Klɛŋklɛŋ Wolo Ni Akɛmaje Korintobii Lɛ

2 No hewɔ lɛ, nyɛmimɛi, be ni miba nyɛŋɔɔ lɛ, jeee wiemɔi wuji+ loo hiɛshikamɔ ni eteke nɔ mikɛba ni mibajaje Nyɔŋmɔ teemɔŋ sane krɔŋkrɔŋ+ lɛ mitsɔɔ nyɛ lɛ. 2 Ejaakɛ mikpɛ mli akɛ mileŋ nɔ ko yɛ nyɛteŋ akɛ ja Yesu Kristo, kɛ gbe ni agbe lɛ yɛ tso jaŋŋ lɛ nɔ lɛ pɛ.+ 3 Ni miba nyɛŋɔɔ akɛ mɔ ni he waaa, kɛ gbeyeishemɔ kɛ hekpokpomɔ babaoo; 4 ni miwiemɔi kɛ nɔ ni mishiɛ lɛ, jeee hiɛshikamɔ wiemɔi ni hãa mɔ yiŋ tsɔɔ mikɛtsu nii, shi moŋ wiemɔi ni jieɔ mumɔ kɛ hewalɛ kpo,+ 5 koni nyɛhemɔkɛyeli lɛ akadamɔ gbɔmɛi ahiɛshikamɔ nɔ, shi moŋ edamɔ Nyɔŋmɔ hewalɛ nɔ.

6 Agbɛnɛ, wɔwieɔ hiɛshikamɔ he yɛ mɛi ni he wa yɛ hemɔkɛyeli lɛ mli lɛ ateŋ,+ shi jeee je nɛɛ* mli hiɛshikamɔ loo je nɛɛ mli nɔyelɔi ni baaho aya lɛ ahiɛshikamɔ lɛ he wɔwieɔ.+ 7 Shi moŋ, wɔwieɔ Nyɔŋmɔ hiɛshikamɔ lɛ he yɛ teemɔŋ sane krɔŋkrɔŋ+ ni ji hiɛshikamɔ ni akɛto lɛ mli, hiɛshikamɔ ni Nyɔŋmɔ kpɛ mli eto dani ato je nɛɛ* shishi koni ekɛwo wɔhiɛ nyam lɛ. 8 Hiɛshikamɔ nɛɛ ji nɔ ni je nɛɛ* mli nɔyelɔi lɛ ateŋ mɔ kome folo po náaa ale lɛ,+ ejaakɛ eji amɛná amɛle kulɛ, amɛgbeŋ anunyam Nuŋtsɔ lɛ.* 9 Shi tamɔ bɔ ni aŋma lɛ, akɛ: “Nibii ni Nyɔŋmɔ esaa eto mɛi ni sumɔɔ lɛ lɛ, hiŋmɛi enako ni toi hu nuko, ni ebako gbɔmɔ ko hu tsui mli.”+ 10 Ejaakɛ wɔji mɛi ni Nyɔŋmɔ etsɔ emumɔ+ lɛ nɔ ejie kpo etsɔɔ wɔ,+ ejaakɛ mumɔ lɛ taoɔ nibii fɛɛ amli, Nyɔŋmɔ nibii ni mli kwɔlɔ lɛ po.+

11 Shi gbɔmɛi ateŋ namɔ le nibii ni gbɔmɔ kroko susuɔ he? Ani jeee nakai gbɔmɔ lɛ tsui* pɛ ni le nibii ni esusuɔ he? Nakai nɔŋŋ hu, mɔ ko mɔ ko leee Nyɔŋmɔ nibii lɛ, akɛ ja Nyɔŋmɔ mumɔ lɛ. 12 Agbɛnɛ, jeee bɔ ni je lɛ susuɔ nii ahe ehãa lɛ* akɛhã wɔ lɛ, shi moŋ mumɔ ni jɛ Nyɔŋmɔ ŋɔɔ lɛ,+ koni wɔle nibii ni Nyɔŋmɔ kɛdro wɔ lɛ. 13 Wɔwieɔ nibii nɛɛ hu ahe, jeee kɛ wiemɔi ni gbɔmɛi ahiɛshikamɔ tsɔɔ wɔ,+ shi moŋ nɔ ni mumɔ lɛ tsɔɔ wɔ lɛ,+ ni wɔkɛ wiemɔi ni mumɔ lɛ tsɔɔ wɔ lɛ gbálaa Nyɔŋmɔ he saji amli.*

14 Shi heloŋ gbɔmɔ* lɛ, emɔɔɔ Nyɔŋmɔ mumɔ lɛ nibii lɛ amli,* ejaakɛ amɛji kwashiai asane kɛhã lɛ; ni enyɛŋ nomɛi ele, ejaakɛ Nyɔŋmɔ mumɔ lɛ akɛtaoɔ nomɛi amli. 15 Shi mɔ ni hãa Nyɔŋmɔ mumɔ lɛ tsɔɔ lɛ gbɛ* lɛ, etaoɔ nibii fɛɛ amli,+ shi lɛ diɛŋtsɛ lɛ, mɔ ko mɔ ko taooo emli. 16 Ejaakɛ “namɔ ebale Yehowa* jwɛŋmɔ, ni eeetsɔɔ lɛ nii?”+ Shi wɔ lɛ, wɔyɛ Kristo jwɛŋmɔ lɛ.+