Ezekiel
5 “Ni bo, gbɔmɔ bi,* kɔ klante ni naa ba ohã ohe, ni okɛtsu nii akɛ yikulɔ yishɛɛ kakla. Shɛɛ oyi kɛ otsɛŋ, ni no sɛɛ lɛ, kɔ nsɛnii ni oŋmɛ tsɔi lɛ tsiimɔ ni ojara mli. 2 Kɛ́ kawoo gbii lɛ ba naagbee lɛ, shãa tsɔi lɛ mlijai etɛ mli ekome yɛ la mli yɛ maŋ lɛ mli.+ No sɛɛ lɛ, kɔ mlijai etɛ lɛ mli ekome kroko, ni okɛ klante atswia lɛ kɛbɔle maŋ* lɛ he fɛɛ,+ ni ogbɛ mlijai etɛ lɛ mli ekome ni baashwɛ lɛ oshwã kɔɔyɔɔ lɛ mli, ni magbala klante kɛnyiɛ amɛsɛɛ.+
3 “Agbɛnɛ hu, jiemɔ tsɔi lɛ fioo ko ni okota owo otade lɛ naa. 4 Ni ojie ekomɛi hu ni oshɛrɛ amɛ owo la mli ni oshã amɛ. La baajɛ enɛ mli agbɛ ashwã Israel shĩa lɛ fɛɛ.+
5 “Nɔ ni Nuŋtsɔ Ofe Yehowa kɛɛ nɛ: ‘Yerusalem nɛ. Mikɛ lɛ ema jeŋmaji lɛ ateŋ, ni shikpɔji ebɔle ehe fɛɛ kɛkpe. 6 Shi etse miyiŋkpɛi* lɛ kɛ mimlai lɛ ahiɛ atua, efee efɔŋ fe jeŋmaji kɛ shikpɔji fɛɛ ni bɔle ehe lɛ.+ Ejaakɛ amɛyeee miyiŋkpɛi* lɛ anɔ, ni amɛnyiɛɛɛ yɛ mimlai lɛ amli.’
7 “No hewɔ lɛ, nɔ ni Nuŋtsɔ Ofe Yehowa kɛɛ nɛ: ‘Akɛni nyɛhe yɛ ahuntoo fe jeŋmaji ni ebɔle nyɛhe lɛ, ni nyɛnyiɛɛɛ yɛ mimlai lɛ amli, ni nyɛyeee miyiŋkpɛi* lɛ anɔ, shi moŋ nyɛye jeŋmaji ni bɔle nyɛhe lɛ ayiŋkpɛi* lɛ anɔ hewɔ lɛ,+ 8 nɔ ni Nuŋtsɔ Ofe Yehowa kɛɛ nɛ: “Bo maŋ, naa, mikɛ bo ená,+ ni mi diɛŋtsɛ magbala otoi yɛ jeŋmaji lɛ ahiɛ.+ 9 Mafee nɔ ni mifeko pɛŋ yɛ omli, ni mifeŋ nɔ ko tamɔ nakai hu dɔŋŋ, yɛ onifeemɔi ni yɔɔ nyaŋemɔ lɛ fɛɛ ahewɔ.+
10 “‘“No hewɔ lɛ, tsɛmɛi ni yɔɔ omli lɛ baaye amɛbihii,+ ni bihii hu baaye amɛtsɛmɛi, ni magbala mɛi ni yɔɔ omli lɛ atoi ni magbɛ mɛi ni baashwɛ yɛ omli lɛ fɛɛ mashwã he fɛɛ he.”’*+
11 “‘No hewɔ lɛ, gbii abɔ ni mihiɛ kã nɛɛ,’ Nuŋtsɔ Ofe Yehowa kɛɛ, ‘akɛni mijamɔhe lɛ ji he ni okɛ omagai ni yɔɔ nyaŋemɔ lɛ fɛɛ, kɛ onifeemɔi ni yɔɔ nyaŋemɔ lɛ fɛɛ bule hewɔ lɛ,+ mi hu makwa bo;* mihiŋmɛi enaŋ mɔbɔ, ni mimusuŋ hu eshãŋ mi.+ 12 Mɛi ni yɔɔ omli lɛ ateŋ mlijai etɛ mli ekome baagboi yɛ tsɛŋemɔ hela ni gbeɔ mɔ lɛ naa loo amɛhiɛ baakpãtã yɛ hɔmɔ naa. Ni amɛteŋ mlijai etɛ lɛ mli ekome kroko baanyɔ yɛ klante naa kɛbɔle bo.+ Ni magbɛ amɛteŋ mlijai etɛ lɛ mli ekome ni baashwɛ lɛ mashwã he fɛɛ he,* ni magbala klante kɛnyiɛ amɛsɛɛ.+ 13 Kɛkɛ lɛ mimlifu lɛ sɛɛ baafo, ni mimli ni ewo amɛ la lɛ naa baajɔ, ni mitsui baanyɔ mimli.+ Ni be ni miŋmɛɛ mimlila lɛ he mishwie amɛnɔ migbe naa lɛ, amɛbaaná amɛle akɛ mi, Yehowa, mi miwie yɛ suɔmɔ ni misumɔɔ ni ajá mikome too pɛ lɛ mli.+
14 “‘Mahã otsɔ amaŋfɔ kɛ hiɛgbejianii yɛ jeŋmaji ni ebɔle bo lɛ ateŋ kɛ mɔ fɛɛ mɔ ni tsɔɔ ohe kɛhoɔ lɛ hiŋmɛiiaŋ.+ 15 Ni be ni mikɛ mlifu, kɛ mlila, kɛ girimɔ egbala otoi lɛ, obaatsɔ hiɛgbejianii kɛ nii ni ayeɔ he fɛo,+ kɔkɔbɔɔ kɛ nii ni hãa mɔ he jɔ̃ɔ ehe kɛhã jeŋmaji ni ebɔle bo lɛ. Mi, Yehowa, mi miwie.
16 “‘Matsu hɔmɔ gãimlibii ni gbeɔ mɔ kɛya amɛŋɔɔ koni eyakpãtã amɛhiɛ. Gãimlibii ni matsu lɛ baakpãtã nyɛhiɛ.+ Mafo nyɛniyenii sɛɛ* koni ehã hɔmɔ lɛ naa awa ahã nyɛ.+ 17 Matsu hɔmɔ kɛ kooloi awuiyelɔi kɛba nyɛteŋ,+ ni amɛbaagbe nyɛbii lɛ. Tsɛŋemɔ hela ni gbeɔ mɔ kɛ lashishwiemɔ baaba nyɛnɔ, ni mikɛ klante hu baaba nyɛnɔ.+ Mi, Yehowa, mi miwie.’”