Yoshua
7 Shi Israelbii lɛ eyayeee anɔkwa yɛ nibii ni atu ahã hiɛkpatamɔ lɛ gbɛfaŋ, ejaakɛ Akan,+ ni ji Zera binuu Zabdi binuu Karmi binuu ni jɛ Yuda weku lɛ mli lɛ kɔlɔ nibii ni atu ahã hiɛkpatamɔ lɛ eko.+ Kɛkɛ ni Yehowa mli wo la ewo Israelbii lɛ.+
2 Ni Yoshua tsu hii kɛjɛ Yeriko kɛtee Ai+ ní bɛŋkɛ Bet-aven, ní agbɛnɛ hu eyɔɔ Betel+ bokãgbɛ lɛ, ni ekɛɛ amɛ akɛ: “Nyɛkwɔa kɛyaa ni nyɛyakpáa shikpɔŋ lɛ shi.” No hewɔ lɛ, hii lɛ kwɔ kɛtee ni amɛyakpá Ai shi. 3 Be ni amɛku amɛsɛɛ kɛba Yoshua ŋɔɔ lɛ, amɛbakɛɛ lɛ akɛ: “Ehe ehiaaa ni maŋbii lɛ fɛɛ aya. Hii aaafee akpei enyɔ loo etɛ kɛkɛ baanyɛ aye Ai nɔ kunim. Kaahao maŋ lɛ fɛɛ akɛ amɛya, ejaakɛ jɛmɛ bii lɛ ayi faaa.”
4 No hewɔ lɛ, hii aaafee 3,000 kwɔ kɛtee jɛmɛ, shi amɛjo Ai hii lɛ anaa foi.+ 5 Ni Ai hii lɛ tswia hii 36 nii, ni amɛnyiɛ amɛsɛɛ kɛjɛ maŋ lɛ agbó lɛ naa aahu kɛtee Shebarim* tɔ̃ɔ, ni amɛtee nɔ amɛtswia amɛ nii yɛ gɔŋ lɛ shikpelekemɔhe lɛ. No hewɔ lɛ, maŋ lɛ tsui fã ni ekãa ni yɔɔ amɛmli lɛ laaje.*
6 Kɛkɛ ni Yoshua gbála ehe atadei, ni ekɛ ehiɛ bu shikpɔŋ yɛ Yehowa Adeka lɛ hiɛ kɛyashi gbɛkɛ, lɛ kɛ Israel onukpai lɛ, ni amɛtee nɔ amɛloo mulu amɛwo amɛyiteŋ. 7 Yoshua kɛɛ: “Ao, Nuŋtsɔ Ofe Yehowa, mɛni hewɔ okɛ maŋ nɛɛ fo Yordan lɛ aahu kɛba biɛ ní okɛ wɔ abawo Amorbii lɛ adɛŋ, ní amɛkpãtã wɔhiɛ lɛ? Wɔle nɛkɛ kulɛ, wɔkpɛlɛ ní wɔhi Yordan lɛ sɛɛ* kɛkɛ! 8 Ofainɛ, Yehowa, amrɔ nɛɛ ni Israel ejo foi yɛ ehenyɛlɔi lɛ ahiɛ* nɛɛ, mɛni makɛɛ? 9 Kɛ́ Kanaanbii lɛ kɛ shikpɔŋ lɛ nɔ bii lɛ fɛɛ nu he lɛ, amɛbaaba amɛbabɔle wɔ, ni amɛbaagbe wɔgbɛ́i po kɛje shikpɔŋ lɛ nɔ, ni mɛni obaafee yɛ ogbɛ́i kpeteŋkpele lɛ he?”+
10 Yehowa hã Yoshua hetoo akɛ: “Tee shi! Mɛni hewɔ okã shi ni okɛ ohiɛ ebu shikpɔŋ lɛ? 11 Israel efee esha. Amɛku mikpaŋmɔ+ lɛ ni mifã amɛ akɛ amɛye nɔ lɛ mli. Amɛkɔlɔ nibii ni atu ahã hiɛkpatamɔ lɛ eko,+ amɛju+ ni amɛkɛyato amɛ diɛŋtsɛ amɛnibii amli nigii.+ 12 No hewɔ lɛ, Israelbii lɛ nyɛŋ amɛhenyɛlɔi lɛ ahiɛ amɛdamɔ. Amɛbaatsɔ amɛsɛɛ, ni amɛbaajo amɛhenyɛlɔi lɛ anaa foi, ejaakɛ amɛtsɔmɔ nii ni atu ahã hiɛkpatamɔ. Mikɛ nyɛ ehiŋ shi dɔŋŋ, ja nyɛkpãtã nii ni atu ahã hiɛkpatamɔ lɛ hiɛ kɛje nyɛteŋ.+ 13 Tee shi ni ofee maŋ lɛ krɔŋkrɔŋ!+ Kɛɛmɔ amɛ akɛ, ‘Nyɛfea nyɛhe krɔŋkrɔŋ nyɛtoa wɔ́, ejaakɛ nɔ ni Yehowa, Israel Nyɔŋmɔ lɛ, kɛɛ nɛ: “Israel, nii ni atu ahã hiɛkpatamɔ yɛ nyɛteŋ. Onyɛŋ ohenyɛlɔi lɛ ahiɛ odamɔ, ja nyɛjie nii ni atu ahã hiɛkpatamɔ lɛ kɛje nyɛteŋ. 14 Wɔ́ leebi lɛ, nyɛbadamɔa shi yɛ nyɛwekui lɛ anaa, ni weku ni Yehowa baahala+ lɛ mli tsɛmɛi ashĩa fɛɛ tsɛmɛi ashĩa baabadamɔ hiɛ, ni tsɛmɛi ashĩa ni Yehowa baahala lɛ mli shĩa fɛɛ shĩa baabadamɔ hiɛ, ni shĩa ni Yehowa baahala lɛ mli nuu fɛɛ nuu baabadamɔ hiɛ. 15 Ni mɔ ni abaamɔ lɛ akɛ lɛ edɛŋ nii ni atu ahã hiɛkpatamɔ lɛ yɔɔ lɛ, akɛ la baashã lɛ+ kɛ nɔ fɛɛ nɔ ni eyɔɔ, ejaakɛ eku Yehowa kpaŋmɔ lɛ mli,+ ni efee hiɛgbejianii hu yɛ Israel.”’”
16 No hewɔ lɛ, Yoshua te shi leebi maŋkpa, ni ehã Israelbii lɛ badamɔ shi yɛ amɛwekui lɛ anaa, ni ahala Yuda weku lɛ. 17 Ehã Yuda weku lɛ mli tsɛmɛi ashĩai lɛ fɛɛ badamɔ hiɛ, ni ahala Zerabii+ lɛ atsɛmɛi ashĩa lɛ, no sɛɛ lɛ, ehã Zerabii lɛ atsɛmɛi ashĩa lɛ mli nuu fɛɛ nuu badamɔ hiɛ, ni ahala Zabdi. 18 Naagbee lɛ, ehã Zabdi shĩabii lɛ ateŋ nuu fɛɛ nuu badamɔ hiɛ, ni ahala Akan, ni ji Zera binuu Zabdi binuu Karmi binuu lɛ ni jɛ Yuda weku lɛ mli lɛ.+ 19 Ni Yoshua kɛɛ Akan akɛ: “Mibinuu, ofainɛ, wó Yehowa, Israel Nyɔŋmɔ lɛ hiɛ nyam, ní ojaje ohe esha lɛ otsɔɔ lɛ. Ofainɛ, kɛɛmɔ mi nɔ ni ofee lɛ. Okɛkatee mi.”
20 Akan hã Yoshua hetoo akɛ: “Anɔkwa, miji mɔ ni fee esha mishi Yehowa, Israel Nyɔŋmɔ lɛ, ni nɔ ni mifee nɛ. 21 Be ni mina Shinear+ atade fɛfɛo ko kɛ jwiɛtɛi shekeli 200 kɛ shika tsuru ni tsiimɔ ji shekeli 50 yɛ ta mli nii lɛ ateŋ lɛ, mihiɛ kɔ̃ nɔ, no hewɔ lɛ, mikɔlɔ. Amrɔ nɛɛ, akɛ fɛɛ etee yɛ shikpɔŋ yɛ mimama tsũ lɛ mli, ni shika lɛ yɛ shishi.”
22 Amrɔ nɔŋŋ lɛ, Yoshua tsu mɛi, ni amɛwó foi kɛtee mama tsũ lɛ mli, ni naa, akɛ atade lɛ etee yɛ emama tsũ lɛ mli, ni shika lɛ yɛ shishi. 23 No hewɔ lɛ, amɛjie nibii lɛ kɛje mama tsũ lɛ mli, ni amɛkɛba Yoshua kɛ Israelbii lɛ fɛɛ aŋɔɔ, ni amɛkɛbashwie Yehowa hiɛ. 24 Kɛkɛ ni Yoshua kɛ Israel muu lɛ fɛɛ ni fata ehe lɛ ŋɔ Akan,+ ni ji Zera binuu lɛ kɛ jwiɛtɛi lɛ kɛ atade fɛfɛo lɛ kɛ shika tsuru lɛ+ kɛ agbɛnɛ hu, ebihii kɛ ebiyei kɛ etsinai kɛ etejii kɛ etoi kɛ emama tsũ, kɛ nɔ fɛɛ nɔ ni eyɔɔ lɛ, ni amɛkɛ amɛ tee Akor Jɔɔ+ lɛ mli. 25 Ni Yoshua kɛɛ: “Mɛni hewɔ okɛ amanehulu* eba wɔnɔ nɛkɛ?+ Ŋmɛnɛ gbi nɛɛ, Yehowa kɛ amanehulu baaba onɔ.” Kɛkɛ ni Israel muu lɛ fɛɛ tswia lɛ tɛi,+ ni no sɛɛ lɛ, amɛkɛ la shã amɛ.+ Nɛkɛ gbɛ nɔ amɛtsɔ amɛtswia amɛ fɛɛ tɛi. 26 Ni amɛto tɛi babaoo amɛshwie enɔ, ni eyɛ jɛmɛ kɛbashi ŋmɛnɛ. Kɛkɛ ni Yehowa mlifu ni naa wa lɛ naa ba shi.+ No hewɔ ni atsɛɔ jɛmɛ akɛ Akor* Jɔɔ kɛbashi ŋmɛnɛ lɛ.