ kome ba lɛ, kɛkɛ lɛ amɛkɛ pomegranet yibii lɛ ekome eba, amɛfee nakai sɔŋŋ kɛbɔle atade ní nine bɛ he, ní awoɔ kɛsɔmɔɔ lɛ naamuu lɛ fɛɛ kɛkpe, tamɔ bɔ ni Yehowa fã Mose lɛ pɛpɛɛpɛ.

27 Ni amɛkɛ klala kpakpa fee atadei kakadaji amɛhã Aaron kɛ ebihii lɛ,+ nilolɔ ko kɛ mamaloo tsɔne lo, 28 kɛ klala kpakpa yitsofiinɔ lɛ,+ kɛ Aaron bihii lɛ ayitsofiinii* fɛfɛji+ ni akɛ klala kpakpa fee lɛ, kɛ nikai+ ni akɛ klala ni alo lɛ jogbaŋŋ fee lɛ, 29 kɛ mliteŋfiinɔ ni akɛ klala ni alo lɛ jogbaŋŋ kɛ kpãa bluu kɛ kooloo hetsɔi afaseo* kɛ kpãa ni tsuɔ waa, ní alo fɛɛ kɛtsa fee lɛ, tamɔ bɔ ni Yehowa fã Mose lɛ pɛpɛɛpɛ.

30 Naagbee lɛ, amɛkɛ shika tsuru krɔŋŋ fee dade fɛtɛfɛtɛ ni kpɛlɛɔ, ni ji henɔjɔɔmɔ okadi krɔŋkrɔŋ* lɛ, ni amɛkpɛ́ yɛ nɔ tamɔ akpɛ́ɔ nii yɛ niianaasɔomɔnɔ nɔ lɛ, akɛ: “Krɔŋkrɔŋ ji Yehowa.”+ 31 Amɛkɛ kpãa bluu ko fi shika tsuru fɛtɛfɛtɛ lɛ koni amɛkɛkpɛtɛ yitsofiinɔ lɛ he, tamɔ bɔ ni Yehowa fã Mose lɛ pɛpɛɛpɛ.

32 No hewɔ lɛ, agbe sɔlemɔ buu lɛ, ni ji kpee buu lɛ he nitsumɔ lɛ fɛɛ naa, ni Israelbii lɛ fee nɔ fɛɛ nɔ ni Yehowa fã Mose lɛ.+ Nakai pɛpɛɛpɛ amɛfee.

33 Ni amɛkɛ sɔlemɔ buu+ lɛ bahã Mose, mama tsũ+ lɛ kɛ ehe nibii lɛ fɛɛ, ni ji: ekpoji*+ lɛ kɛ ehe mplaŋi+ lɛ kɛ emlibelemɔnii+ lɛ kɛ ekulashiŋi lɛ kɛ enɔdaamɔnii ni fɔji yɔɔ mli lɛ;+ 34 enɔhaanɔ ni akɛ gwantɛŋhii ahewoji ni awo lɛ tsofa tsuru fee lɛ,+ kɛ enɔhaanɔ ni akɛ nu mli gbei ahewoji fee lɛ, kɛ epateeshɛŋ+ ni akɛbaatsĩ nii hiɛ lɛ; 35 Odaseyeli adeka lɛ kɛ ehe tsei lɛ+ kɛ naanɔ lɛ;+ 36 okpɔlɔ lɛ kɛ ehe nibii lɛ fɛɛ+ kɛ hiɛmaa blodo lɛ; 37 shika tsuru krɔŋŋ kanetso lɛ kɛ ekanei lɛ+ kɛ kanei ni ato amɛ sɛrɛnɛɛ lɛ kɛ kanetso lɛ he nibii lɛ fɛɛ+ kɛ mu ni akɛbaawo kanei lɛ amli kɛsu lɛ;+ 38 shika tsuru tsofa-kɛ-ŋma afɔleshaa latɛ+ lɛ kɛ mufɔɔ mu+ lɛ kɛ tsofa-kɛ-ŋma lɛ+ kɛ sɔlemɔ buu lɛ shinaa lɛ naa pateeshɛŋ+ lɛ; 39 akɔɔble afɔleshaa latɛ lɛ+ kɛ ekɔɔble looshãa dade lɛ kɛ ehe tsei lɛ+ kɛ ehe nibii lɛ fɛɛ+ kɛ okpolu lɛ kɛ enɔmaanɔ lɛ;+ 40 kpo lɛ he mamai ni tsotsoro shi lɛ, kɛ kpo lɛ he akulashiŋi lɛ kɛ amɛnɔdaamɔnii ni fɔji yɔɔ mli lɛ,+ kɛ pateeshɛŋ+ ni akɛbaatsĩ kpo lɛ shinaa lɛ naa lɛ, kɛ kpo lɛ he kpãi lɛ kɛ edadei kɛ amɛnaa piɔpiɔi*+ lɛ kɛ nibii fɛɛ ni akɛbaasɔmɔ yɛ sɔlemɔ buu lɛ, ni ji kpee buu lɛ mli lɛ; 41 atadei ni alo lɛ jogbaŋŋ ni akɛbaasɔmɔ yɛ jamɔhe lɛ, kɛ osɔfo Aaron atadei krɔŋkrɔŋi lɛ,+ kɛ atadei ni ebihii lɛ baawo kɛsɔmɔ akɛ osɔfoi lɛ.

42 Israelbii lɛ tsu nitsumɔ lɛ fɛɛ yɛ nibii fɛɛ ni Yehowa fã Mose lɛ naa.+ 43 Be ni Mose kwɛ nitsumɔ ni amɛtsu lɛ fɛɛ lɛ, ena akɛ amɛfee lɛ tamɔ bɔ ni Yehowa fã akɛ afee lɛ lɛ pɛpɛɛpɛ; ni Mose jɔɔ amɛ.