Ezekiel
38 Yehowa kɛɛ mi ekoŋŋ akɛ: 2 “Gbɔmɔ bi,* tsɔ ohiɛ owo Gog ni jɛ Magog+ shikpɔŋ lɛ nɔ lɛ, mɔ ni ji Meshek kɛ Tubal+ lumɔnukpa lɛ ni ogba oshi lɛ.+ 3 Kɛɛmɔ akɛ, ‘Nɔ ni Nuŋtsɔ Ofe Yehowa kɛɛ nɛ: “Bo Gog, Meshek kɛ Tubal lumɔnukpa, naa, mikɛ bo ená. 4 Madɔ oyi ni mikɛ kpoji baawo okadai amli+ ni magbala bo kɛ osraafoi lɛ fɛɛ kɛje kpo,+ okpɔŋɔi kɛ okpɔŋɔnɔtaralɔi ni amɛ fɛɛ amɛwowoo atadei fɛfɛji, asafo kpele ni hiɛ tsɛŋi kɛ tsɛŋi bibii,* ni amɛ fɛɛ amɛhiɛ klante; 5 Persiabii, kɛ Etiopiabii, kɛ Putbii+ fata amɛhe, ni amɛ fɛɛ amɛhiɛ tsɛŋi bibii ni amɛbumɔ dade faii; 6 Gomer kɛ esraafoi lɛ fɛɛ, kɛ Togarma+ shĩa lɛ ni jɛ kooyigbɛ hei ni yɔɔ shɔŋŋshɔŋŋ lɛ kɛ esraafoi lɛ fɛɛ—majimaji babaoo fata ohe.+
7 “‘“Feemɔ klalo, saamɔ ohe oto, bo kɛ osraafoi lɛ fɛɛ ni ebua amɛhe naa yɛ omasɛi lɛ, ni obaafee amɛtatsɛ.*
8 “‘“Gbii pii asɛɛ lɛ abaagbala jwɛŋmɔ kɛba onɔ.* Yɛ afii lɛ anaagbee mli lɛ obaaya shikpɔŋ ni ajie enɔ bii lɛ kɛje klante ni kpãtãa nii ahiɛ lɛ dɛŋ ni aku sɛɛ akɛ amɛ eba lɛ nɔ, mɛi ni abua amɛnaa kɛjɛ majimaji babaoo amli kɛtee Israel gɔji ni kamɔ shi amaŋfɔ be kplaŋŋ nɛɛ anɔ lɛ. Akɛ mɛi ni yɔɔ shikpɔŋ nɛɛ nɔ lɛ ku sɛɛ kɛba kɛjɛ majimaji lɛ amli, ni amɛ fɛɛ amɛyɛ shweshweeshwe.+ 9 Obaaya amɛnɔ tamɔ kɔɔyɔɔ ni naa wa, ni obaaha shikpɔŋ lɛ nɔ tamɔ atatui, bo kɛ osraafoi lɛ fɛɛ kɛ majimaji babaoo ni fata ohe lɛ.”’
10 “Nɔ ni Nuŋtsɔ Ofe Yehowa kɛɛ nɛ: ‘Nakai gbi lɛ nɔ lɛ, susumɔi komɛi baaba otsui mli, ni obaatsɔ ŋaa fɔŋ ko. 11 Obaakɛɛ akɛ: “Maya shikpɔŋ ni enɔ shihilɛhei lɛ bɛ hebuu ko* lɛ nɔ.+ Mate shi mawo mɛi ni yɔɔ shweshweeshwe, ni nɔ ko nɔ ko gbaaa amɛnaa, mɛi ni amɛ fɛɛ amɛyɔɔ shihilɛhei ni gbogboi kɛ adabaŋi* kɛ agbói bɛ he ni baabu amɛhe lɛ.” 12 Obaaya koni oyaloo ta mli nii ni oshɔ̃ nibii babaoo kɛya, ni oyatutua hei ni no mli lɛ eji amaŋfɔi shi amrɔ nɛɛ mɛi yɔɔ jɛmɛ lɛ,+ kɛ mɛi ni abua amɛnaa kɛjɛ jeŋmaji lɛ amli+ ni miibua nii babaoo kɛ jwetrii anaa,+ mɛi ni yɔɔ shikpɔŋ lɛ teŋ lɛ.
13 “‘Sheba+ kɛ Dedan,+ Tarshish+ jarayelɔi lɛ kɛ etawulɔi* lɛ fɛɛ baakɛɛ bo akɛ: “Ani ooya koni oyaloo ta mli nii ni oshɔ̃ nibii babaoo kɛya? Ani obua osraafoi lɛ anaa koni nyɛyaloo jwiɛtɛi kɛ shika tsuru, nyɛyaloo nii babaoo kɛ jwetrii, loo ta mli nii babaoo kɛya lo?”’
14 “No hewɔ lɛ, gbɔmɔ bi, gbaa ni okɛɛ Gog akɛ, ‘Nɔ ni Nuŋtsɔ Ofe Yehowa kɛɛ nɛ: “Gbi ni mimaŋ Israel baahi shi shweshweeshwe lɛ, ani oleŋ?+ 15 Obaajɛ he ni oyɔɔ lɛ, yɛ kooyigbɛ hei ni yɔɔ shɔŋŋshɔŋŋ lɛ oba,+ bo kɛ majimaji babaoo ni fata ohe lɛ, amɛ fɛɛ amɛtara okpɔŋɔi anɔ, asafo babaoo, asraafoi pii diɛŋtsɛ.+ 16 Obaaba mimaŋ Israel nɔ tamɔ atatui haa shikpɔŋ lɛ nɔ lɛ. Bo Gog, yɛ gbii lɛ anaagbee mli lɛ, mahã ote shi owo mishikpɔŋ lɛ,+ koni mahã jeŋmaji lɛ ale mi, kɛ́ mitsɔ onɔ mifee mihe krɔŋkrɔŋ yɛ amɛhiɛ lɛ.”’+
17 “Nɔ ni Nuŋtsɔ Ofe Yehowa kɛɛ nɛ: ‘Ani jeee bo nɔŋŋ ohe sane mitsɔ mitsuji Israel gbalɔi lɛ anɔ miwie yɛ blema gbii lɛ amli lɛ, mɛi ni kɛ afii babaoo gba akɛ, akɛ bo baaba koni obate shi owo amɛ lɛ lo?’
18 “‘Nakai gbi lɛ nɔ lɛ, gbi ni Gog baaba Israel shikpɔŋ lɛ nɔ lɛ,’ Nuŋtsɔ Ofe Yehowa kɛɛ, ‘mimlila ni naa wa lɛ baate shi.+ 19 Mawie yɛ mihiɛdɔɔ lɛ mli, yɛ mimlifu la lɛ mli; ni nakai gbi lɛ, shikpɔŋhosomɔ kpele baaba Israel shikpɔŋ lɛ nɔ. 20 Ŋshɔŋ loi, kɛ ŋwɛi loofɔji, kɛ ŋa mli kooloi, kɛ kooloi ni wamɔɔ yɛ shikpɔŋ lɛ nɔ lɛ fɛɛ, kɛ gbɔmɛi fɛɛ ni yɔɔ shikpɔŋ lɛ nɔ lɛ baakpokpo yɛ mihewɔ, ni abaashɛrɛ gɔji lɛ atswia shi,+ ni tɛsai ni mamɔ shi kakadaji lɛ baagbeegbee shi, ni gbogbo fɛɛ gbogbo baakumɔ ashwie shi.’
21 “‘Matsɛ klante mawo lɛ yɛ migɔji lɛ fɛɛ anɔ,’ Nuŋtsɔ Ofe Yehowa kɛɛ. ‘Mɔ fɛɛ mɔ baawó klante nɔ yɛ lɛ diɛŋtsɛ enyɛmi nɔ.+ 22 Mikɛ tsɛŋemɔ hela ni gbeɔ mɔ kɛ lashishwiemɔ baakojo lɛ;*+ ni mahã nugbɔ babaoo, kɛ nyɔŋmɔŋtɛi,+ kɛ la,+ kɛ sɔlfa+ anɛ ashwie lɛ kɛ esraafoi lɛ kɛ majimaji babaoo ni fata ehe lɛ anɔ.+ 23 Ni bɔ fɛɛ bɔ ni fee lɛ, mafee mihe agbo, ni mafee mihe krɔŋkrɔŋ ni mahã ale mi yɛ jeŋmaji babaoo ahiɛ; ni amɛbaaná amɛle akɛ miji Yehowa.’