3 Mose

8 Yehowa tee nɔ ekɛ Mose wie ekɛɛ: 2 “Ŋɔɔ Aaron kɛ ebihii ni fata ehe lɛ,+ atadei+ lɛ, mufɔɔ mu+ lɛ, esha afɔle tsinanuu lɛ, gwantɛŋhii enyɔ lɛ, kɛ kɛntɛŋ ni blodoi ni ashikishaŋ-sha* bɛ mli yɔɔ mli+ lɛ, 3 ni ohã Israel maŋ muu lɛ fɛɛ ababua amɛhe naa yɛ kpee buu lɛ shinaa lɛ naa.”

4 Ni Mose fee bɔ ni Yehowa fã lɛ lɛ pɛpɛɛpɛ, ni maŋbii lɛ babua amɛhe naa yɛ kpee buu lɛ shinaa lɛ naa. 5 Kɛkɛ ni Mose kɛɛ maŋbii lɛ akɛ: “Nɔ ni Yehowa efã wɔ akɛ wɔfee nɛ.” 6 No hewɔ lɛ, Mose hã Aaron kɛ ebihii lɛ ba, ni ekɛ nu fɔflɔ amɛhe.+ 7 No sɛɛ lɛ, ekɛ atade kakadaŋŋ+ lɛ wo Aaron, ekɛ mliteŋfiinɔ+ lɛ fĩ emli, ni ekɛ atade ni nine bɛ he+ lɛ wo lɛ, ni ekɛ efɔd+ lɛ wo lɛ ni ekɛ efɔd lɛ mlifiinɔ ni alo+ lɛ fĩ mli, ekɛfĩ emli ni emɔ lɛ jogbaŋŋ. 8 Enɛ sɛɛ lɛ, ekɛ tsitsinɔnii+ lɛ wo lɛ, ni ekɛ Yurim kɛ Tumim+ lɛ wo tsitsinɔnii lɛ mli. 9 Ni ekɛ yitsofiinɔ+ lɛ fĩ eyitso, ni ekɛ shika tsuru ni atswia lɛ fɛtɛfɛtɛ ni kpɛlɛɔ, ni ji henɔjɔɔmɔ okadi krɔŋkrɔŋ*+ lɛ ta yitsofiinɔ lɛ hiɛ, tamɔ bɔ ni Yehowa fã Mose lɛ pɛpɛɛpɛ.

10 Agbɛnɛ, Mose wó mufɔɔ mu lɛ, ni ekɛfɔ sɔlemɔ buu lɛ kɛ nɔ fɛɛ nɔ ni yɔɔ mli lɛ mu,+ ni ekɛfee amɛ krɔŋkrɔŋ. 11 No sɛɛ lɛ, ekɛ eko shwã afɔleshaa latɛ lɛ nɔ shii kpawo, ni ekɛfɔ afɔleshaa latɛ lɛ kɛ ehe nibii lɛ fɛɛ kɛ okpolu lɛ kɛ enɔmaanɔ lɛ mu, bɔ ni afee ni ekɛfee amɛ krɔŋkrɔŋ. 12 Naagbee lɛ, efɔse mufɔɔ mu lɛ eko eshwie Aaron yiteŋ, ni ekɛfɔ lɛ mu bɔ ni afee ni ekɛfee lɛ krɔŋkrɔŋ.+

13 No sɛɛ lɛ, Mose hã Aaron bihii lɛ ba ni ekɛ atadei kakadaji wo amɛ, ni ekɛ mliteŋfiinii fimɔ amɛmli, ni ekɛ yitsofiinii* bumɔ amɛ,*+ tamɔ bɔ ni Yehowa fã Mose lɛ pɛpɛɛpɛ.

14 Enɛ sɛɛ lɛ, ekɛ esha afɔle tsinanuu lɛ ba, ni Aaron kɛ ebihii lɛ kɛ amɛniji shwie esha afɔle tsinanuu lɛ yiteŋ.+ 15 Mose gbe tsinanuu lɛ, ni ekɛ ewao tsɔ lá+ lɛ eko ni ekɛkpa afɔleshaa latɛ lɛ akolontoi lɛ fɛɛ ahe kɛkpe, ni ekɛtsuu afɔleshaa latɛ lɛ he kɛjɛ esha mli, shi lá ni shwɛ lɛ, etsi eshwie afɔleshaa latɛ lɛ shishi, bɔ ni afee ni ekɛfee lɛ krɔŋkrɔŋ koni akpãtã yɛ nɔ. 16 No sɛɛ lɛ, eŋɔ fɔ fɛɛ ni yɔɔ mlinii lɛ ahe lɛ, fɔ ni yɔɔ mlɛbo lɛ he lɛ, kɛ sabai enyɔ lɛ kɛ fɔ ni yɔɔ amɛhe lɛ, ni Mose shã fɛɛ* yɛ afɔleshaa latɛ lɛ nɔ.+ 17 No sɛɛ lɛ, ehã akɛ la yashã tsinanuu muu lɛ ni shwɛ lɛ, ehewolo lɛ kɛ eloo lɛ kɛ efei lɛ yɛ nsara lɛ sɛɛ,+ tamɔ bɔ ni Yehowa fã Mose lɛ pɛpɛɛpɛ.

18 Agbɛnɛ, ekɛ shãa afɔle gwantɛŋnuu lɛ ba, ni Aaron kɛ ebihii lɛ kɛ amɛniji shwie gwantɛŋnuu lɛ yiteŋ.+ 19 Ni Mose gbe lɛ, ni ekɛ lá lɛ shwã afɔleshaa latɛ lɛ koji lɛ fɛɛ ahe kɛkpe. 20 Efolɔ gwantɛŋnuu lɛ mli kukuji, ni Mose shã eyitso lɛ kɛ loo kukuji lɛ kɛ fɔ* lɛ. 21 Ekɛ nu fɔ mlinii lɛ kɛ naji lɛ ahe, ni Mose shã gwantɛŋnuu muu lɛ fɛɛ yɛ afɔleshaa latɛ lɛ nɔ. Eji shãa afɔle ni jeɔ ŋma jogbaŋŋ.* Eji afɔle ni akɛ la shã ahã Yehowa, tamɔ bɔ ni Yehowa fã Mose lɛ pɛpɛɛpɛ.

22 Agbɛnɛ, ekɛ gwantɛŋnuu ni ji enyɔ lɛ, ni ji osɔfowomɔ+ gwantɛŋnuu lɛ ba, ni Aaron kɛ ebihii lɛ kɛ amɛniji shwie gwantɛŋnuu lɛ yiteŋ.+ 23 Mose gbe lɛ, ni eŋɔ elá lɛ eko esa Aaron ninejurɔ toi naa kɛ eninejurɔ gɔnti naa kɛ enanejurɔ gɔnti naa. 24 No sɛɛ lɛ, Mose hã Aaron bihii lɛ ba, ni ekɛ lá lɛ eko sa amɛninejurɔ toii anaa kɛ amɛninejurɔ gɔntii anaa kɛ amɛnanejurɔ gɔntii anaa; shi lá ni shwɛ lɛ, Mose kɛshwã afɔleshaa latɛ lɛ koji lɛ fɛɛ ahe kɛkpe.+

25 Ni eŋɔ fɔ lɛ kɛ lei agbo lɛ kɛ fɔ fɛɛ ni yɔɔ mlinii lɛ ahe lɛ kɛ fɔ ni yɔɔ mlɛbo lɛ he lɛ kɛ sabai enyɔ lɛ kɛ fɔ ni yɔɔ amɛhe lɛ kɛ sɛɛgbɛ nanejurɔ lɛ.+ 26 Ekɔ blodo kome ni ashikishaŋ-sha* bɛ mli ni abɔ lɛ tamɔ ga,+ kɛ blodo kome ni awo mli mu ni abɔ lɛ tamɔ ga,+ kɛ akpɔɔnɔɔ* kome kɛjɛ kɛntɛŋ ni blodoi ni ashikishaŋ-sha bɛ mli yɔɔ mli ni ma Yehowa hiɛ lɛ mli. Kɛkɛ ni ekɛ fɛɛ shwie fɔi lɛ kɛ nanejurɔ lɛ nɔ. 27 No sɛɛ lɛ, ekɛ nibii nɛɛ fɛɛ wo Aaron kɛ ebihii lɛ adɛŋ, ni efɔ̃ kɛtee kɛba yɛ Yehowa hiɛ akɛ fɔ̃ɔ afɔle. 28 Ni Mose he nibii lɛ yɛ amɛdɛŋ ni ekɛshwie shãa afɔle lɛ nɔ yɛ afɔleshaa latɛ lɛ nɔ, ni eshã. Osɔfowomɔ afɔle ni jeɔ ŋma jogbaŋŋ* ni. Eji afɔle ni akɛ la shã ahã Yehowa.

29 Agbɛnɛ, Mose ŋɔ tsitsi lɛ ni efɔ̃ kɛtee kɛba yɛ Yehowa hiɛ akɛ fɔ̃ɔ afɔle.+ Enɛ ji gbɛfaŋnɔ ni Mose ná kɛjɛ osɔfowomɔ afɔle lɛ mli, tamɔ bɔ ni Yehowa fã Mose lɛ pɛpɛɛpɛ.+

30 Ni Mose ŋɔ mufɔɔ mu+ lɛ eko kɛ lá ni yɔɔ afɔleshaa latɛ lɛ nɔ lɛ hu eko ni ekɛshwã Aaron kɛ etadei lɛ kɛ ebihii ni fata ehe lɛ kɛ amɛtadei lɛ anɔ. Efee enɛ kɛfee Aaron kɛ etadei lɛ kɛ ebihii+ lɛ kɛ amɛtadei lɛ krɔŋkrɔŋ.+

31 Kɛkɛ ni Mose kɛɛ Aaron kɛ ebihii lɛ akɛ: “Nyɛhoa+ loo lɛ yɛ kpee buu lɛ shinaa lɛ naa, ni nyɛkɛ blodo ni yɔɔ osɔfowomɔ kɛntɛŋ lɛ mli lɛ afataa he ni nyɛyea yɛ jɛmɛ, tamɔ bɔ ni afã mi lɛ pɛpɛɛpɛ, akɛ, ‘Aaron kɛ ebihii lɛ aye.’+ 32 Loo lɛ kɛ blodo lɛ mli nɔ ni baashwɛ lɛ, nyɛkɛ la ashãa.+ 33 Nyɛkajea kpee buu lɛ shinaa lɛ naa kɛyashi gbii kpawo, kɛyashi nyɛsɔfowomɔ gbii lɛ baaba naagbee, ejaakɛ gbii kpawo akɛbaawó nyɛ osɔfoi.*+ 34 Yehowa fã akɛ wɔfee nɔ ni wɔfee ŋmɛnɛ gbi nɛɛ koni akɛkpãtã ahã nyɛ.+ 35 Nyɛhia kpee buu lɛ shinaa lɛ naa jetsɛremɔ kɛ jenamɔ gbii kpawo+ ni nyɛyea nɔ ni Yehowa efã nyɛ lɛ nɔ,+ koni nyɛkagboi; ejaakɛ nakai afã mi.”

36 Ni Aaron kɛ ebihii lɛ fee nibii fɛɛ ni Yehowa fã Mose lɛ.