2 Kronika

19 Kɛkɛ ni Yuda maŋtsɛ Yehoshafat ku esɛɛ kɛtee lɛ diɛŋtsɛ eshĩa* yɛ Yerusalem shweshweeshwe.*+ 2 Kɛkɛ ni ninalɔ Hanani+ binuu Yehu,+ tee ekɛ Maŋtsɛ Yehoshafat yakpe ni ebi lɛ akɛ: “Ani eja gbɛ akɛ oye obua mɛi fɔji,+ ni osumɔ mɛi ni nyɛɔ Yehowa lɛ lo?+ Enɛ hewɔ lɛ, Yehowa mli efu bo. 3 Shi ana nibii kpakpai komɛi yɛ ohe,+ ejaakɛ ojie wɔŋ tsei* lɛ kɛje shikpɔŋ lɛ nɔ, ni okpɛ mli yɛ otsui mli* akɛ obaatao anɔkwa Nyɔŋmɔ lɛ sɛɛ gbɛ.”+

4 Yehoshafat tee nɔ ehi shi yɛ Yerusalem, ni eyakpa maŋbii lɛ ateŋ ekoŋŋ kɛjɛ Beer-sheba kɛyashi Efraim gɔji lɛ anɔ,+ koni ehã amɛku amɛsɛɛ kɛba Yehowa, amɛtsɛmɛi a-Nyɔŋmɔ lɛ ŋɔɔ.+ 5 Ehala mɛi koni amɛsɔmɔ akɛ kojolɔi yɛ shikpɔŋ lɛ nɔ yɛ Yuda maji ni atswa gbogboi awo amɛhe lɛ fɛɛ amli, yɛ maŋ fɛɛ maŋ mli.+ 6 Ni ekɛɛ kojolɔi lɛ akɛ: “Nyɛkwɛa jogbaŋŋ yɛ bɔ ni nyɛtsuɔ nii nyɛhãa lɛ he, ejaakɛ jeee gbɔmɔ nyɛkojoɔ nyɛhãa, shi Yehowa, ni kɛ́ nyɛmiikojo lɛ, efata nyɛhe.+ 7 Nyɛshea Yehowa gbeyei.+ Ni nyɛkwɛa bɔ ni nyɛtsuɔ nii nyɛhãa lɛ jogbaŋŋ, ejaakɛ Yehowa, wɔ-Nyɔŋmɔ lɛ, tsɔɔɔ sane hiɛ ebuuu shi,+ ni ekwɛɛɛ hiɛiaŋ,+ ni eheee nyɔɔŋnii hu.”+

8 Yɛ Yerusalem hu lɛ, Yehoshafat hã Levibii lɛ ekomɛi, kɛ osɔfoi lɛ ekomɛi, kɛ Israel tsɛmɛi ashĩai onukpai lɛ ekomɛi sɔmɔ akɛ kojolɔi amɛhã Yehowa, koni amɛye mɛi ni yɔɔ Yerusalem lɛ asaji.+ 9 Ni efã amɛ akɛ: “Nɔ ni esa akɛ nyɛjɛ Yehowa gbeyeishemɔ kɛ anɔkwayeli kɛ nyɛtsui fɛɛ* mli nyɛfee lɛ nɛ: 10 Be fɛɛ be ni nyɛnyɛmimɛi ni yɔɔ maji krokomɛi lɛ amli lɛ kɛ sane ko ni kɔɔ lashishwiemɔ,+ loo mla ko, loo kitã ko, loo taomɔ nii, loo yiŋkpɛi* ahe lɛ baaba nyɛhiɛ lɛ, nyɛbɔa amɛ kɔkɔ koni amɛkaye fɔ yɛ Yehowa hiɛ; kɛjeee nakai lɛ Nyɔŋmɔ mli baafu nyɛ kɛ nyɛnyɛmimɛi lɛ fɛɛ. Enɛ ji nɔ ni esa akɛ nyɛfee koni nyɛkaye fɔ. 11 Osɔfonukpa Amaria ji mɔ ni baakwɛ nyɛnɔ yɛ sane fɛɛ sane ni kɔɔ Yehowa he lɛ he.+ Ni Ishmael binuu Zebadia ni ji Yuda weku lɛ hiɛnyiɛlɔ lɛ ji mɔ ni baakwɛ nyɛnɔ yɛ sane fɛɛ sane ni kɔɔ maŋtsɛ lɛ he lɛ he. Ni Levibii lɛ baasɔmɔ akɛ nyɛyelikɛbualɔi. Nyɛfea ekãa ni nyɛtsua nitsumɔ lɛ, ni Yehowa baajɔɔ mɛi ni baatsu nitsumɔ kpakpa lɛ.”*+