Nɔ Ni Yohane Ŋma
18 Be ni Yesu wie nibii nɛɛ sɛɛ lɛ, ekɛ ekaselɔi lɛ je kpo amɛyafo Kidron Jɔɔ*+ lɛ kɛtee he ni abɔɔ ko yɔɔ lɛ, ni ekɛ ekaselɔi lɛ bote mli.+ 2 Ni Yuda, mɔ ni jie lɛ ehã lɛ hu le jɛmɛ, ejaakɛ Yesu kɛ ekaselɔi lɛ fɔɔ kpee yɛ jɛmɛ. 3 No hewɔ lɛ, Yuda kɛ asraafoi kɛ bulɔi ni jɛ osɔfoi hiɛnaanɔbii lɛ kɛ Farisifoi lɛ aŋɔɔ lɛ ba jɛmɛ ni amɛhiɛhiɛ latsei kɛ kanei kɛ tawuu nii.+ 4 Ni Yesu lɛ, akɛni ele nibii fɛɛ ni baaba enɔ lɛ hewɔ lɛ, eba hiɛ ni ebi amɛ akɛ: “Namɔ nyɛtaoɔ?” 5 Amɛhã lɛ hetoo akɛ: “Yesu, Nazaretnyo lɛ.”+ Ekɛɛ amɛ akɛ: “Mi ni.” No mli lɛ, Yuda, mɔ ni jie lɛ ehã lɛ hu kɛ amɛ damɔ shi.+
6 Shi be ni Yesu kɛɛ amɛ akɛ, “Mi ni” lɛ, amɛtee sɛɛsɛɛ ni amɛyagbeegbee shi.+ 7 No hewɔ lɛ, ebi amɛ ekoŋŋ akɛ: “Namɔ nyɛtaoɔ?” Amɛkɛɛ: “Yesu, Nazaretnyo lɛ.” 8 Yesu hã hetoo akɛ: “Bɛ mikɛɛ nyɛ akɛ mi ni? No hewɔ lɛ, kɛji mi nyɛtaoɔ lɛ, nyɛhãa mɛnɛɛmɛi ayaa.” 9 Enɛ baahã nɔ ni ewie akɛ: “Mɛi ni okɛhã mi lɛ, mihãko amɛteŋ mɔ kome folo po alaaje” lɛ aba mli.+
10 Kɛkɛ ni Simon Petro ni no mli lɛ ehiɛ klante yɛ ehe lɛ, gbala eklante lɛ ni ekɛbã osɔfonukpa lɛ nyɔŋ lɛ, ni efo eninejurɔ toi.+ Nyɔŋ lɛ gbɛ́i ji Malko. 11 Shi Yesu kɛɛ Petro akɛ: “Okɛ klante lɛ awo ehebo lɛ mli.+ Kɔɔpoo ni Tsɛ lɛ kɛhã mi lɛ, ani esaaa akɛ minuɔ naa?”+
12 Kɛkɛ ni asraafoi lɛ kɛ tatsɛ lɛ kɛ bulɔi ni jɛ Yudafoi lɛ aŋɔɔ lɛ mɔ Yesu ni amɛfi lɛ. 13 Klɛŋklɛŋ lɛ, amɛkɛ lɛ tee Ana ŋɔɔ, ejaakɛ Kaiafa,+ ni ji osɔfonukpa yɛ nakai afi lɛ mli lɛ shaanuu ji lɛ.+ 14 Anɔkwa, Kaiafa ji mɔ ni wo Yudafoi lɛ ŋaa akɛ sɛɛnamɔ yɛ he kɛhã amɛ akɛ gbɔmɔ kome baagbo ehã maŋ lɛ.+
15 Agbɛnɛ, Simon Petro kɛ kaselɔ kroko hu nyiɛ Yesu sɛɛ.+ Osɔfonukpa lɛ le nakai kaselɔ lɛ, ni ekɛ Yesu bote osɔfonukpa lɛ kpo lɛ nɔ, 16 shi Petro damɔ agbó lɛ sɛɛ.* No hewɔ lɛ, kaselɔ kroko lɛ ni osɔfonukpa lɛ le lɛ lɛ je kpo, ni ekɛ shinaanaakwɛlɔ lɛ yawie, ni ekɛ Petro ba mli. 17 Kɛkɛ ni tsulɔ yoo, ni ji shinaanaakwɛlɔ lɛ bi Petro akɛ: “Bo hu nuu nɛɛ kaselɔi lɛ ateŋ mɔ kome ji bo, aloo jeee nakai?” Ekɛɛ akɛ: “Jeee amɛteŋ mɔ kome ji mi.”+ 18 Agbɛnɛ, nyɔji lɛ kɛ bulɔi lɛ kɛ ŋai eshɛre la ni amɛdamɔdamɔɔ he amɛmiiwere ejaakɛ fɛ̃i miiye. Petro hu kɛ amɛ damɔ shi ni eewere eko.
19 Agbɛnɛ, osɔfoi hiɛnaanɔbii lɛ ateŋ mɔ kome bi Yesu ekaselɔi lɛ kɛ etsɔɔmɔi lɛ he saji. 20 Yesu hã lɛ hetoo akɛ: “Miwieɔ mitsɔɔ je lɛ yɛ faŋŋ. Daa nɛɛ, mitsɔɔ nii yɛ kpeehei lɛ kɛ sɔlemɔ shĩa lɛ,+ he ni Yudafoi lɛ buaa amɛhe naa yɛ lɛ, ni miwieee nɔ ko yɛ teemɔŋ. 21 Mɛni hewɔ obiɔ mi sane? Bi mɛi ni enu nɔ ni mikɛ amɛ wie lɛ moŋ sane. Naa! Mɛnɛɛmɛi le nɔ ni mikɛɛ lɛ.” 22 Be ni ewie nibii nɛɛ sɛɛ lɛ, bulɔi lɛ ateŋ mɔ kome ni damɔ jɛmɛ lɛ gba Yesu hiɛ ma+ ni ekɛɛ: “Ani nakai esa akɛ ohã mɔ ko ni ji osɔfoi hiɛnaanɔbii lɛ ateŋ mɔ kome lɛ hetoo?” 23 Yesu hã lɛ hetoo akɛ: “Kɛ́ miwie efɔŋ ko lɛ, ye efɔŋ lɛ he odase; shi kɛ́ nɔ ni miwie lɛ ja lɛ, mɛni hewɔ ogbaa mi ma mɔ?” 24 Kɛkɛ ni Ana hã akɛ lɛ tee osɔfonukpa Kaiafa ŋɔɔ, no mli lɛ afi lɛ.+
25 Agbɛnɛ, Simon Petro damɔ jɛmɛ eewere la. Kɛkɛ ni amɛkɛɛ lɛ akɛ: “Bo hu ekaselɔi lɛ ateŋ mɔ kome ji bo, aloo jeee nakai?” Kɛkɛ ni etso, ni ekɛɛ: “Jeee amɛteŋ mɔ ko ji mi.”+ 26 Osɔfonukpa lɛ nyɔji lɛ ateŋ mɔ kome, ni ji mɔ ni Petro fo etoi lɛ wekunyo+ lɛ bi lɛ akɛ: “Mina bo kɛ lɛ yɛ abɔɔ lɛ mli, aloo minaaa bo?” 27 Shi Petro tso ekoŋŋ, ni amrɔ lɛ wuɔ gbɛɛ.+
28 Kɛkɛ ni amɛkɛ Yesu jɛ Kaiafa ŋɔɔ kɛtee amralo lɛ shĩa lɛ.+ No mli lɛ, leebi maŋkpa ni. Shi amɛ diɛŋtsɛ lɛ, amɛboteee amralo lɛ shĩa lɛ, bɔ ni afee ni amɛkabule amɛhe,+ shi moŋ koni amɛnyɛ amɛye Hehoo lɛ. 29 No hewɔ lɛ, Pilato je kpo kɛba amɛŋɔɔ ni ebi akɛ: “Mɛɛ sane nyɛkɛfɔ̃ɔ nuu nɛɛ nɔ?” 30 Amɛhã lɛ hetoo akɛ: “Eji nuu nɛɛ jeee efɔŋfeelɔ kulɛ, wɔkɛ lɛ ebahãŋ bo.” 31 No hewɔ lɛ, Pilato kɛɛ amɛ akɛ: “Nyɛ diɛŋtsɛ nyɛkɛ lɛ ayaa ni nyɛyakojoa lɛ yɛ nyɛmla lɛ naa.”+ Yudafoi lɛ kɛɛ lɛ akɛ: “Mla eŋmɛɛɛ gbɛ akɛ wɔgbeɔ mɔ ko.”+ 32 Enɛ baahã nɔ ni Yesu wie kɛtsɔɔ nɔ gbele ni eeba ebagbo lɛ aba mli.+
33 No hewɔ lɛ, Pilato bote amralo lɛ shĩa lɛ ekoŋŋ ni etsɛ Yesu ni ebi lɛ akɛ: “Ani bo ji Yudafoi lɛ a-Maŋtsɛ lɛ?”+ 34 Yesu hã hetoo akɛ: “Ani bo diɛŋtsɛ oyiŋ ojɛɔ obiɔ enɛ nɛɛ, aloo mɛi komɛi egba bo mihe sane?” 35 Pilato here nɔ ekɛɛ: “Jeee Yudanyo ji mi, aloo eko ji mi? Bo diɛŋtsɛ omaŋ kɛ osɔfoi hiɛnaanɔbii lɛ ji mɛi ni kɛ bo bahã mi. Mɛni ofee?” 36 Yesu hã hetoo akɛ:+ “Mi-Maŋtsɛyeli lɛ jɛɛɛ je nɛɛ mli.+ Eji mi-Maŋtsɛyeli lɛ jɛ je nɛɛ mli kulɛ, misɔɔlɔi lɛ baawu koni akɛ mi akahã Yudafoi lɛ.+ Shi tamɔ bɔ ni eji lɛ, mi-Maŋtsɛyeli lɛ jɛɛɛ biɛ.” 37 No hewɔ lɛ, Pilato bi lɛ akɛ: “No hewɔ lɛ, ani maŋtsɛ ji bo?” Yesu hã hetoo akɛ: “Bo diɛŋtsɛ ookɛɛ akɛ maŋtsɛ ji mi.+ Enɛ hewɔ afɔ mi, ni enɛ hewɔ miba je lɛ mli, koni mibaye anɔkwale lɛ he odase.+ Mɔ fɛɛ mɔ ni yɔɔ anɔkwale lɛ gbɛfaŋ lɛ boɔ migbee toi.” 38 Pilato bi lɛ akɛ: “Mɛni ji anɔkwale?”
Be ni ewie enɛ sɛɛ lɛ, eje kpo etee Yudafoi lɛ aŋɔɔ ekoŋŋ ni ekɛɛ amɛ akɛ: “Minaaa tɔmɔ ko yɛ ehe.+ 39 Agbɛnɛ hu, nyɛyɛ kusum ko akɛ miŋmɛɛ mɔ ko he mihã nyɛ yɛ Hehoo lɛ nɔ.+ No hewɔ lɛ, ani nyɛmiisumɔ ni maŋmɛɛ Yudafoi lɛ a-Maŋtsɛ lɛ he mahã nyɛ?” 40 Amɛbolɔ ekoŋŋ amɛkɛɛ: “Jeee nuu nɛɛ, shi moŋ Baraba!” Baraba lɛ, julɔ ni.+