1 Mose
23 Ni Sara hi shi afii 127; afii ni Sara ye yɛ ewala shihilɛ mli nɛ.+ 2 Ni Sara gbo yɛ Kiriat-arba,+ ni ji Hebron,+ yɛ Kanaan+ shikpɔŋ lɛ nɔ, ni Abraham ye Sara he awerɛho ni efó lɛ. 3 Kɛkɛ ni Abraham te shi yɛ eŋa ni egbo lɛ he, ni ekɛɛ Hetbii+ lɛ akɛ: 4 “Gbɔ ji mi, ni mibahi nyɛteŋ.+ Nyɛhãa mi he ko yɛ nyɛteŋ ní mikɛfee fuuhe, koni mawó migbonyo lɛ mayafu.” 5 Kɛkɛ ni Hetbii lɛ hã Abraham hetoo akɛ: 6 “Bo wɔ toi koo, minuŋtsɔ. Nyɔŋmɔ lumɔ* ji bo yɛ wɔteŋ.+ Obaanyɛ ofu ogbonyo lɛ yɛ wɔfuuhei lɛ ateŋ nɔ ni hi fe fɛɛ lɛ mli. Wɔteŋ mɔ ko mɔ ko etsiŋ bo gbɛ akɛ okayafu ogbonyo lɛ yɛ efuuhe.”
7 No hewɔ lɛ, Abraham te shi ni ekoto shikpɔŋ lɛ nɔ bii lɛ, ni ji Hetbii+ lɛ, 8 ni ekɛɛ amɛ akɛ: “Kɛ́ nyɛkpɛlɛ* akɛ miwó migbonyo lɛ ni miyafu lɛ, no lɛ nyɛboa mi toi, ni nyɛkpaa Efron, Zohar binuu lɛ fai nyɛhãa mi 9 koni ehɔ̃ɔ tɛkplo ni yɔɔ Makpela, ni ji enɔ lɛ ehã mi; eyɛ eshikpɔŋ lɛ naagbeegbɛ. Nyɛhãa ehɔ̃a ehãa mi yɛ nyɛhiɛ, yɛ jwiɛtɛi abɔ ni ejara ji lɛ naa,+ koni maná he ko mikɛfee fuuhe.”+
10 No mli lɛ, Efron ta Hetbii lɛ ateŋ. No hewɔ lɛ, Efron, Hitnyo lɛ, hã Abraham hetoo yɛ Hetbii lɛ atoiiaŋ, kɛ mɛi fɛɛ ní boteɔ maŋ lɛ agbó+ lɛ mli lɛ ahiɛ ekɛɛ: 11 “Dabi, minuŋtsɔ! Bo mi toi. Mikɛ shikpɔŋ lɛ kɛ tɛkplo ni yɔɔ nɔ lɛ fɛɛ miihã bo. Mikɛmiihã bo yɛ mimaŋbii lɛ ahiɛ. Fuu ogbonyo lɛ yɛ jɛmɛ.” 12 Kɛkɛ ni Abraham koto shikpɔŋ lɛ nɔ bii lɛ 13 ni ekɛ Efron wie yɛ mɛi lɛ atoiiaŋ ekɛɛ: “Ofainɛ, bo mi toi! Mahã bo jwiɛtɛi abɔ ni ji shikpɔŋ lɛ jara lɛ fɛɛ. Hemɔ yɛ midɛŋ, koni mafu migbonyo lɛ yɛ jɛmɛ.”
14 Ni Efron hã Abraham hetoo akɛ: 15 “Minuŋtsɔ, bo mi toi. Shikpɔŋ nɛɛ jara ji jwiɛtɛi shekeli* 400, shi yɛ mi kɛ bo teŋ lɛ, no jeee nɔ ko kwraa. No hewɔ lɛ, fuu ogbonyo lɛ yɛ jɛmɛ.” 16 Abraham bo Efron toi, ni Abraham ŋmɛ jwiɛtɛi falɛ ni Efron tsĩ tã yɛ Hetbii lɛ atoiiaŋ lɛ ehã lɛ, jwiɛtɛi shekeli* 400 yɛ nsɛni tɛ ni jarayelɔi lɛ kɛtsuɔ nii lɛ naa.+ 17 No hewɔ lɛ, Efron shikpɔŋ lɛ ni yɔɔ Makpela, yɛ Mamre hiɛ lɛ—shikpɔŋ lɛ kɛ tɛkplo ni yɔɔ nɔ lɛ kɛ tsei fɛɛ ni yɔɔ shikpɔŋ lɛ husui lɛ amli lɛ—batsɔ 18 Abraham nɔ ní ehé yɛ Hetbii lɛ ahiɛ, kɛ mɛi fɛɛ ni boteɔ maŋ lɛ agbó lɛ mli lɛ ahiɛ. 19 No sɛɛ lɛ, Abraham fu eŋa Sara yɛ tɛkplo ni yɔɔ Makpela shikpɔŋ lɛ nɔ lɛ mli, yɛ Mamre, ni ji Hebron hiɛ, yɛ Kanaan shikpɔŋ lɛ nɔ. 20 No hewɔ lɛ, Hetbii lɛ tu shikpɔŋ lɛ kɛ tɛkplo ni yɔɔ nɔ lɛ amɛwo Abraham dɛŋ koni ekɛfee fuuhe.+