3 Mose

25 Yehowa tee nɔ ekɛ Mose wie yɛ Sinai Gɔŋ lɛ nɔ ekɛɛ: 2 “Okɛ Israelbii lɛ awie ni okɛɛ amɛ akɛ, ‘Kɛ́ nyɛná nyɛyashɛ shikpɔŋ ni mikɛhãa nyɛ lɛ nɔ lɛ,+ no lɛ, shikpɔŋ lɛ aye hejɔɔmɔ* ehã Yehowa.+ 3 Afii ekpaa odu nii* yɛ oshikpɔŋ lɛ nɔ, ni afii ekpaa osaa owain ŋmɔ mli tsei lɛ ahe, ní obua shikpɔŋ lɛ nɔ nibaa nii lɛ anaa oto.+ 4 Shi afi ni ji kpawo lɛ baafee hejɔɔmɔ afi ní shikpɔŋ lɛ kɛbaajɔɔ ehe kwraa, eji hejɔɔmɔ kɛhã Yehowa. Kaadu nii* yɛ oshikpɔŋ lɛ nɔ, ni kaasaa owain ŋmɔ mli tsei lɛ ahe hu. 5 Kɛ́ akpa ŋmaa* lɛ sɛɛ lɛ, nɔ ni baashwɛ ni lɛ diɛŋtsɛ ebaakwɛ̃ lɛ, kaakpa oto, ni owain tso ni osako he lɛ yibii lɛ hu, kaabua naa oto. Shikpɔŋ lɛ ajɔɔ ehe kwraa afi kome. 6 Shi, obaanyɛ oye niyenii ni kwɛ̃ɔ yɛ shikpɔŋ lɛ nɔ yɛ ehejɔɔmɔ be lɛ mli lɛ; bo kɛ onyɔji hii kɛ onyɔji yei kɛ opaafonyo kɛ gbɔi ni ebahi nyɛshikpɔŋ lɛ nɔ ni kɛ bo yɔɔ lɛ baanyɛ aye, 7 ni shĩa kooloi kɛ ŋa mli kooloi ni yɔɔ oshikpɔŋ lɛ nɔ lɛ hu baanyɛ aye. Nɔ fɛɛ nɔ ni shikpɔŋ lɛ baaba lɛ, abaanyɛ aye.

8 “‘Kanemɔ hejɔɔmɔ afii kpawo, ni ji afii kpawo toi kpawo, ni hejɔɔmɔ afii kpawo lɛ mli gbii lɛ baafee afii 49. 9 Kɛkɛ lɛ, yɛ nyɔɔŋ ni ji kpawo lɛ nɔ gbi ni ji nyɔŋma lɛ nɔ lɛ, kpã tɛtɛrɛmantɛrɛ waa; Kpatamɔ Gbi+ lɛ nɔ lɛ, nyɛhãa anua tɛtɛrɛmantɛrɛ lɛ gbɛɛmɔ yɛ nyɛshikpɔŋ lɛ fɛɛ nɔ. 10 Nyɛfea afi ni ji 50 lɛ krɔŋkrɔŋ ni nyɛshiɛa heyeli yɛ shikpɔŋ lɛ nɔ nyɛhãa enɔ bii lɛ fɛɛ.+ Etsɔ Heyeli Afi ehã nyɛ, ni nyɛteŋ mɔ fɛɛ mɔ aku esɛɛ eyaŋɔ enii, ni nyɛteŋ mɔ fɛɛ mɔ aku esɛɛ kɛya ewekumɛi aŋɔɔ.+ 11 Nakai afi ni ji 50 lɛ atsɔ Heyeli Afi ahã nyɛ. Nyɛkadua nii,* ni ŋmaa ni shwɛ ni lɛ diɛŋtsɛ ekwɛ̃ lɛ, nyɛkakpaa nyɛtoa, ni nyɛwain tsei ni asako he lɛ ayibii lɛ hu, nyɛkabuaa naa nyɛtoa.+ 12 Ejaakɛ Heyeli Afi ni. Efee krɔŋkrɔŋ ehã nyɛ. Niyenii ni shikpɔŋ lɛ diɛŋtsɛ baaba lɛ, ye kɛkɛ nyɛyea.+

13 “‘Nɛkɛ Heyeli Afi nɛɛ mli lɛ, nyɛteŋ mɔ fɛɛ mɔ aku esɛɛ eyaŋɔ enii.+ 14 Kɛ́ nyɛhɔ̃ɔ nɔ ko nyɛhã nyɛnyɛmi gbɔmɔ loo nyɛhé nɔ ko yɛ edɛŋ lɛ, nyɛteŋ mɔ ko akashishiu enyɛmi.+ 15 Kwɛmɔ afii abɔ ni eho kɛjɛ Heyeli Afi lɛ nɔ, ni odamɔ no nɔ ohé nii yɛ onyɛmi gbɔmɔ dɛŋ, ni lɛ hu ehɔ̃ɔ nii ehã bo yɛ afii abɔ ni eshwɛ kɛhã nibaa nii kpamɔ lɛ naa.+ 16 Kɛ́ eshwɛ afii babaoo lolo lɛ, no lɛ, ebaanyɛ eŋmɛ nii lɛ jara lɛ nɔ, ni kɛ́ eshwɛ afii fioo lɛ, no lɛ, etse ejara lɛ nɔ, ejaakɛ eehɔ̃ɔ nibaa nii falɛ ni baaba lɛ eehã bo. 17 Nyɛteŋ mɔ ko mɔ ko akashishiu enyɛmi gbɔmɔ,+ ni she o-Nyɔŋmɔ lɛ gbeyei,+ ejaakɛ miji Yehowa, nyɛ-Nyɔŋmɔ lɛ.+ 18 Kɛ́ nyɛye mimlai lɛ anɔ ni nyɛkɛ miyiŋkpɛi* lɛ tsu nii lɛ, nyɛbaahi shi shweshweeshwe yɛ shikpɔŋ lɛ nɔ.+ 19 Shikpɔŋ lɛ baaba enii,+ ni nyɛbaaye nyɛtɔrɔ, ni nyɛbaahi shi shweshweeshwe yɛ jɛmɛ.+

20 “‘Shi kɛ́ nyɛaakɛɛ akɛ: “Mɛni wɔbaaye yɛ afi ni ji kpawo lɛ mli, kɛ́ wɔduuu nii* ni wɔbuaaa wɔnibaa nii anaa hu lɛ?”+ 21 Mafã mijɔɔmɔ lɛ ní eba nyɛnɔ yɛ afi ni ji ekpaa lɛ mli, ni shikpɔŋ lɛ baaba nii bɔ ni fa kɛhã afii etɛ.+ 22 Ni nyɛbaadu nii* yɛ afi ni ji kpaanyɔ lɛ mli, ni nyɛbaaye nibaa nii ni yɔɔ momo lɛ kɛyashi afi ni ji nɛɛhu lɛ nɔ. Kɛyashi enibaa nii lɛ baaba lɛ, nyɛbaaye nibaa nii ni yɔɔ momo lɛ.

23 “‘Akahɔ̃ɔ shikpɔŋ lɛ ahã mɔ ko ni etsɔ mɔ lɛ nɔ kwraa,+ ejaakɛ shikpɔŋ lɛ, mi minɔ ni.+ Ejaakɛ yɛ mihiɛ lɛ, gbɔi kɛ mɛi ni ebahi shikpɔŋ lɛ nɔ kɛkɛ ji nyɛ.+ 24 Yɛ nyɛshikpɔŋ lɛ fɛɛ nɔ lɛ, nyɛhãa hegbɛ ni anyɛ akpɔ̃ shikpɔŋ lɛ.

25 “‘Kɛ́ onyɛmi batsɔ ohiafo, ni ehe bahia ni ehɔ̃ɔ nii ni eyɔɔ lɛ eko lɛ, no lɛ, kpɔ̃lɔ ko ni ji ewekunyo kpaakpa aba ni ebakpɔ̃ nɔ ni enyɛmi lɛ hɔ̃ɔ lɛ.+ 26 Kɛ́ mɔ ko bɛ kpɔ̃lɔ ko ni baakpɔ̃ enii lɛ, shi sɛɛ mli lɛ ebaná nii, ni ená nɔ ni ebaanyɛ ekɛkpɔ̃ nɔ ni ehɔ̃ɔ lɛ, 27 ebu nii lɛ jara lɛ naa yɛ afii ni nii lɛ eye kɛjɛ be ni ehɔ̃ɔ lɛ naa, ni etse kɛjɛ jara lɛ mli ni ekɛ nɔ ni baashwɛ lɛ ahã mɔ ni ehɔ̃ɔ ehã lɛ. Kɛkɛ lɛ, ebaanyɛ eku esɛɛ eyaŋɔ enii.+

28 “‘Shi kɛ́ enáaa nɔ ni ebaanyɛ ekɛyakpɔ̃ nii lɛ kɛjɛ mɔ lɛ dɛŋ lɛ, no lɛ, nɔ ni ehɔ̃ɔ lɛ akã he ahi mɔ ni hé lɛ dɛŋ kɛyashi Heyeli Afi lɛ;+ ni nii lɛ baatsɔ enɔ ekoŋŋ yɛ Heyeli Afi lɛ mli, ní eku esɛɛ eyaŋɔ enii.+

29 “‘Agbɛnɛ, kɛ́ mɔ ko hɔ̃ɔ shĩa ko ni yɔɔ maŋ ni atswa gbogbo awo he mli lɛ, kɛjɛ be ni ehɔ̃ɔ shĩa lɛ egbe naa lɛ aahu kɛyashi enɔ afi lɛ, eyɛ hegbɛ ní ekɛaakpɔ̃ nɔ ni ehɔ̃ɔ lɛ;+ eyɛ hegbɛ afi muu fɛɛ ni ekɛaakpɔ̃ nii lɛ. 30 Shi kɛ́ akpɔ̃ɔɔ shĩa ni yɔɔ maŋ ni atswa gbogbo awo he lɛ mli ni afi muu fɛɛ ho lɛ, no lɛ, shĩa lɛ atsɔ mɔ ni hé lɛ nɔ kwraa yɛ eyinɔi fɛɛ amli. Akaŋmɛɛ he yɛ Heyeli Afi lɛ mli. 31 Shi shĩai ni yɔɔ shihilɛhei ni atswako gbogbo awoko amɛhe lɛ, abu amɛ ashi shikpɔji ni yɔɔ akrowai amli lɛ anɔ. Ayɛ hegbɛ ni akɛaakpɔ̃ shĩa lɛ, ni esa akɛ aŋmɛɛ he yɛ Heyeli Afi lɛ mli.

32 “‘Shi Levibii lɛ ashĩai ni yɔɔ amɛmaji lɛ amli lɛ,+ Levibii lɛ yɛ hegbɛ be fɛɛ be ni amɛkɛaakpɔ̃ nɔ ni amɛhɔ̃ɔ lɛ. 33 Kɛji Levibii lɛ ashĩa ko yɛ amɛmaŋ lɛ mli ni ahɔ̃ɔ, shi akpɔ̃ɔɔ shĩa lɛ, no lɛ, aŋmɛɛ he yɛ Heyeli Afi lɛ mli,+ ejaakɛ shĩai ni yɔɔ Levibii lɛ amaji lɛ amli lɛ ji amɛgbɛfaŋnɔ yɛ Israelbii lɛ ateŋ.+ 34 Agbɛnɛ hu, shikpɔji ni kooloi yeɔ nii yɛ nɔ,+ ni bɔle amɛmaji lɛ ahe lɛ, akahɔ̃ɔ, ejaakɛ eji amɛnɔ daa.

35 “‘Kɛ́ onyɛmi ni yɔɔ omasɛi lɛ batsɔ ohiafo ni enyɛɛɛ ekwɛ ehe lɛ, no lɛ, ye obua lɛ+ tamɔ bɔ ni obaaye obua gbɔ kɛ mɔ ni ebahi nyɛshikpɔŋ lɛ nɔ lɛ,+ koni eya nɔ ehi wala mli yɛ nyɛteŋ. 36 Kaahe nɔ ko he kpa yɛ edɛŋ, ni kaaŋmɛ nɔ ko jara nɔ ohã lɛ bɔ ni afee ni oná sɛɛ.*+ She o-Nyɔŋmɔ lɛ gbeyei,+ ni onyɛmi lɛ baaya nɔ ahi wala mli yɛ nyɛteŋ. 37 Kɛ́ ofa lɛ shika lɛ, kaahe ehe kpa,+ ni kɛ́ ohã lɛ niyenii hu lɛ, okɛ nɔ ko akaŋmɛ nɔ. 38 Miji Yehowa, nyɛ-Nyɔŋmɔ lɛ, mɔ ni jie nyɛ kɛje Ejipt shikpɔŋ lɛ nɔ+ koni mikɛ Kanaan shikpɔŋ lɛ ahã nyɛ, ní mahã nyɛna akɛ miji nyɛ-Nyɔŋmɔ+ lɛ.

39 “‘Kɛ́ onyɛmi ni yɔɔ omasɛi lɛ batsɔ ohiafo ni ehe bahia ni ehɔ̃ɔ ehe ehã bo lɛ,+ kaanyɛ enɔ ni etsu nii akɛ nyɔŋ.+ 40 Okɛ lɛ aye tamɔ apaafonyo,+ tamɔ mɔ ko ni ebahi nyɛshikpɔŋ lɛ nɔ. Eya nɔ esɔmɔ bo kɛyashi Heyeli Afi lɛ. 41 Nakai afi lɛ, eshi bo, lɛ kɛ ebii* ni fata ehe lɛ, ní eku esɛɛ kɛya ewekumɛi aŋɔɔ. Eku esɛɛ eyaŋɔ etsɛmɛi anii lɛ ekoŋŋ.+ 42 Ejaakɛ minyɔji ni mijie kɛje Ejipt shikpɔŋ lɛ nɔ ji amɛ.+ Amɛkahɔ̃ɔ amɛhe tamɔ ahɔ̃ɔ nyɔŋ lɛ. 43 Kaahã oyitsoŋ miiwa yɛ enɔ,+ ni she o-Nyɔŋmɔ lɛ gbeyei.+ 44 Onyɔji hii kɛ onyɔji yei lɛ afee mɛi ni jɛ maji ni bɔle nyɛ lɛ amli, amɛ amɛdɛŋ nyɛbaanyɛ nyɛhé nyɔji hii kɛ nyɔji yei yɛ. 45 Agbɛnɛ hu, nyɛbaanyɛ nyɛhé nyɔji yɛ gbɔi ni ebahi nyɛshikpɔŋ lɛ nɔ lɛ adɛŋ,+ amɛ kɛ amɛwekumɛi ni afɔ ahã amɛ yɛ nyɛshikpɔŋ lɛ nɔ lɛ adɛŋ nyɛbaanyɛ nyɛhé nyɔji yɛ, ni amɛbaatsɔmɔ nyɛnii. 46 Nyɛbaanyɛ nyɛshi amɛ nyɛhã nyɛbii* ni baaba yɛ nyɛsɛɛ lɛ akɛ amɛgboshinii, ni amɛtsɔ amɛnɔ kwraa. Nyɛbaanyɛ nyɛkɛ amɛ atsu nii akɛ apaafoi, shi nyɛkahãa nyɛyitseiaŋ miiwa yɛ nyɛnyɛmimɛi Israelbii lɛ anɔ.+

47 “‘Shi kɛ́ gbɔ ko loo mɔ ko ni ebahi nyɛshikpɔŋ lɛ nɔ lɛ batsɔ niiatsɛ ni onyɛmi batsɔ ohiafo yɛ emasɛi, ni ehe bahia ni ehɔ̃ɔ ehe ehã gbɔ lɛ loo mɔ ni ebahi nyɛshikpɔŋ lɛ nɔ loo gbɔ lɛ wekunyo ko lɛ, 48 no lɛ, be ni ehɔ̃ɔ ehe sɛɛ lɛ, eyɛ hegbɛ be fɛɛ be akɛ ekpɔ̃ɔ ehe. Enyɛmimɛi lɛ eko baanyɛ akpɔ̃ lɛ,+ 49 aloo etsɛkwɛ̃ loo etsɛkwɛ̃ binuu baanyɛ akpɔ̃ lɛ, aloo ewekunyo kpaakpa, ni ji mɔ ko ni jɛ eweku lɛ mli, baanyɛ akpɔ̃ lɛ.

“‘Aloo kɛ́ lɛ diɛŋtsɛ ebatsɔ niiatsɛ lɛ, no lɛ, lɛ diɛŋtsɛ hu ebaanyɛ ekpɔ̃ ehe.+ 50 Ekɛ mɔ ni hé lɛ lɛ abu be lɛ, kɛjɛ afi ni ehɔ̃ɔ ehe ehã lɛ lɛ nɔ kɛyashi Heyeli Afi+ lɛ nɔ, ni afii abɔ ni yɔɔ mli lɛ nɔ adamɔ abu eyi jara lɛ naa.+ Gbii ni ekɛtsu nii yɛ nakai be lɛ mli fɛɛ lɛ, adamɔ bɔ ni awoɔ apaafonyo nyɔmɔ lɛ nɔ akɛ lɛ hu aye nakai nɔŋŋ.+ 51 Kɛ́ eshwɛ afii babaoo lolo lɛ, no lɛ, ewo shika ni ekɛbaakpɔ̃ ehe lɛ yɛ afii abɔ ni eshwɛ lɛ naa. 52 Shi kɛ́ eshwɛ afii fioo pɛ ni Heyeli Afi lɛ baashɛ lɛ, no lɛ, ebu akɔntaa lɛ, ní ewo shika ni ekɛbaakpɔ̃ ehe lɛ yɛ afii abɔ ni eshwɛ lɛ naa. 53 Eya nɔ esɔmɔ lɛ afi fɛɛ afi akɛ apaafonyo; ni kwɛmɔ ní eyitsoŋ akawa yɛ enɔ.+ 54 Shi kɛ́ enyɛɛɛ etsɔ gbɛi nɛɛ anɔ ekpɔ̃ ehe lɛ, no lɛ, ebaaye ehe yɛ Heyeli Afi lɛ mli,+ lɛ kɛ ebii* ni fata ehe lɛ.

55 “‘Ejaakɛ mi diɛŋtsɛ minyɔji ji Israelbii lɛ. Minyɔji ni mijie kɛje Ejipt shikpɔŋ lɛ nɔ ji amɛ.+ Miji Yehowa, nyɛ-Nyɔŋmɔ lɛ.