2 Mose
25 Ni Yehowa kɛɛ Mose akɛ: 2 “Kɛɛmɔ Israelbii lɛ akɛ amɛtsu onia amɛhã mi; nyɛhea onia lɛ yɛ mɔ fɛɛ mɔ ni tsui tsirɛɔ lɛ ni etsu lɛ dɛŋ nyɛhãa mi.+ 3 Onia ni nyɛbaahe yɛ amɛdɛŋ lɛ nɛ: shika tsuru+ kɛ jwiɛtɛi+ kɛ akɔɔble+ 4 kɛ kpãa bluu kɛ kooloo hetsɔi afaseo* kɛ kpãa ni tsuɔ waa kɛ klala kpakpa kɛ abotia hetsɔi 5 kɛ gwantɛŋhii ahewoji ni awo lɛ tsofa tsuru kɛ nu mli gbei ahewoji kɛ akasia tso+ 6 kɛ mu ni akɛbaawo kanei amli+ kɛ balsam mu ni akɛbaafee mufɔɔ mu+ kɛ tsofa-kɛ-ŋma+ lɛ 7 kɛ onike tɛi kɛ tɛi krokomɛi ni akɛbaatara efɔd+ lɛ kɛ tsitsinɔnii+ lɛ amli. 8 Amɛma jamɔhe amɛhã mi, ni mahi amɛteŋ.*+ 9 Feemɔ sɔlemɔ buu* lɛ kɛ emli nibii lɛ fɛɛ, feemɔ lɛ tamɔ nɔkwɛmɔnɔ* ni mikɛtsɔɔ bo lɛ pɛpɛɛpɛ.+
10 “Amɛkɛ akasia tso akpɛ adeka, ekɛlɛ afee ninetalɔi* enyɔ kɛ fã, elɛɛmɔ afee ninetalɔ kome kɛ fã, ni ekwɔlɛ hu afee ninetalɔ kome kɛ fã.+ 11 Ni okɛ shika tsuru krɔŋŋ aha he.+ Okɛha emli kɛ ehe fɛɛ, ni okɛ shika tsuru aye sãma kɛbã naa fɛɛ kɛkpe.+ 12 Ni okɛ shika tsuru afee gai ejwɛ owo he, ní okɛkpɛtɛ enaji ejwɛ lɛ ayiteŋgbɛ, gai enyɔ ahi afã kome, enyɔ hu ahi afã kroko lɛ. 13 Ni ogbɔ akasia tsei, ní okɛ shika tsuru aha he.+ 14 Okɛ tsei lɛ ahɔlɔ gai ni yɔɔ Adeka lɛ koŋ biɛ kɛ biɛ lɛ amli, koni akɛwó Adeka lɛ. 15 Tsei lɛ ahɔlɔ Adeka lɛ he gai lɛ amli; akajie yɛ mli.+ 16 Okɛ Odaseyelinɔ ni mikɛbaahã bo lɛ awo Adeka lɛ mli.+
17 “Okɛ shika tsuru krɔŋŋ afee adeka lɛ naanɔ, ekɛlɛ afee ninetalɔi enyɔ kɛ fã, ni elɛɛmɔ hu afee ninetalɔ kome kɛ fã.+ 18 Okɛ shika tsuru afee kerubim enyɔ; okɛ hamlɛ atswia shika tsuru lɛ kɛfee kerubim lɛ yɛ adeka lɛ naanɔ lɛ nɔ, yɛ naagbeehei enyɔ lɛ.+ 19 Feemɔ kerubim lɛ yɛ naagbeehei enyɔ lɛ, kerub kome yɛ adeka lɛ naanɔ lɛ naagbeehe kome, ni ekome hu yɛ enaagbeehe kroko lɛ. 20 Kerubim lɛ agbɛ amɛfiji enyɔ lɛ amli kɛya ŋwɛigbɛ, ní amɛfiji lɛ aha naanɔ lɛ nɔ,+ ni kerub kome hiɛ akwɛ ekroko lɛ hiɛ. Kerubim lɛ amamɔ amɛhiɛiaŋ shi kɛkwɛ naanɔ lɛ nɔ. 21 Okɛ naanɔ+ lɛ abu Adeka lɛ naa, ní okɛ Odaseyelinɔ ni mikɛbaahã bo lɛ awo Adeka lɛ mli. 22 Majie mihe kpo matsɔɔ bo yɛ jɛmɛ, ni majɛ naanɔ lɛ nɔ mikɛ bo awie.+ Majɛ kerubim enyɔ lɛ ni yɔɔ Odaseyeli adeka lɛ nɔ lɛ ateŋ mahã ole nibii fɛɛ ni mafã bo ni okɛɛ Israelbii lɛ.
23 “Agbɛnɛ hu, okɛ akasia tso akpɛ okpɔlɔ,+ ekɛlɛ afee ninetalɔi enyɔ, elɛɛmɔ afee ninetalɔ kome, ni ekwɔlɛ afee ninetalɔ kome kɛ fã.+ 24 Okɛ shika tsuru krɔŋŋ aha he, ní okɛ shika tsuru aye sãma kɛbã naa kɛkpe. 25 Gbɔɔ tso fɛtɛfɛtɛ ni lɛɛmɔ ji dɛ̃ lɛɛmɔ* ní okɛbã okpɔlɔ lɛ naa, ní okɛ shika tsuru aye sãma kɛbã tso fɛtɛfɛtɛ lɛ naa kɛkpe. 26 Okɛ shika tsuru afee gai ejwɛ ohã okpɔlɔ lɛ, ní okɛ gai lɛ awo ekoji ejwɛ lɛ, he ni naji ejwɛ lɛ yɔɔ lɛ. 27 Gai lɛ abɛŋkɛ tso fɛtɛfɛtɛ ni akɛbã okpɔlɔ lɛ naa lɛ, koni akɛ tsei ni akɛbaawó okpɔlɔ lɛ ahɔlɔ mli. 28 Okɛ akasia tso agbɔ tsei lɛ, ní okɛ shika tsuru aha he, koni akɛwó okpɔlɔ lɛ.
29 “Agbɛnɛ hu, feemɔ ekãi kɛ ekɔɔpoi kɛ ekɔɔpoi wuji kɛ etsɛnsii lɛ, nibii ni akɛbaafɔse dãa afɔlei lɛ. Okɛ shika tsuru krɔŋŋ afee.+ 30 Ni okɛ hiɛmaa blodo lɛ ama okpɔlɔ lɛ nɔ yɛ mihiɛ be fɛɛ be.+
31 “Okɛ shika tsuru krɔŋŋ afee kanetso.+ Okɛ hamlɛ atswia shika tsuru lɛ kɛfee kanetso lɛ. Eshishi lɛ kɛ eteŋtso lɛ kɛ eniji lɛ kɛ ekɔɔpoi lɛ kɛ ekpɔbii lɛ kɛ efɔfɔii lɛ fɛɛ afee kanetso muu kome.+ 32 Ni kanetso lɛ agbála niji ekpaa, niji etɛ ahi afã kome, ni niji etɛ hu ahi afã kroko lɛ. 33 Kɔɔpoi etɛ ni afee lɛ tamɔ almond fɔfɔii ahi niji ni yɔɔ afã kome lɛ eko fɛɛ eko he, ni kpɔbii kɛ fɔfɔii hu ahi amɛhe bɔ ni kɛ́ kpɔ ba lɛ, kɛkɛ lɛ fɔfɔi eba; ni kɔɔpoi etɛ ni afee lɛ tamɔ almond fɔfɔii ahi niji ni yɔɔ afã kroko lɛ hu eko fɛɛ eko he, ni kpɔbii kɛ fɔfɔii hu ahi amɛhe bɔ ni kɛ́ kpɔ ba lɛ, kɛkɛ lɛ fɔfɔi eba. Nɛkɛ ji bɔ ni afee yɛ niji ekpaa lɛ ni kanetso lɛ teŋtso lɛ baagbála lɛ ahe. 34 Kɔɔpoi ejwɛ ni afee lɛ tamɔ almond fɔfɔii ahi kanetso lɛ teŋtso lɛ he, ni kpɔbii kɛ fɔfɔii hu ahi he bɔ ni kɛ́ kpɔ ba lɛ, kɛkɛ lɛ fɔfɔi eba. 35 Kpɔ ahi klɛŋklɛŋ niji enyɔ ni teŋtso lɛ egbála yɛ biɛ kɛ biɛ lɛ ashishi, ni kpɔ ahi niji enyɔ ni nyiɛ sɛɛ lɛ ashishi, ni kpɔ ahi niji enyɔ kroko ni nyiɛ sɛɛ lɛ hu ashishi, nakai afee lɛ yɛ niji ekpaa lɛ ni kanetso lɛ teŋtso lɛ egbála lɛ fɛɛ ashishi. 36 Akɛ hamlɛ atswia shika tsuru krɔŋŋ kɛfee kpɔbii lɛ kɛ niji lɛ kɛ kanetso muu lɛ fɛɛ, koni etsɔ nɔ muu kome.+ 37 Feemɔ kanei kpawo omamɔ nɔ, koni kɛ́ asu kanei lɛ, amɛkpɛ ehiɛgbɛ.+ 38 Akɛ shika tsuru krɔŋŋ afee enibɛɛnii* kɛ elajeenii lɛ.+ 39 Akɛ shika tsuru krɔŋŋ talɛnta* kome afee kanetso lɛ kɛ ehe nibii nɛɛ fɛɛ. 40 Kwɛmɔ ni ofee nibii nɛɛ tamɔ amɛhe nɔkwɛmɔnɔ* ni akɛtsɔɔ bo yɛ gɔŋ lɛ nɔ lɛ pɛpɛɛpɛ.+