1 Maŋtsɛmɛi

17 Agbɛnɛ, Elia,*+ Tishbinyo lɛ ni jɛ Gilead+ shikpɔŋ lɛ nɔ lɛ kɛɛ Ahab akɛ: “Gbii abɔ ni Yehowa, Israel Nyɔŋmɔ lɛ ni misɔmɔɔ* lɛ lɛ hiɛ kã nɛɛ, bɔ́ loo nugbɔ enɛŋ yɛ afii ni nyiɛ sɛɛ nɛɛ amli ja mi miwie dã!”+

2 Yehowa kɛɛ lɛ* akɛ: 3 “Jee biɛ, ni otsɔ bokãgbɛ ni oyatee ohe yɛ Kerit Jɔɔ* lɛ mli, yɛ Yordan bokã. 4 Nuu faa lɛ mli nu lɛ eko, ni mafã kwaakwaalabitei koni amɛbahã bo niyenii yɛ jɛmɛ.”+ 5 Amrɔ nɔŋŋ ni eshi kɛtee tamɔ bɔ ni Yehowa ekɛɛ lɛ lɛ; etee ni eyahi Kerit Jɔɔ* lɛ he yɛ Yordan bokãgbɛ. 6 Ni kwaakwaalabitei lɛ bahãa lɛ blodo kɛ loo daa leebi kɛ blodo kɛ loo daa gbɛkɛ, ni enuɔ faa lɛ mli nu lɛ eko.+ 7 Shi gbii komɛi asɛɛ lɛ, faa lɛ gbi,+ ejaakɛ nugbɔ enɛɛɛ yɛ shikpɔŋ lɛ nɔ.

8 Kɛkɛ ni Yehowa kɛɛ lɛ* akɛ: 9 “Tee shi ni oya Zarefat, ni ji Sidonbii lɛ anɔ lɛ, ni oyahi jɛmɛ. Naa! Mibafã yoo okulafo ko yɛ jɛmɛ ni ehã bo niyenii.”+ 10 No hewɔ lɛ, ete shi ni etee Zarefat. Be ni eshɛ maŋ lɛ agbó lɛ naa lɛ, naa yoo okulafo ko ni miibua laitsei anaa. No hewɔ lɛ, etsɛ yoo lɛ ni ekɛɛ lɛ akɛ: “Ofainɛ, okɛ kɔɔpoo ayɛ nu fioo obahã mi koni manu.”+ 11 Be ni eyaa koni eyayɛ nu lɛ, Elia tsɛ eyisɛɛ ekɛɛ: “Ofainɛ, kɔ blodo kome ko ohiɛ odɛŋ obahã mi.” 12 Kɛkɛ ni yoo lɛ kɛɛ akɛ: “Gbii abɔ ni Yehowa, o-Nyɔŋmɔ lɛ hiɛ kã nɛɛ, mibɛ blodo ko; nɔ pɛ ni miyɔɔ ji ashikishaŋ dɛ̃ kɔkɔ kome yɛ gbɛ́ mli kɛ mu fioo yɛ gbɛ́ bibioo ko mli.+ Amrɔ nɛɛ miibua laitsei fioo komɛi anaa koni maya shĩa ni mikɛyafee nɔ ko mahã mi kɛ mibinuu lɛ. Kɛ́ wɔye wɔgbe naa lɛ, wɔbaagboi kɛ hɔmɔ.”

13 Kɛkɛ ni Elia kɛɛ lɛ akɛ: “Kaashe gbeyei. Yaa ni oyafee tamɔ bɔ ni okɛɛ lɛ. Shi okɛ nɔ ni oyɔɔ lɛ afee blodo kokloo kome ko ni okɛbahã mi dã. No sɛɛ koni ofee nɔ ko ohã bo kɛ obinuu lɛ. 14 Ejaakɛ nɔ ni Yehowa, Israel Nyɔŋmɔ lɛ kɛɛ nɛ: ‘Ashikishaŋ ni yɔɔ gbɛ́ lɛ mli lɛ etaŋ, ni mu ni yɔɔ gbɛ́ bibioo lɛ mli lɛ hu etaŋ kɛyashi Yehowa baahã nugbɔ anɛ yɛ shikpɔŋ lɛ nɔ.’”+ 15 No hewɔ lɛ, etee ni eyafee tamɔ bɔ ni Elia ekɛɛ lɛ lɛ, ni yoo lɛ kɛ Elia kɛ yoo lɛ shĩabii lɛ ye gbii babaoo.+ 16 Ashikishaŋ lɛ ni yɔɔ gbɛ́ lɛ mli lɛ etãaa, ni mu lɛ ni yɔɔ gbɛ́ bibioo lɛ mli lɛ hu etãaa tamɔ bɔ ni Yehowa tsɔ Elia nɔ ewie lɛ.

17 Nibii nɛɛ asɛɛ lɛ, yoo lɛ, ni ji shianyɛ lɛ binuu lɛ he baye, ni ehela lɛ mli bawa aahu akɛ egbo.*+ 18 Kɛkɛ ni yoo lɛ bi Elia akɛ: “Ao, anɔkwa Nyɔŋmɔ lɛ gbɔmɔ, mɛɛ efɔŋ mifee bo?* Ani oba biɛ koni obakai mi mitɔmɔi ni ogbe mibinuu lɛ?”+ 19 Shi ekɛɛ yoo lɛ akɛ: “Okɛ obinuu lɛ ahã mi.” Kɛkɛ ni ehe lɛ yɛ yoo lɛ dɛŋ ni ekɛ gbekɛ nuu lɛ tee ŋwɛitsu lɛ mli, he ni eyɔɔ lɛ, ni ekɛ lɛ yafɔ̃ lɛ Elia lɛ, diɛŋtsɛ saa nɔ.+ 20 Ebo etsɛ Yehowa ekɛɛ: “Ao Yehowa, mi-Nyɔŋmɔ,+ obaagbe yoo okulafo nɛɛ ni mibato lɛ gbɔ lɛ binuu lɛ ni okɛfee lɛ hu efɔŋ lo?” 21 Kɛkɛ ni ekpã emli ebu gbekɛ lɛ nɔ shii etɛ ni ebo etsɛ Yehowa akɛ: “Ao Yehowa, mi-Nyɔŋmɔ, ofainɛ, hã gbekɛ nɛɛ aba wala mli ekoŋŋ.”* 22 Kɛkɛ ni Yehowa bo Elia sɔlemɔ lɛ toi,+ ni gbekɛ lɛ ba wala mli ekoŋŋ,* ni ehiɛ tsɛ̃.+ 23 Elia wó gbekɛ lɛ ni ekɛ lɛ kpeleke shi kɛjɛ ŋwɛitsu lɛ mli kɛba shĩa lɛ mli ni ekɛ lɛ bahã emami; ni Elia kɛɛ: “Kwɛmɔ, obinuu lɛ hiɛ kã.”+ 24 Kɛkɛ ni yoo lɛ kɛɛ Elia akɛ: “Kpaako mina akɛ Nyɔŋmɔ gbɔmɔ ji bo lɛɛlɛŋ,+ ni Yehowa wiemɔ ni yɔɔ onaa lɛ, anɔkwale ni.”