Rut
3 Agbɛnɛ, Naomi, ni ji Rut shaayoo lɛ kɛɛ lɛ akɛ: “Mibiyoo, esa akɛ matao he ko mahã bo ni ohi,*+ koni ahi ahã bo. 2 Ani jeee wɔwekunyo ji Boaz?+ Lɛ ji mɔ ni okɛ yei ni tsuɔ nii amɛhãa lɛ* lɛ yatsu nii lɛ. Ebaasha barle* mli gbɛkɛ nɛɛ yɛ ŋmaagbeemɔhe lɛ. 3 No hewɔ lɛ, ju ohe ni okpa mu ni jeɔ ŋma; ni osaa ohe* ni okpeleke shi kɛya ŋmaagbeemɔhe lɛ. Kaahã nuu lɛ na bo kɛyashi ebaaye nɔ ko ni ebaanu nɔ ko dã. 4 Kɛ́ eyakã shi lɛ, kadimɔ eshikamɔhe lɛ; ni oya ni oyakpa mama lɛ yɛ enaji ahe ni okã shi. Ebaatsɔɔ bo nɔ ni esa akɛ ofee.”
5 Kɛkɛ ni ekɛɛ akɛ: “Mafee nɔ fɛɛ nɔ ni okɛɛ mi lɛ.” 6 No hewɔ lɛ, ekpeleke shi kɛtee ŋmaagbeemɔhe lɛ, ni eyafee nɔ fɛɛ nɔ ni eshaayoo lɛ efã lɛ akɛ efee lɛ. 7 Agbɛnɛ, Boaz ye nɔ ko ni enu nɔ ko ni etsui nyɔ emli. Kɛkɛ ni etee eyakã shi yɛ barle* ni abua naa lɛ sɛɛ. No sɛɛ lɛ, yoo lɛ dɛkɛ shi kɛba ni ebakpa mama lɛ yɛ enaji ahe, ni eho ekã shi. 8 Ni eba mli akɛ, nyɔɔŋteŋ lɛ, nuu lɛ bɔi kpokpomɔ, ni ewó ehe nɔ ni ena akɛ yoo ko kã enajiashi. 9 Ebi akɛ: “Bo namɔŋ?” Yoo lɛ hã hetoo akɛ: “Mi, otsulɔ Rut. Lɛɛmɔ otade lɛ mli oha otsulɔ nɔ,* ejaakɛ kpɔ̃lɔ+ ji bo.” 10 Kɛkɛ ni ekɛɛ akɛ: “Yehowa ajɔɔ bo, mibiyoo. Nibii ni ofee tsutsu lɛ tsɔɔ akɛ oyɛ suɔmɔ ni tsakeee, shi nɔ ni ofee amrɔ nɛɛ hãa anaa osuɔmɔ ni tsakeee lɛ faŋŋ fe tsutsu lɛ po,+ ejaakɛ oyanyiɛɛɛ oblahii asɛɛ, ohiafoi jio, niiatsɛmɛi jio. 11 No hewɔ lɛ, agbɛnɛ mibiyoo, kaashe gbeyei. Mafee nɔ fɛɛ nɔ ni okɛɛ lɛ mahã bo,+ ejaakɛ mɔ fɛɛ mɔ ni yɔɔ maŋ lɛ mli lɛ* le akɛ yoo ni nɔ bɛ ji bo. 12 Eyɛ mli akɛ kpɔ̃lɔ+ ji mi moŋ, shi kpɔ̃lɔ kroko yɛ ni bɛŋkɛ nyɛ fe mi.+ 13 Hii biɛ nyɔɔŋ nɛŋ, ni kɛ́ je tsɛre ni eba ebakpɔ̃ bo lɛ, ehi! Ekpɔ̃ bo.+ Shi kɛ́ esumɔɔɔ akɛ ekpɔ̃ɔ bo lɛ, gbii abɔ ni Yehowa hiɛ kã nɛɛ, mi diɛŋtsɛ makpɔ̃ bo. Kã biɛ kɛyashi je baatsɛre.”
14 No hewɔ lɛ, ekã shi yɛ Boaz najiashi kɛyashi je tsɛre, ni ete shi dani jeŋ tse bɔ ni anyɛɔ ayoɔ mɔ. Kɛkɛ ni Boaz kɛɛ: “Kaahã mɔ ko le akɛ yoo ko ba ŋmaagbeemɔhe lɛ.” 15 Ekɛɛ hu akɛ: “Jiemɔ omama nɔhaanɔ lɛ kɛba ni olɛɛ mli.” No hewɔ lɛ, elɛɛ mli, ni nuu lɛ susu barle* susumɔnii ekpaa* ewo mli, ni ekɛtere lɛ, ni no sɛɛ lɛ, nuu lɛ tee maŋ lɛ mli.
16 No hewɔ lɛ, eyi gbɛ etee eshaayoo lɛ ŋɔɔ, ni eshaayoo lɛ bi lɛ akɛ: “Te etee lɛ tɛŋŋ,* mibiyoo?” Ni Rut gba lɛ nibii fɛɛ ni nuu lɛ fee ehã lɛ lɛ. 17 Ewie kɛfata he akɛ: “Esusu barle* susumɔnii ekpaa nɛɛ ehã mi, ni ekɛɛ mi akɛ, ‘Esaaa akɛ okɛ odɛ̃ folo kuɔ osɛɛ kɛyaa oshaayoo lɛ ŋɔɔ.’” 18 Kɛkɛ ni Naomi kɛɛ lɛ akɛ: “Ta biɛ, mibiyoo, kɛyashi obaana bɔ ni sane lɛ naa baayakpa ahã, ejaakɛ nuu lɛ ejɔŋ ehe, ja etsu sane lɛ he nii ŋmɛnɛ.”