Akɛmaje Hebribii Lɛ
7 Ejaakɛ nɛkɛ Melkizedek nɛɛ, ni ji Salem maŋtsɛ, Nyɔŋmɔ Ni Nɔ Kwɔ Fe Fɛɛ lɛ osɔfo lɛ, kɛ Abraham kpe be ni Abraham eyagbe maŋtsɛmɛi lɛ ni eeku esɛɛ kɛmiiba lɛ, ni ejɔɔ lɛ,+ 2 ni Abraham hã lɛ nii lɛ fɛɛ* mlijai nyɔŋma mli ekome. Klɛŋklɛŋ lɛ, atsɔɔ egbɛ́i lɛ shishi akɛ “Jalɛ Maŋtsɛ,” ni eji Salem maŋtsɛ hu, ni no shishi ji, “Toiŋjɔlɛ Maŋtsɛ.” 3 Akɛni ebɛ papa, ni ebɛ mami, ni ebɛ wekutɔkpaa, ni ebɛ gbii ashishijee, ni ebɛ wala naagbee hu, shi moŋ afee lɛ tamɔ Nyɔŋmɔ Bi lɛ hewɔ lɛ, eji osɔfo be fɛɛ be.*+
4 Nyɛkwɛa bɔ ni nuu nɛɛ je agbo hã, mɔ ni Abraham, ni ji weku yitso lɛ* kɛ ta mli nii kpakpai fe fɛɛ lɛ amlijai nyɔŋma mli ekome hã lɛ lɛ.+ 5 Lɛɛlɛŋ, yɛ Mla lɛ naa lɛ, Levibii+ lɛ ateŋ mɛi ni náa osɔfoyeli gbɛnaa lɛ yɛ kitã ko akɛ amɛhe mlijai nyɔŋma mli ekome yɛ maŋbii lɛ,+ ni ji, amɛnyɛmimɛi lɛ adɛŋ, eyɛ mli akɛ mɛi nɛɛ ji Abraham shwiei moŋ.* 6 Shi nuu nɛɛ ni jɛɛɛ amɛwekutɔkpaa lɛ mli lɛ he mlijaa nyɔŋma mli ekome kɛjɛ Abraham dɛŋ ni ejɔɔ mɔ ni yɔɔ shiwoi lɛ.+ 7 Agbɛnɛ, ŋwanejee ko bɛ he akɛ, mɔ ni da lɛ, lɛ ejɔɔ mɔ ni edaaa lɛ. 8 Ni yɛ shihilɛ kome mli lɛ, gbɔmɛi ni gboiɔ lɛ ji mɛi ni heɔ mlijai nyɔŋma mli ekome lɛ, shi yɛ shihilɛ kroko lɛ mli lɛ, mɔ ko ni aye ehe odase akɛ ehiɛ kã lɛ ji mɔ ni he.+ 9 Ni abaanyɛ akɛɛ akɛ, Levi, mɔ ni heɔ mlijai nyɔŋma mli ekome lɛ po tsɔ Abraham nɔ ekɛ mlijai nyɔŋma mli ekome hã, 10 ejaakɛ be ni Melkizedek kɛ eblematsɛ lɛ kpe lɛ, no mli lɛ anáko afɔ lɛ akɛ eblematsɛ lɛ seshi.*+
11 Agbɛnɛ, kɛ́ anyɛɔ atsɔɔ Levi osɔfoyeli lɛ nɔ ashɛɔ emuuyeli he lɛ+ (ejaakɛ eji Mla ni akɛhã maŋbii lɛ mli nibii lɛ eko), no lɛ mɛɛ hiamɔ ehia lolo akɛ, osɔfo kroko ate shi tamɔ Melkizedek nɔ lɛ,+ shi jeee tamɔ Aaron nɔ lɛ? 12 Akɛni aatsake osɔfoyeli lɛ hewɔ lɛ, ehe ehia ni atsake Mla lɛ hu.+ 13 Ejaakɛ mɔ ni awie nibii nɛɛ yɛ ehe lɛ, ejɛ weku kroko mli, weku ni mɔ ko ejɛko mli ebasɔmɔko yɛ afɔleshaa latɛ lɛ he pɛŋ.+ 14 Ejaakɛ eyɛ faŋŋ akɛ wɔ-Nuŋtsɔ lɛ jɛ Yuda mli,+ shi Mose ewieee nɔ ko kwraa akɛ osɔfoi baajɛ nakai weku lɛ mli.
15 Ni nɔ ni hãa enɛ feɔ faŋŋ fe tsutsu lɛ ji be ni osɔfo kroko+ te shi ni tamɔ Melkizedek lɛ,+ 16 mɔ ni jeee mla naa taomɔ nii ni damɔ heloonaa wekutɔkpaa lɛ nɔ ebatsɔ osɔfo yɛ, shi moŋ yɛ wala ni anyɛŋ akpãtã hiɛ lɛ hewalɛ naa ebatsɔ osɔfo lɛ.+ 17 Ejaakɛ aye ehe odase akɛ: “Osɔfo ji bo kɛmiiya naanɔ tamɔ Melkizedek nɔ lɛ.”+
18 No hewɔ lɛ, akɛni kitã ni tsɔ hiɛ lɛ bɛ hewalɛ ni enyɛɛɛ etsu nii hewɔ lɛ, afo mli.+ 19 Ejaakɛ Mla lɛ hãaa nɔ ko nɔ ko aye emuu,+ shi hiɛnɔkamɔ ni hi fe no+ ni akɛba ni wɔtsɔɔ nɔ wɔbɛŋkɛɔ Nyɔŋmɔ+ lɛ fee nakai. 20 Agbɛnɛ hu, gbii abɔ ni akã kitã kɛfee enɛ lɛ, 21 (ejaakɛ, anɔkwa, mɛi yɛ ni awó amɛ osɔfoi ni akãaa kitã ko, shi mɔ nɛ lɛ atsɔ kitã ni mɔ ni kɛɛ yɛ ehe akɛ: “Yehowa* ekã kitã, ni etsakeŋ ejwɛŋmɔ,* ‘Osɔfo ji bo kɛmiiya naanɔ’” lɛ kã lɛ nɔ awó lɛ osɔfo),+ 22 belɛ, Yesu ebatsɔ mɔ ni maa kpaŋmɔ ko ni fe no nɔ mi.*+ 23 Agbɛnɛ hu, akɛni gbele hãaa osɔfoi lɛ aya nɔ asɔmɔ akɛ osɔfoi hewɔ lɛ, mɛi babaoo baye amɛsɛɛ akɛ osɔfoi,+ 24 shi lɛ lɛ, akɛni ehiɔ shi kɛyaa naanɔ hewɔ lɛ,+ mɔ ko ebayeŋ esɛɛ akɛ osɔfo. 25 No hewɔ lɛ, enyɛɔ ehereɔ mɛi ni tsɔɔ enɔ amɛbɛŋkɛɔ Nyɔŋmɔ lɛ ayiwala kwraa, ejaakɛ ehiɛ kã daa koni ekpa fai ehã amɛ.+
26 Ejaakɛ osɔfonukpa ni tamɔ nɛkɛ lɛ sa wɔ, eji anɔkwafo, mɔ ni efɔŋ ko bɛ ehe, ni muji ko bɛ ehe,+ ni etse ehe kɛje eshafeelɔi ahe, ni awó enɔ ahã ekwɔ fe ŋwɛi.+ 27 Akɛ mɔ ni tamɔɔɔ nakai osɔfonukpai lɛ, ehe ehiaaa ni ekɛ afɔlei ahã daa gbi,+ klɛŋklɛŋ lɛ, yɛ lɛ diɛŋtsɛ ehe eshai hewɔ, kɛ no sɛɛ lɛ, yɛ mɛi lɛ anɔ lɛ hewɔ,+ ejaakɛ efee enɛ shi kome nyɔŋlo be ni ekɛ lɛ diɛŋtsɛ ehe hã lɛ.+ 28 Ejaakɛ Mla lɛ wóɔ gbɔmɛi ni yɔɔ gbɔjɔmɔi akɛ osɔfonukpai,+ shi wiemɔ ni akɛkã kitã+ yɛ Mla lɛ sɛɛ lɛ wó Bi ni ahã eye emuu+ kɛmiiya naanɔ lɛ akɛ osɔfo.