1 Kronika
15 Ni David tee nɔ emamɔ shĩai ehã ehe yɛ David Maŋ lɛ mli, ni esaa he ko ehã anɔkwa Nyɔŋmɔ lɛ Adeka lɛ ni efee mama tsũ yɛ jɛmɛ kɛhã Adeka lɛ.+ 2 Nakai beiaŋ ni David kɛɛ akɛ: “Mɔ ko mɔ ko akatere anɔkwa Nyɔŋmɔ lɛ Adeka lɛ, akɛ ja Levibii lɛ pɛ, ejaakɛ Yehowa ehala amɛ koni amɛtere Yehowa Adeka lɛ ni amɛsɔmɔ lɛ daa” lɛ.+ 3 Kɛkɛ ni David bua Israel fɛɛ naa yɛ Yerusalem koni amɛyawó Yehowa Adeka lɛ ni amɛkɛkwɔ kɛba he ni esaa ehã Adeka lɛ.+
4 David bua Aaron seshibii+ lɛ kɛ Levibii+ lɛ anaa: 5 Yɛ Kohatbii lɛ ateŋ lɛ, Uriel, ni ji nɔkwɛlɔ lɛ, kɛ enyɛmimɛi hii* 120; 6 yɛ Meraribii lɛ ateŋ lɛ, Asaia,+ ni ji nɔkwɛlɔ lɛ, kɛ enyɛmimɛi hii* 220; 7 yɛ Gershombii lɛ ateŋ lɛ, Yoel,+ ni ji nɔkwɛlɔ lɛ, kɛ enyɛmimɛi hii* 130; 8 yɛ Elizafan+ seshibii lɛ ateŋ lɛ, Shemaia, ni ji nɔkwɛlɔ lɛ, kɛ enyɛmimɛi hii* 200; 9 yɛ Hebron seshibii lɛ ateŋ lɛ, Eliel, ni ji nɔkwɛlɔ lɛ, kɛ enyɛmimɛi hii* 80; 10 yɛ Uziel+ seshibii lɛ ateŋ lɛ, Aminadab, ni ji nɔkwɛlɔ lɛ, kɛ enyɛmimɛi hii* 112. 11 Agbɛnɛ hu, David tsɛ osɔfo Zadok+ kɛ osɔfo Abiatar+ kɛ Levibii ni ji Uriel, kɛ Asaia, kɛ Yoel, kɛ Shemaia, kɛ Eliel, kɛ Aminadab, 12 ni ekɛɛ amɛ akɛ: “Nyɛji Levibii lɛ atsɛmɛi ashĩai lɛ onukpai. Nyɛ kɛ nyɛnyɛmimɛi hii lɛ, nyɛfea nyɛhe krɔŋkrɔŋ, ni nyɛyawóa Yehowa, Israel Nyɔŋmɔ lɛ Adeka lɛ, kɛkwɔa kɛbaa he ni misaa mihã Adeka lɛ. 13 Akɛni tsutsu lɛ, nyɛtereee Adeka lɛ hewɔ lɛ,+ Yehowa, wɔ-Nyɔŋmɔ lɛ, mlifu gba ewo wɔ,+ ejaakɛ wɔtaooo bɔ ni esa akɛ atere lɛ ahã.”+ 14 No hewɔ lɛ, osɔfoi lɛ kɛ Levibii lɛ fee amɛhe krɔŋkrɔŋ koni amɛyawó Yehowa, Israel Nyɔŋmɔ lɛ Adeka lɛ kɛkwɔ kɛba.
15 Kɛkɛ ni Levibii lɛ wó anɔkwa Nyɔŋmɔ lɛ Adeka lɛ kɛ ehe tsei lɛ ni amɛkɛma amɛkɔɔji anɔ,+ tamɔ bɔ ni Mose fã amɛ yɛ Yehowa wiemɔ lɛ naa lɛ pɛpɛɛpɛ. 16 Kɛkɛ ni David kɛɛ Levibii lɛ ateŋ nɔkwɛlɔi lɛ ni amɛhã amɛnyɛmimɛi hii ni láa lɛ alá kɛ miishɛɛ, ni amɛtswa lalatswaa nibii: kpãa saŋkui, kɛ saŋkui+ kɛ tsɛŋtsɛŋi.+
17 No hewɔ lɛ, Levibii lɛ tsɛ Heman,+ Yoel binuu lɛ, ni yɛ enyɛmimɛi lɛ ateŋ lɛ Asaf,+ Berekia binuu lɛ, ni yɛ amɛnyɛmimɛi Meraribii lɛ ateŋ lɛ, Etan,+ Kushaia binuu lɛ. 18 Agbɛnɛ hu, kɛ amɛnyɛmimɛi ni yɔɔ kuu ni ji enyɔ lɛ mli lɛ,+ Zakaria, kɛ Ben, kɛ Yaaziel, kɛ Shemiramot, kɛ Yehiel, kɛ Uni, kɛ Eliab, kɛ Benaia, kɛ Maaseia, kɛ Matitia, kɛ Elifelehu, kɛ Mikneia, kɛ agbonaakwɛlɔi Obed-edom kɛ Yeiel. 19 Mɛi ni láa lɛ ateŋ mɛi ni tswa akɔɔble tsɛŋtsɛŋi lɛ ji Heman,+ kɛ Asaf,+ kɛ Etan;+ 20 ni mɛi ni tswa kpãa saŋkui ni atsi afɔ̃ Alamot*+ lɛ ji Zakaria, kɛ Aziel, kɛ Shemiramot, kɛ Yehiel, kɛ Uni, kɛ Eliab, kɛ Maaseia, kɛ Benaia; 21 ni mɛi ni tswa saŋkui ni atsi afɔ̃ Sheminit*+ lɛ ji Matitia,+ kɛ Elifelehu, kɛ Mikneia, kɛ Obed-edom, kɛ Yeiel, kɛ Azazia, ni amɛ amɛsɔmɔ akɛ lalatsɔɔlɔi. 22 Mɔ ni kwɛ eteremɔ nɔ ji Kenania,+ Levibii lɛ anɔkwɛlɔ lɛ, ejaakɛ ele mli jogbaŋŋ, 23 ni Berekia kɛ Elkana ji he ni akɛ Adeka lɛ maa lɛ agbonaakwɛlɔi. 24 Osɔfo Shebania, kɛ osɔfo Yoshafat, kɛ osɔfo Netanel, kɛ osɔfo Amasai, kɛ osɔfo Zakaria, kɛ osɔfo Benaia, kɛ osɔfo Eliezer kpã tɛtɛrɛmantɛrɛi lɛ waa yɛ anɔkwa Nyɔŋmɔ lɛ Adeka lɛ hiɛ,+ ni Obed-edom kɛ Yehia hu sɔmɔ akɛ he ni Adeka lɛ maa lɛ agbonaakwɛlɔi.
25 Kɛkɛ ni David kɛ Israel onukpai lɛ kɛ mɛi ni kwɛɔ mɛi akpei anɔ lɛ tee koni amɛyawó Yehowa kpaŋmɔ adeka lɛ kɛjɛ* Obed-edom shĩa+ lɛ kɛba kɛ miishɛɛ.+ 26 Akɛni anɔkwa Nyɔŋmɔ lɛ ye ebua Levibii lɛ ni tere Yehowa kpaŋmɔ adeka lɛ hewɔ lɛ, amɛkɛ tsinahii kpawo kɛ gwantɛŋhii kpawo shã afɔle.+ 27 No mli lɛ, David wo klala kpakpa atade ko ni nine bɛ he, ni no nɔŋŋ eko Levibii lɛ ni tere Adeka lɛ, kɛ mɛi ni láa lɛ, kɛ Kenania, ni ji mɔ ni kwɛ eteremɔ nɔ kɛ lálɔi lɛ anɔ lɛ wo; ni David wo klala efɔd ko hu.+ 28 Israelbii lɛ fɛɛ kɛ Yehowa kpaŋmɔ adeka lɛ miikwɔ kɛmiiba ni amɛmiibɔ oshe,+ ni amɛmiikpã akolontoi, kɛ tɛtɛrɛmantɛrɛi,+ ni amɛmiitswa tsɛŋtsɛŋi, kɛ kpãa saŋkui, kɛ saŋkui waa.+
29 Shi be ni Yehowa kpaŋmɔ adeka lɛ bashɛ David Maŋ lɛ mli lɛ,+ Saul biyoo Mikal+ kwɛ shikpɔŋ kɛtsɔ samfɛlɛ lɛ mli ni ena Maŋtsɛ David ni eehuru ni eenya; ni enyaŋe David yɛ etsui mli.+