Yeremia
51 Nɔ ni Yehowa kɛɛ nɛ:
2 Matsu mɛi ni shaa ŋmaa* mli kɛya Babilon,
Ni amɛbaasha emli ni amɛbaahã eshikpɔŋ lɛ akã shi efolo ni nɔ ko nɔ ko bɛ nɔ;
Amɛbaabɔle ehe fɛɛ kɛkpe ni amɛbaatutua lɛ yɛ amanehulu gbi lɛ nɔ.+
3 Gãitsɛ̃lɔ lɛ akadɔ egãi lɛ mli.
Ni mɔ ko mɔ ko akawo edama kɛdamɔ shi.
Nyɛkanaa eblahii lɛ mɔbɔ.+
Nyɛkpãtãa esraafoi lɛ fɛɛ ahiɛ.*
4 Ni amɛbaanyɔnyɔi yɛ Kaldeabii lɛ ashikpɔŋ lɛ nɔ,
Atsurɔ amɛ nii yɛ egbɛjegbɛi lɛ anɔ.+
5 Ejaakɛ Israel kɛ Yuda Nyɔŋmɔ lɛ, Yehowa, taiatsɛ lɛ shiko amɛ koni amɛtsɔmɔ okulafoi.+
Shi yɛ Israel Mɔ Krɔŋkrɔŋ lɛ hiɛ lɛ, amɛshikpɔŋ* lɛ nɔ eyi obɔ kɛ efɔŋ.
Nyɛkahãa akpãtãa nyɛhiɛ yɛ etɔmɔ lɛ hewɔ.
Ejaakɛ be ni Yehowa kɛbaatɔ owele lɛ nɛ.
Eewo lɛ nyɔmɔ yɛ nɔ ni efee lɛ naa.+
7 No mli lɛ, Babilon ji shika tsuru kɔɔpoo yɛ Yehowa dɛŋ;
Ehã shikpɔŋ lɛ fɛɛ tɔrɔ dãa.
8 Atsi Babilon agbee shi ni akumɔ lɛ trukaa.+
Nyɛfóa lɛ!+
Nyɛkɛ balsam atoa epilamɔ lɛ nɔ; ekolɛ ehe baawa lɛ.”
9 “Kulɛ wɔmiibɔ mɔdɛŋ ni wɔtsa Babilon, shi ehiii lɛ tsamɔ.
Nyɛshia lɛ, nyɛhãa wɔyaa, mɔ fɛɛ mɔ aya lɛ diɛŋtsɛ eshikpɔŋ nɔ.+
Ejaakɛ ekojomɔ lɛ eshɛ ŋwɛi tɔ̃ɔ;
Ekojomɔ lɛ nɔ kwɔ tamɔ atatui lɛ.+
10 Yehowa eye jalɛ sane ehã wɔ.+
Nyɛbaa, nyɛhãa wɔwiea Yehowa, wɔ-Nyɔŋmɔ lɛ nitsumɔi lɛ ahe yɛ Zion.”+
11 “Nyɛshaa gãimlibii lɛ ahe keŋkeŋ;+ nyɛkɔlɔa tsɛŋi koklobii* lɛ.
Yehowa etsĩɛ Mediabii amaŋtsɛmɛi lɛ amumɔ lɛ hiɛ,+
Ejaakɛ ekpɛ mli akɛ ebaakpãtã Babilon hiɛ.
Ejaakɛ enɛ ji Yehowa oweletɔɔ lɛ, esɔlemɔ shĩa lɛ he oweletɔɔ lɛ.
12 Nyɛwóa okadi* ko nɔ+ nyɛwoa Babilon gbogboi lɛ.
Nyɛhãa buu lɛ mli awaa, nyɛhãa bulɔi lɛ ayadamɔa amɛgbɛhei.
Nyɛhãa mɛi ni baayawo ka lɛ asaa amɛhe amɛtoa.
Ejaakɛ Yehowa etsɔ̃ ŋaa,
Ni ebaahã nɔ ni ewie eshi mɛi ni yɔɔ Babilon lɛ aba mli.”+
14 Yehowa, taiatsɛ lɛ, kɛ lɛ diɛŋtsɛ ehe* ekã kitã akɛ,
‘Mahã hii ayi omli obɔ, hii babaoo tamɔ baalabii,
Ni amɛbaalá kunimyeli lala yɛ ohewɔ.’+
15 Lɛ ji mɔ ni kɛ ehewalɛ fee shikpɔŋ lɛ,
Mɔ ni jɛ ehiɛshikamɔ mli eto shikpɔŋ* lɛ shishi,+
Ni lɛɛ ŋwɛi mli yɛ eniiashishinumɔ naa lɛ.+
16 Kɛ́ ewó egbee nɔ lɛ,
Nui ni yɔɔ ŋwɛi lɛ feɔ hamahama,
Ni ehãa atatui* teɔ shi kɛjɛɔ shikpɔŋ lɛ naagbeehei lɛ.
17 Gbɔmɔ fɛɛ gbɔmɔ lɛ, buulu ni, ni ebɛ jwɛŋmɔ.
Dade sɔ̃lɔ fɛɛ dade sɔ̃lɔ hiɛ baagbo yɛ amaga ni efee lɛ hewɔ;+
Ejaakɛ edade amaga lɛ, lakamɔ ni,
18 Lakamɔ nii* kɛkɛ ji amɛ,+ nibii ni ayeɔ he fɛo.
Kɛ́ gbi ni akɛbaakojo amɛ lɛ shɛ lɛ, amɛhiɛ baakpãtã.
19 Yakob Gbɛfaŋnɔ lɛ tamɔɔɔ enɛɛmɛi,
Ejaakɛ lɛ ji mɔ ni shɔ̃ nɔ fɛɛ nɔ,
Egboshinii lɛ dɛhiɛmɔtso lɛ po.+
Egbɛ́i ji Yehowa, taiatsɛ lɛ.”+
20 “Oji tawuu tsokpoti kɛhã mi, tawuu nii,
Ejaakɛ bo mikɛbaajwara jeŋmaji.
Bo mikɛbaakpãtã maŋtsɛyelii ahiɛ.
21 Bo mikɛbaajwara okpɔŋɔ kɛ enɔtalɔ.
Bo mikɛbaajwara ta shwiili kɛ mɔ ni ta mli.
22 Bo mikɛbaajwara nuu kɛ yoo.
Bo mikɛbaajwara nuumo kɛ gbekɛ nuu.
Bo mikɛbaajwara oblanyo kɛ oblayoo.
23 Bo mikɛbaajwara tookwɛlɔ kɛ etooku.
Bo mikɛbaajwara okwaafonyo kɛ ehumɔ kooloi.
Bo mikɛbaajwara amralofoi kɛ nɔkwɛlɔi.
24 Ni mawo Babilon kɛ mɛi ni yɔɔ Kaldea lɛ fɛɛ nyɔmɔ
Yɛ efɔŋ fɛɛ ni amɛfee yɛ Zion yɛ nyɛhiŋmɛiiaŋ lɛ hewɔ,”+ Yehowa kɛɛ.
Makpã minine mli mawo bo, ni makoklo bo kɛjɛ tɛsai lɛ anɔ kɛtswa shi
Ni mafee bo gɔŋ ni ashã.”
26 “Mɛi kɔŋ omli tɛ ko amɛkɛtoŋ koŋtɛ loo amɛkɛtswaŋ faneshi,
Ejaakɛ obaatsɔ amaŋfɔ kɛya naanɔ,”+ Yehowa kɛɛ.
27 “Nyɛwóa okadi* ko nɔ yɛ shikpɔŋ lɛ nɔ.+
Nyɛkpãa tɛtɛrɛmantɛrɛ yɛ jeŋmaji lɛ ateŋ.
Nyɛhalaa jeŋmaji* ni amɛwua amɛshia lɛ.
Nyɛtsɛa Ararat,+ kɛ Mini, kɛ Ashkenaz+ maŋtsɛyelii lɛ fɛɛ nyɛwoa lɛ.
Nyɛwóa tatsɛ nyɛwoa lɛ.
Ni nyɛhãa okpɔŋɔi lɛ akwɔa kɛbaa tamɔ baalabii bibii.
28 Nyɛhalaa jeŋmaji* ni amɛwua amɛshia lɛ.
Media+ maŋtsɛmɛi lɛ, amralofoi ni yɔɔ emli lɛ kɛ enɔkwɛlɔi lɛ fɛɛ
Kɛ shikpɔji ni amɛyeɔ nɔ lɛ fɛɛ.
29 Ni shikpɔŋ lɛ baahoso ni ebaakpokpo,
Ejaakɛ abaatsu nɔ ni Yehowa ekpɛ eyiŋ yɛ Babilon he lɛ he nii
Koni Babilon shikpɔŋ lɛ atsɔ nɔ ko ni hãa mɔ he jɔ̃ɔ ehe, mɔ ko mɔ ko ehiŋ jɛmɛ.+
30 Babilon tawulɔi lɛ ekpa ta lɛ wuu.
Amɛtara amɛteemɔhei lɛ.
Amɛhewalɛ etã.+
Amɛtsɔmɔ tamɔ yei.+
Awo amɛshĩai lɛ amli la.
Akumɔ amɛgbói lɛ asɛɛ adabaŋi* lɛ.+
31 Sanehiɛlɔ* kome shaa foi ni ekɛ sanehiɛlɔ kroko yakpeɔ,
Ni tsulɔ kome kɛ tsulɔ kroko yakpeɔ,
Koni amɛyabɔ Babilon maŋtsɛ lɛ amaniɛ akɛ abɔle emaŋ lɛ kɛkpe ni aye enɔ kunim,+
32 Aŋɔ hei ni afoɔ faa lɛ yɛ lɛ,+
Ni akɛ la eshã papiro lɛji lɛ,
Ni gbeyei emɔmɔ asraafoi lɛ.”
33 Ejaakɛ nɔ ni Yehowa, taiatsɛ lɛ, Israel Nyɔŋmɔ lɛ kɛɛ nɛ:
“Babilon biyoo lɛ tamɔ ŋmaagbeemɔhe.
Be ni akɛbaanyiɛ enɔ lɛ nɛ.
Etsɛŋ kwraa ni be ni akɛbaakpa enɔ nii lɛ baashɛ.”
Ekɛ mi ema shi tamɔ gbɛ́ ni nɔ ko nɔ ko bɛ mli.
Emi mi tamɔ onufu agbo ko miɔ nii lɛ;+
Ekɛ minibii kpakpai lɛ ewo emusuŋ obɔ.
Ekɛ nu efɔ mi eshwie.
35 Mɛi ni yɔɔ Zion lɛ miikɛɛ akɛ, ‘Awui ni aye mi kɛ migbɔmɔtso lɛ ababua Babilon yiteŋ!’+
Yerusalem hu miikɛɛ akɛ, ‘Milá ababua mɛi ni yɔɔ Kaldea lɛ ayiteŋ!’”
36 No hewɔ lɛ, nɔ ni Yehowa kɛɛ nɛ:
Ni mahã ŋshɔ ni eyɔɔ lɛ agbi, ni mahã enubui lɛ hu agbi.+
37 Ni Babilon baatsɔ tɛi ni abua naa,+
Ŋa mli gbei ashihilɛhe,+
Nii ni hãa mɔ he jɔ̃ɔ ehe kɛ nii ni hãa aboɔ tsia,*
Mɔ ko mɔ ko ehiŋ jɛmɛ.+
38 Amɛ fɛɛ amɛbaabolɔ tamɔ jatai.*
Ni amɛbaahũu tamɔ jatabii.”
39 “Kɛ́ amɛkɔnɔ te shi lɛ, maŋmɛ amɛ okpɔlɔ ni mahã amɛtɔrɔ dãa,
Koni amɛmli afili amɛ;+
Kɛkɛ lɛ, amɛbaawɔ kɛya naanɔ,
Ni amɛteŋ shi dɔŋŋ,”+ Yehowa kɛɛ.
40 “Mikɛ amɛ baakpeleke shi tamɔ gwantɛŋbii ni ayaagbe amɛ,
Tamɔ gwantɛŋhii kɛ abotiai.”
Bɔ ni Babilon etsɔ nii ni hãa mɔ he jɔ̃ɔ ehe yɛ jeŋmaji lɛ ateŋ!
42 Ŋshɔ lɛ ekwɔ kɛbaha Babilon nɔ.
Ŋshɔkei babaoo lɛ eha enɔ.
43 Emaji lɛ etsɔ nɔ ko ni hãa mɔ he jɔ̃ɔ ehe, shikpɔŋ ni nu bɛ nɔ, kɛ ŋa kpataa.
Shikpɔŋ ni mɔ ko mɔ ko ehiii nɔ, ni mɔ ko hu tsɔɔɔ nɔ kɛhooo.+
Jeŋmaji hoŋ kɛyaŋ eŋɔɔ dɔŋŋ,
Ni Babilon gbogbo lɛ baagbee shi.+
Nyɛjoa foi kɛjea Yehowa mlifu ni naa wa+ lɛ mli kɛbaa nyɛwala yi!*+
46 Nyɛtsui akafãa ni nyɛkashea gbeyei yɛ sane ni nyɛbaanu yɛ shikpɔŋ lɛ nɔ lɛ hewɔ.
Nyɛbaanu sane lɛ he yɛ afi kome mli,
Ni afi ni nyiɛ sɛɛ lɛ mli hu, nyɛbaanu sane kroko he akɛ,
Yiwalɛ ete shi yɛ shikpɔŋ lɛ nɔ, ni nɔyelɔ ete shi ewo nɔyelɔ.
47 No hewɔ lɛ, naa! gbii miiba
Be ni magbala mijwɛŋmɔ kɛba Babilon amagai lɛ anɔ.
Ni eshikpɔŋ lɛ fɛɛ hiɛ baashwie shi,
Ni emɛi ni agbe lɛ fɛɛ baanyɔnyɔi yɛ emli.+
48 Ŋwɛi lɛ kɛ shikpɔŋ lɛ kɛ nɔ fɛɛ nɔ ni yɔɔ amɛmli lɛ
Baalá nyamɔ lala yɛ Babilon hewɔ,+
Ejaakɛ hiɛkpatalɔi lɛ baajɛ kooyigbɛ kɛba enɔ,”+ Yehowa kɛɛ.
49 “Jeee Israelbii ni agbe lɛ pɛ Babilon hã amɛnyɔnyɔi+
Shi mɛi ni agbe yɛ shikpɔŋ lɛ fɛɛ nɔ lɛ hu nyɔnyɔi yɛ Babilon.
50 Nyɛ mɛi ni nyɛjo foi kɛje klante lɛ naa, nyɛyaa nyɛhiɛ, nyɛkadamɔa shi!+
Nyɛkaia Yehowa kɛjɛa shɔŋŋ,
Ni nyɛkaia Yerusalem hu yɛ nyɛtsuii amli.”+
51 “Ashwie wɔhiɛ shi ejaakɛ wɔnu wiemɔi ni awieɔ ashiɔ wɔ lɛ.
52 “No hewɔ lɛ, naa! gbii miiba,” Yehowa kɛɛ,
“Be ni magbala mijwɛŋmɔ kɛba Babilon amagai lɛ anɔ,
Ni mɛi ni apila amɛ yɛ eshikpɔŋ lɛ nɔ fɛɛ baakɛ̃mɔ.”+
53 “Kɛ́ Babilon kwɔ kɛtee ŋwɛi shɔŋŋ po,+
Kɛ́ ewaje eteemɔhei ni kwɔlɔ lɛ tamɔ mɛ̃,
Mi miŋɔɔ ehiɛkpatalɔi lɛ baajɛ kɛbaaba enɔ,”+ Yehowa kɛɛ.
54 “Bo toi! Aabo kɛmiijɛ Babilon,+
Aanu hiɛkpatamɔ kpele he kɛmiijɛ Kaldeabii lɛ ashikpɔŋ lɛ nɔ,+
55 Ejaakɛ Yehowa miikpãtã Babilon hiɛ,
Ebaahã* egbee ni naa wa lɛ naa aba shi,
Ni amɛshɔkei lɛ baagbɛɛ tamɔ nui babaoo.
Abaanu amɛgbee.
56 Ejaakɛ hiɛkpatalɔ lɛ baaba Babilon nɔ;+
Abaaŋɔ etawulɔi lɛ nom,+
Abaakumɔ amɛgãii lɛ amli,
Ejaakɛ Yehowa ji Nyɔŋmɔ ni gbalaa toi.+
Ebaato najiaŋ kɛ̃.+
57 Mahã elumɛi lɛ kɛ ehiɛshikalɔi lɛ atɔrɔ dãa,+
Amralofoi ni yɔɔ emli lɛ kɛ enɔkwɛlɔi lɛ kɛ etawulɔi lɛ fɛɛ,
Ni amɛbaawɔ kɛya naanɔ,
Ni amɛteŋ shi dɔŋŋ,”+ Maŋtsɛ lɛ, mɔ ni gbɛ́i ji Yehowa, taiatsɛ lɛ kɛɛ.
58 Nɔ ni Yehowa, taiatsɛ lɛ kɛɛ nɛ:
“Eyɛ mli akɛ Babilon gbogbo lɛ lɛɛ moŋ, shi abaakumɔ fɛɛ ashwie shi,+
Ni eyɛ mli akɛ egbói lɛ kwɔlɔ moŋ, shi abaawo mli la.
Ebaatɔ majimaji lɛ efolo;
Jeŋmaji lɛ, la po amɛbaagbo deŋme amɛhã.”+
59 Enɛ ji wiemɔ ni gbalɔ Yeremia kɛhã Seraia, ni ji Mahseia binuu Neria+ binuu lɛ akɛ famɔ, be ni ekɛ Yuda maŋtsɛ Zedekia tee Babilon yɛ enɔyeli afi ni ji ejwɛ lɛ mli lɛ; Seraia ji mɔ ni kwɛɔ maŋtsɛ lɛ nibii lɛ anɔ. 60 Yeremia ŋma saji fɔji fɛɛ ni baaba Babilon nɔ lɛ ewo wolo kome mli, eŋmala wiemɔi nɛɛ fɛɛ eshi Babilon. 61 Agbɛnɛ hu, Yeremia kɛɛ Seraia akɛ: “Kɛ́ oshɛ Babilon ni ona lɛ lɛ, kanemɔ wiemɔi nɛɛ fɛɛ otsɔɔ lɛ. 62 Ni okɛɛ akɛ, ‘Ao, Yehowa, owie oshi maŋ nɛɛ akɛ abaakpãtã ehiɛ ni mɔ ko mɔ ko ehiŋ emli, gbɔmɔ jio, kooloo jio, ni ebaatsɔ amaŋfɔ kɛya naanɔ.’+ 63 Ni kɛ́ okane wolo nɛɛ ogbe naa lɛ, fii okpɛtɛ tɛ he, ni oshɛ ofɔ̃ Yufrate Faa lɛ teŋ. 64 Ni okɛɛ akɛ, ‘Nɛkɛ ji bɔ ni Babilon baashiu ni eteŋ shi dɔŋŋ+ yɛ sane fɔŋ ni mikɛmiiba enɔ lɛ hewɔ; ni ebaatɔ amɛ.’”+
Biɛ ji he ni Yeremia wiemɔi lɛ bawaa.