2 Maŋtsɛmɛi

24 Yɛ Yehoiakim gbii lɛ amli lɛ, Babilon maŋtsɛ Nebukadnezar+ ba koni ekɛ lɛ abawu, ni Yehoiakim batsɔ etsulɔ afii etɛ. Shi ete shi ewo lɛ ni etse atua. 2 Kɛkɛ ni Yehowa hã Kaldeabii+ lɛ ojotswalɔi ata lɛ, kɛ Siriabii lɛ ojotswalɔi ata lɛ, kɛ Moabbii lɛ ojotswalɔi ata lɛ, kɛ Amonbii lɛ ojotswalɔi ata lɛ batutua Yehoiakim. Ehã amɛbatutua Yuda shii abɔ koni amɛkpãtã maŋ lɛ hiɛ, tamɔ bɔ ni Yehowa etsɔ etsuji gbalɔi lɛ anɔ ewie lɛ.+ 3 Ekã shi faŋŋ akɛ, Yehowa famɔ naa ni enɛ ba Yuda nɔ, bɔ ni afee ni ejie Yuda yɛ ehiɛ+ yɛ eshai fɛɛ ni Manase fee lɛ hewɔ,+ 4 kɛ agbɛnɛ hu, yɛ mɛi ni efeko nɔ ko ni eshwie amɛlá shi+ lɛ hewɔ, ejaakɛ ehã mɛi ni efeko nɔ ko lɛ alá eyi Yerusalem tɔ, ni Yehowa sumɔɔɔ akɛ ekɛkeɔ.+

5 Shi Yehoiakim shihilɛ mli saji krokomɛi fɛɛ, nibii fɛɛ ni efee lɛ, aŋmala yɛ Yuda maŋtsɛmɛi ayinɔsaji awolo lɛ mli.+ 6 Kɛkɛ ni Yehoiakim gbo;*+ ni ebinuu Yehoiakin baye maŋtsɛ yɛ esɛɛ.

7 Ejipt maŋtsɛ lɛ hãaa esraafoi lɛ ashi Ejipt shikpɔŋ lɛ nɔ kɛyawu ta dɔŋŋ, ejaakɛ Babilon maŋtsɛ lɛ shɔ̃ Ejipt maŋtsɛ lɛ nibii fɛɛ yɛ edɛŋ,+ kɛjɛ Ejipt Nujɔɔ+ lɛ naa kɛyashi Yufrate Faa+ lɛ naa.

8 Be ni Yehoiakin+ batsɔ maŋtsɛ lɛ, no mli lɛ, eye afii 18, ni eye nɔ nyɔji etɛ yɛ Yerusalem.+ Emami gbɛ́i ji Nehushta, Elnatan ni jɛ Yerusalem lɛ biyoo lɛ. 9 Etee nɔ efee efɔŋ yɛ Yehowa hiɛ, tamɔ bɔ ni etsɛ fee lɛ pɛpɛɛpɛ. 10 Nakai be lɛ mli lɛ, Babilon maŋtsɛ Nebukadnezar tsuji lɛ kwɔ kɛba koni amɛkɛ Yerusalem abawu, ni amɛwo maŋ lɛ he ka.+ 11 Be ni Babilon maŋtsɛ Nebukadnezar tsuji lɛ ewo maŋ lɛ he ka lɛ, maŋtsɛ lɛ ba jɛmɛ.

12 Yuda maŋtsɛ Yehoiakin kɛ emami, kɛ etsuji lɛ, kɛ elumɛi lɛ, kɛ emaŋtsɛ shĩa onukpai+ lɛ je kpo ni amɛkɛ amɛhe yahã Babilon maŋtsɛ lɛ;+ ni Babilon maŋtsɛ lɛ ŋɔ lɛ nom yɛ Babilon maŋtsɛ lɛ nɔyeli afi ni ji kpaanyɔ lɛ nɔ.+ 13 Kɛkɛ ni eyaloo jwetrii fɛɛ ni yɔɔ Yehowa shĩa lɛ kɛ jwetrii fɛɛ ni yɔɔ maŋtsɛ shĩa lɛ.+ Efolɔ shika tsuru nibii ni Israel maŋtsɛ Solomon fee ewo Yehowa sɔlemɔ shĩa lɛ mli dukuduku.+ Enɛ ba lɛ tamɔ bɔ ni Yehowa egba lɛ pɛpɛɛpɛ. 14 Ni eŋɔ Yerusalem fɛɛ nom, lumɛi lɛ fɛɛ,+ kɛ tawulɔi kãkãlɔi lɛ fɛɛ, kɛ ŋaalɔ fɛɛ ŋaalɔ, kɛ sɔ̃lɔ* fɛɛ sɔ̃lɔ+—eŋɔ mɛi 10,000 nom. Eshiii mɔ ko mɔ ko akɛ ja mɛi ni yeɔ ohia futaa yɛ shikpɔŋ lɛ nɔ lɛ pɛ.+ 15 No hewɔ lɛ, eŋɔ Yehoiakin+ nom kɛtee Babilon;+ eŋɔ maŋtsɛ lɛ mami, kɛ maŋtsɛ lɛ ŋamɛi lɛ, kɛ emaŋtsɛ shĩa onukpai lɛ, kɛ shikpɔŋ lɛ nɔ hiɛnaanɔbii lɛ hu nom; eloo amɛ kɛjɛ Yerusalem kɛtee Babilon. 16 Babilon maŋtsɛ lɛ ŋɔ tawulɔi kãkãlɔi lɛ fɛɛ, mɛi 7,000, kɛ ŋaalɔi kɛ sɔ̃lɔi* 1,000 hu nom, amɛ fɛɛ lɛ, hii kãkãlɔi ni atsɔse amɛ kɛhã ta. 17 Babilon maŋtsɛ lɛ wó Matania, Yehoiakin tsɛkwɛ̃+ lɛ maŋtsɛ yɛ enajiaŋ, ni etsake egbɛ́i ni ewo lɛ Zedekia.+

18 Be ni Zedekia batsɔ maŋtsɛ lɛ, no mli lɛ, eye afii 21, ni eye nɔ afii 11 yɛ Yerusalem. Emami gbɛ́i ji Hamutal,+ Yeremia ni jɛ Libna lɛ biyoo lɛ. 19 Etee nɔ efee efɔŋ yɛ Yehowa hiɛ, tamɔ bɔ ni Yehoiakim fee lɛ pɛpɛɛpɛ.+ 20 Yehowa mlifu lɛ hewɔ enɛɛmɛi fɛɛ ba lɛ nakai yɛ Yerusalem kɛ Yuda nɔ, kɛyashi ejie amɛ kɛje ehiɛ.+ Ni Zedekia tse Babilon maŋtsɛ lɛ hiɛ atua.+