Ester
1 Sane nɛɛ ba yɛ Ahasweros,* ni ji Ahasweros ni ye kpokpai+ 127 nɔ kɛjɛ India kɛyashi Etiopia* lɛ gbii lɛ amli, 2 yɛ nakai gbii lɛ amli be ni Maŋtsɛ Ahasweros ta emaŋtsɛ sɛi lɛ nɔ yɛ Shushan*+ mɔɔ* lɛ mli, 3 yɛ enɔyeli afi ni ji etɛ lɛ mli lɛ, eŋmɛ elumɛi kɛ etsuji lɛ fɛɛ okpɔlɔ. Persia+ kɛ Media+ asraafoi lɛ, kɛ abladei lɛ, kɛ kpokpai lɛ anɔ lumɛi lɛ fɛɛ yɛ ehiɛ, 4 ni ekɛ jwetrii ni hãa emaŋtsɛyeli lɛ hiɛ baa nyam, kɛ agbɛnɛ hu, nɔ ni hãa ejeɔ agbo ni ehiɛ baa nyam lɛ tsɔɔ amɛ gbii babaoo, gbii 180 sɔŋŋ. 5 Ni be ni gbii nɛɛ ba naagbee lɛ, maŋtsɛ lɛ ŋmɛ okpɔlɔ gbii kpawo ehã mɛi fɛɛ ni eba Shushan* mɔɔ* lɛ mli lɛ, kɛjɛ mɔ wulu nɔ kɛyashi mɔ bibioo nɔ, yɛ maŋtsɛ shĩa lɛ abɔɔ lɛ kpo lɛ nɔ. 6 Akɛ klala kɛ mama* fɛfɛo kɛ mama bluu etsotsoro jɛmɛ, ni akɛ kpãi ni akɛ mama kpakpa fee kɛ kpãi ni akɛ kooloo hetsɔi ni hiɛ pɛpol kɔla fee emɔmɔ kɛfimɔ jwiɛtɛi gai ni yɔɔ marmara tɛ* akulashiŋi ahe, ni sɛi saatsei ni akɛ shika tsuru kɛ jwiɛtɛi fee mamɔ shikpɔŋ ni akɛ pɔfri tɛi* kɛ marmara tɛi* kɛ adiagbai kɛ marmara tɛi* diji eka nɔ lɛ nɔ.
7 Ahã mɛi wain yɛ shika tsuru kɔɔpoi amli; esoro bɔ ni afee kɔɔpoi lɛ eko fɛɛ eko, ni wain ni maŋtsɛ lɛ hã lɛ fa babaoo yɛ nii ni maŋtsɛ lɛ yɔɔ lɛ naa. 8 Awo mla akɛ akanyɛ mɔ ko nɔ* yɛ wain lɛ numɔ mli, ejaakɛ maŋtsɛ lɛ ewo emaŋtsɛ shĩa lɛ onukpai lɛ kitã akɛ, ahã mɔ fɛɛ mɔ afee nɔ ni lɛ diɛŋtsɛ esumɔɔ.
9 Maŋnyɛ Vashti+ hu ŋmɛ yei lɛ okpɔlɔ yɛ Maŋtsɛ Ahasweros maŋtsɛyeli shĩa lɛ.
10 Ni yɛ gbi kpawo lɛ nɔ be ni wain lɛ ehã maŋtsɛ lɛ ená miishɛɛ* waa lɛ, ekɛɛ Mehuman kɛ Bizta kɛ Harbona+ kɛ Bigta kɛ Abagta kɛ Zeter kɛ Karkas, ni ji maŋtsɛ shĩa onukpai kpawo ni sɔmɔɔ Maŋtsɛ Ahasweros lɛ, 11 koni amɛyaŋɔ Maŋnyɛ Vashti kɛba ehiɛ, ebu maŋnyɛ akekere* lɛ kɛba, ni ekɛ ehefɛo lɛ abatsɔɔ maŋbii lɛ kɛ lumɛi lɛ, ejaakɛ ehe yɛ fɛo waa. 12 Maŋtsɛ shĩa onukpai lɛ yakɛɛ Maŋnyɛ Vashti maŋtsɛ lɛ famɔ lɛ shii abɔ, shi eko fɛɛ eko lɛ, ekɛɛ akɛ ebaaa. No hewɔ lɛ, maŋtsɛ lɛ mli fu waa, ni emli wo la waa diɛŋtsɛ.
13 Kɛkɛ ni maŋtsɛ lɛ kɛ hii hiɛshikalɔi ni le bɔ ni atsuɔ saji ni tamɔ nɛkɛ ahe nii* lɛ yawie (ejaakɛ nɛkɛ gbɛ nɔ maŋtsɛ lɛ tsɔɔ ekɛ esane baa mɛi ni le mla kɛ mla saji jogbaŋŋ lɛ ahiɛ, 14 ni amɛteŋ mɛi ni bɛŋkɛ lɛ kpaakpa ji Karshena kɛ Shetar kɛ Admata kɛ Tarshish kɛ Meres kɛ Marsena kɛ Memukan, Persia kɛ Media lumɛi+ kpawo ni nyɛɔ amɛyaa maŋtsɛ lɛ hiɛ ni yɔɔ gbɛnai ni nɔ kwɔlɔ fe fɛɛ yɛ maŋtsɛyeli lɛ mli lɛ). 15 Maŋtsɛ lɛ bi amɛ akɛ: “Yɛ mla naa lɛ, mɛni esa akɛ afee Maŋnyɛ Vashti, ejaakɛ ebooo Maŋtsɛ Ahasweros famɔ ni etsɔ maŋtsɛ shĩa onukpai lɛ anɔ ekɛhã lɛ toi?”
16 Kɛkɛ ni Memukan kɛɛ yɛ maŋtsɛ lɛ kɛ lumɛi lɛ ahiɛ akɛ: “Jeee maŋtsɛ lɛ pɛ nɔ Maŋnyɛ Vashti etɔ̃,+ etɔ̃ lumɛi lɛ kɛ mɛi fɛɛ ni yɔɔ Maŋtsɛ Ahasweros kpokpai lɛ fɛɛ anɔ lɛ nɔ. 17 Ejaakɛ ŋamɛi fɛɛ baaná ale nɔ ni maŋnyɛ lɛ fee lɛ, ni amɛbuŋ amɛwumɛi, ni amɛbaakɛɛ akɛ, ‘Maŋtsɛ Ahasweros tsu koni ayaŋɔ Maŋnyɛ Vashti kɛba ehiɛ, shi ebaaa.’ 18 Ŋmɛnɛ gbi nɛɛ, Persia kɛ Media lumɔ yei ni le nɔ ni maŋnyɛ lɛ fee lɛ baakɛɛ maŋtsɛ lɛ lumɛi lɛ fɛɛ, ni enɛ kɛ heguɔgbee kɛ mlifu babaoo baaba. 19 No hewɔ lɛ, kɛ́ esa maŋtsɛ hiɛ lɛ, ekɛ famɔ ahã ni ehã aŋma famɔ nɛɛ afata Persia kɛ Media mlai ni atsakeee+ lɛ ahe akɛ, Vashti akaba Maŋtsɛ Ahasweros hiɛ dɔŋŋ; ni maŋtsɛ kɛ Vashti gbɛnaa ni ji maŋnyɛ lɛ, ahã yoo kroko ni hi fe lɛ. 20 Ni kɛ́ anu maŋtsɛ famɔ lɛ yɛ emaŋtsɛyeli lɛ mli fɛɛ lɛ, ŋamɛi fɛɛ kɛ woo baahã amɛwumɛi, kɛjɛ mɔ wulu nɔ kɛyashi mɔ bibioo nɔ.”
21 Ŋaawoo nɛɛ sa maŋtsɛ lɛ kɛ lumɛi lɛ ahiɛ, ni maŋtsɛ lɛ fee tamɔ bɔ ni Memukan kɛɛ lɛ. 22 No hewɔ lɛ, eŋmala woji ni ekɛtsu kɛtee kpokpai+ ni yɔɔ emaŋtsɛyeli lɛ mli lɛ fɛɛ nɔ, eŋma kɛyahã kpokpaa fɛɛ kpokpaa yɛ kpokpaa lɛ diɛŋtsɛ niŋmai* kɛ ewiemɔ mli, koni wu fɛɛ wu aye lɛ diɛŋtsɛ* eshĩa nɔ, ni ewie lɛ diɛŋtsɛ emaŋ wiemɔ.