Ester
4 Be ni Mordekai+ na le nibii ni afee lɛ fɛɛ lɛ,+ egbála etadei lɛ ni ebu kpekpe ni ekɛ lamulu shwie enɔ. Kɛkɛ ni eje kpo kɛtee maŋ lɛ teŋ, ni efó waa kɛ dɔlɛ. 2 Enyiɛ kɛyashɛ maŋtsɛ lɛ agbó lɛ naa, ejaakɛ esaaa akɛ mɔ ko buɔ kpekpe kɛboteɔ maŋtsɛ lɛ agbó lɛ mli. 3 Ni kpokpaa fɛɛ kpokpaa+ nɔ ni maŋtsɛ lɛ wiemɔ lɛ kɛ efamɔ lɛ yashɛ lɛ, Yudafoi ni yɔɔ jɛmɛ lɛ ye awerɛho waa, ni amɛhi ŋmaa,+ ni amɛfó ni amɛwo yara. Amɛteŋ mɛi babaoo kamɔ kpekpe kɛ lamulu mli yɛ shikpɔŋ.+ 4 Be ni oblayei ni ji Ester sɔɔlɔi lɛ kɛ hii ni ji Ester piafoi* lɛ ba ni amɛbabɔ lɛ amaniɛ lɛ, maŋnyɛ lɛ hao waa. Kɛkɛ ni etsu ni akɛ atadei yahã Mordekai koni ewo no moŋ fe kpekpe lɛ, shi Mordekai ekpɛlɛɛɛ. 5 Kɛkɛ ni Ester tsɛ maŋtsɛ lɛ piafoi* lɛ ateŋ mɔ kome ni atsɛɔ lɛ Hatak lɛ, mɔ ni maŋtsɛ lɛ ehala lɛ koni esɔmɔ Ester lɛ, ni Ester tsu lɛ koni eyabi Mordekai nɔ hewɔ ni efeɔ nɔ ni efeɔ lɛ, kɛ nɔ ni yaa nɔ.
6 No hewɔ lɛ, Hatak tee Mordekai ŋɔɔ yɛ maŋtsɛ lɛ agbó lɛ hiɛ, yɛ maŋ lɛ henaabuamɔhe lɛ. 7 Mordekai kɛɛ Hatak nɔ fɛɛ nɔ ni eba enɔ, kɛ shika+ abɔ ni Haman ewo shi akɛ ekɛbaahã ni akɛwo maŋtsɛ lɛ jwetritoohe lɛ koni akpãtã Yudafoi lɛ ahiɛ lɛ.+ 8 Ni ehã Hatak wolo ni aŋma famɔ ni akɛhã yɛ Shushan*+ akɛ akpãtã amɛhiɛ yɛ mli lɛ eko. Ekɛhã lɛ koni ekɛyatsɔɔ Ester, ni egbala mli etsɔɔ lɛ, koni ekɛɛ Ester+ ni eya maŋtsɛ lɛ hiɛ ni eyakpa lɛ fai ehã emaŋbii lɛ koni maŋtsɛ lɛ ana amɛ mɔbɔ.
9 Hatak ba ni ebakɛɛ Ester nɔ ni Mordekai kɛɛ lɛ. 10 Ester hu kɛ wiemɔi tsu Hatak koni eyakɛɛ Mordekai+ akɛ: 11 “Maŋtsɛ lɛ tsuji lɛ fɛɛ kɛ mɛi ni yɔɔ maŋtsɛ lɛ kpokpai lɛ fɛɛ anɔ lɛ le akɛ, kɛ́ nuu ko loo yoo ko bote maŋtsɛ lɛ mligbɛ kpo+ lɛ nɔ be ni atsɛko lɛ jɛmɛ lɛ, mla kome yɔɔ ni akɛbaatsu nii, no ji: Abaagbe lɛ; ja maŋtsɛ lɛ ekpã eshika tsuru maŋtsɛtso+ lɛ mli etsɔɔ lɛ dani eyi baaná wala. Shi mi lɛ, gbii 30 sɔŋŋ nɛ lɛ, atsɛko mi maŋtsɛ lɛ hiɛ.”
12 Be ni akɛɛ Mordekai nɔ ni Ester kɛɛ lɛ, 13 Mordekai hã Ester hetoo akɛ: “Kaasusu akɛ, maŋtsɛ lɛ shĩa lɛ ni oyɔɔ hewɔ lɛ, ohe baaje nɔ ni abaafee Yudafoi lɛ mli. 14 Ejaakɛ kɛ́ obu onaa yɛ be nɛɛ mli kwraa po lɛ, jiemɔ kɛ kpɔmɔ baajɛ he kroko aba Yudafoi lɛ aŋɔɔ,+ shi bo kɛ otsɛ shĩa lɛ hiɛ baakpãtã. Shi namɔ aaale akɛ be ni tamɔ nɛkɛ hewɔ awó bo maŋnyɛ lɛ?”+
15 Kɛkɛ ni Ester tsu ayakɛɛ Mordekai akɛ: 16 “Yaa, ni oyabua Yudafoi fɛɛ ni yɔɔ Shushan* lɛ anaa, ni nyɛhi ŋmaa+ nyɛhã mi. Nyɛkayea nɔ ko ni nyɛkanua nɔ ko nyɔɔŋ kɛ shwane gbii etɛ.+ Mi kɛ yei ni sɔmɔɔ mi lɛ hu baahi ŋmaa. Ni maya maŋtsɛ lɛ hiɛ, eyɛ mli akɛ mla eŋmɛɛɛ gbɛ nakai, ni kɛ́ gbe abaagbe mi po lɛ, agbe mi.” 17 No hewɔ lɛ, Mordekai tee ni eyafee nɔ fɛɛ nɔ ni Ester efã lɛ akɛ efee lɛ.