Wolo Ni Akɛmaje Romabii Lɛ
7 Nyɛmimɛi, (ejaakɛ mɛi ni le mla mikɛwieɔ lɛ) ani nyɛleee akɛ Mla lɛ yeɔ gbɔmɔ nɔ nuŋtsɔ gbii abɔ ni eyɔɔ wala mli lɛ? 2 Akɛ nɔkwɛmɔnɔ lɛ, yoo ni yɔɔ wu lɛ, gbii abɔ ni ewu lɛ yɔɔ wala mli lɛ, mla efi lɛ ekpɛtɛ ewu lɛ he; shi kɛ́ ewu lɛ gbo lɛ, eye ehe kɛje ewu lɛ mla lɛ shishi.+ 3 No hewɔ lɛ, gbii abɔ ni ewu lɛ yɔɔ wala mli lɛ, kɛ́ etsɔ nuu kroko nɔ lɛ, abaatsɛ lɛ yoo gbalafitelɔ.+ Shi kɛ́ ewu lɛ gbo lɛ, eye ehe kɛje ewu lɛ mla lɛ shishi, ni no hewɔ lɛ, kɛ́ etsɔ nuu kroko nɔ lɛ, ejeee yoo gbalafitelɔ.+
4 No hewɔ lɛ, minyɛmimɛi, atsɔ Kristo lɛ gbɔmɔtso lɛ nɔ ahã nyɛye nyɛhe kɛje Mla lɛ shishi,* koni nyɛtsɔmɔ mɔ kroko nii,+ mɔ ni atee lɛ shi kɛjɛ gbohii ateŋ lɛ,+ koni wɔwo yibii wɔhã Nyɔŋmɔ.+ 5 Ejaakɛ be ni wɔhi shi yɛ heloo lɛ naa lɛ, eshai ahe akɔnɔi ni Mla lɛ tsĩɛ hiɛ lɛ tsu nii yɛ wɔgbɔmɔtsei lɛ* amli koni wɔwo yibii wɔhã gbele.+ 6 Shi amrɔ nɛɛ, ajie wɔ kɛje Mla lɛ shishi,+ ejaakɛ etsĩii wɔnaa dɔŋŋ,* koni wɔtsɔ mumɔ lɛ nɔ wɔtsɔmɔ nyɔji yɛ gbɛ hee nɔ,+ shi jeee yɛ gbɛ momo lɛ nɔ, ni ji yɛ mla ni aŋma lɛ naa.+
7 No hewɔ lɛ, te wɔbaakɛɛ tɛŋŋ? Ani Mla lɛ esha ni? Dabida! Anɔkwa, kɛjeee Mla lɛ kulɛ, mileee esha.+ Akɛ nɔkwɛmɔnɔ lɛ, eji Mla lɛ ekɛɛɛ akɛ: “Ohiɛ akakɔ̃ nii anɔ”+ kulɛ, mileee nɔ ni ji hiɛkɔ̃ɔ. 8 Shi esha tsɔ kitã lɛ nɔ etee hiɛkɔ̃i srɔtoi fɛɛ shi yɛ mimli, ejaakɛ kɛ́ mla bɛ lɛ, esha hu egbo.+ 9 Anɔkwa, mi lɛ mihi shi pɛŋ ni mibɛ mla. Shi be ni kitã lɛ ba lɛ, esha hiɛ tsɛ̃ ekoŋŋ, shi mi lɛ migbo.+ 10 Ni kitã ni akɛhã koni ekɛ mɔ aya wala mli lɛ,+ mina akɛ ekɛ mɔ yaa gbele mli. 11 Shi esha tsɔ kitã lɛ nɔ elaka mi, ni etsɔ no nɔ egbe mi. 12 No hewɔ lɛ, Mla lɛ yɛ krɔŋkrɔŋ, ni kitã lɛ yɛ krɔŋkrɔŋ ni eja ni ehi.+
13 No hewɔ lɛ, ani nɔ ni hi lɛ ji nɔ ni hã migbo lɛ? Dabida! Shi esha moŋ ni, koni no atsɔɔ akɛ esha miitsɔ nɔ ni hi lɛ nɔ eetsɛ gbele eehã mi,+ koni kɛtsɔ kitã lɛ nɔ lɛ, esha aje kpo faŋŋ akɛ nɔ ko ni ehiii kwraa.+ 14 Ejaakɛ wɔle akɛ Mla lɛ jɛ mumɔŋ, shi mi lɛ, heloŋ gbɔmɔ ji mi, ni ahɔ̃ɔ mi awo esha shishi.+ 15 Ejaakɛ minuuu nɔ ni mifeɔ lɛ shishi. Ejaakɛ nɔ ni misumɔɔ lɛ, jeee no mifeɔ, shi nɔ ni minyɛɔ lɛ, no moŋ mifeɔ. 16 Shi kɛ́ nɔ ni misumɔɔɔ lɛ moŋ mifeɔ lɛ, mikpɛlɛɔ nɔ akɛ Mla lɛ hi. 17 Shi amrɔ nɛɛ, jeee mi mifeɔ no dɔŋŋ, shi moŋ esha ni yɔɔ mimli lɛ ni feɔ.+ 18 Ejaakɛ mile akɛ yɛ mimli, ni ji, yɛ miheloo lɛ mli lɛ, nɔ kpakpa ko bɛ jɛmɛ; ejaakɛ mishweɔ akɛ mafee nɔ ni hi moŋ, shi mibɛ nyɛmɔ lɛ ni mikɛbaafee nɔ ni mishweɔ lɛ.+ 19 Ejaakɛ ekpakpa ni misumɔɔ lɛ, mifeee, shi nɔ gbonyo ni misumɔɔɔ lɛ, no moŋ mifeɔ. 20 No hewɔ lɛ, kɛ́ nɔ ni misumɔɔɔ lɛ moŋ mifeɔ lɛ, jeee mi mifeɔ no dɔŋŋ, shi moŋ esha ni yɔɔ mimli lɛ ni feɔ.
21 No hewɔ lɛ, minaa mla nɛɛ yɛ migbɛfaŋ akɛ: Kɛ́ miitao mafee nɔ ni ja lɛ, minaa nɔ gbonyo hu yɛ mimli.+ 22 Mimligbɛ gbɔmɔ lɛ náa Nyɔŋmɔ mla lɛ he miishɛɛ jogbaŋŋ,+ 23 shi minaa mla kroko yɛ migbɔmɔtso lɛ mli* ni wuɔ eshiɔ mijwɛŋmɔ mla lɛ,+ ni eŋɔɔ mi nom ehãa esha mla+ ni yɔɔ migbɔmɔtso lɛ mli* lɛ. 24 Gbɔmɔ ni nii yɔɔ mɔbɔ ji mi! Namɔ baajie mi kɛje gbɔmɔtso ni kɛ mi yaa nɛkɛ gbele nɛɛ mli lɛ dɛŋ? 25 Shidaa ahã Nyɔŋmɔ kɛtsɔ Yesu Kristo, wɔ-Nuŋtsɔ lɛ nɔ! No hewɔ lɛ, mi diɛŋtsɛ mikɛ mijwɛŋmɔ etsɔ Nyɔŋmɔ mla lɛ nyɔŋ, shi mikɛ miheloo etsɔ esha mla lɛ nyɔŋ.+