Lala. Lala ni Asaf fo.+
83 Ao Nyɔŋmɔ, kaafee diŋŋ;+
Ao Ŋwɛinyo, kaabu onaa ni kaadamɔ shi diŋŋ okwɛ.
2 Ejaakɛ naa! ohenyɛlɔi lɛ miifee hoo;+
Mɛi ni nyɛɔ bo lɛ, ehole amɛhe nɔ.
3 Amɛtsɔɔ ŋaa gbɛ nɔ amɛkpaŋɔ amɛshiɔ omaŋbii lɛ yɛ teemɔŋ;
Amɛkpaŋɔ amɛshiɔ mɛi ni jara wa kɛhã bo lɛ.
4 Amɛkɛɔ akɛ: “Nyɛbaa ni wɔkpãtãa jeŋmaŋ nɛɛ hiɛ,+
Koni akakai Israel gbɛ́i dɔŋŋ.”
5 Amɛfee ekome kɛto yiŋ;
Amɛkpaŋ amɛshi bo+—
6 Edom mama tsũi lɛ, kɛ Ishmaelbii lɛ, kɛ Moab,+ kɛ Hagribii+ lɛ,
7 Kɛ Gebal kɛ Amon+ kɛ Amalek, kɛ
Filistia+ kɛ mɛi ni yɔɔ Tiro+ lɛ.
8 Asiria+ hu eyafata amɛhe;
Amɛmiiye amɛmiibua Lot bii lɛ.+ (Sela)
9 Feemɔ amɛ tamɔ bɔ ni ofee Midian lɛ,+
Tamɔ bɔ ni ofee Sisera kɛ Yabin yɛ Kishon faa lɛ he lɛ.+
10 Akpãtã amɛhiɛ yɛ En-dor;+
Amɛtsɔmɔ tamɔ kooloi afei yɛ shikpɔŋ lɛ nɔ.
11 Feemɔ amɛbladei lɛ tamɔ bɔ ni ofee Oreb kɛ Zeeb lɛ,+
Kɛ amɛlumɛi lɛ hu tamɔ ofee Zeba kɛ Zalmuna lɛ,+
12 Ejaakɛ amɛkɛɛ akɛ: “Nyɛhãa wɔyaŋɔa shikpɔŋ ni Nyɔŋmɔ hiɔ nɔ lɛ.”
13 Ao mi-Nyɔŋmɔ, feemɔ amɛ tamɔ jwɛi ni miibɔle ehe,+
Tamɔ ŋmaa tsei ni kɔɔyɔɔ miitswa lɛ kɛmiiya kɛmiiba.
14 Bɔ ni la ni shãa koo,
Kɛ lalilɛi ni shãa gɔji ji lɛ,+
15 Nakai nɔŋŋ okɛ okɔɔyɔɔ ni naa wa lɛ atiu amɛ+
Ni okɛ ahum ni jɛ oŋɔɔ lɛ awo amɛhe gbeyei.+
16 Ao Yehowa, okɛ hiɛgbele aha amɛhiɛ,
Koni amɛtao ogbɛ́i lɛ sɛɛ gbɛ.
17 Amɛhiɛ agboi ni gbeyei amɔmɔ amɛ waa kɛya naanɔ;
Amɛhiɛ ashwie shi ni amɛhiɛ akpãtã;
18 Hã mɛi ale akɛ, bo ni ogbɛ́i ji Yehowa+ lɛ,
Bo okome too ji Mɔ Ni Nɔ Kwɔ Fe Fɛɛ yɛ shikpɔŋ lɛ nɔ fɛɛ.+