Ezra

9 Ni be ni agbe nibii nɛɛ naa nɔŋŋ lɛ, lumɛi lɛ ba miŋɔɔ ni amɛbakɛɛ: “Israelbii lɛ, kɛ osɔfoi lɛ, kɛ Levibii lɛ tseko amɛhe yɛ shikpɔji lɛ anɔ bii lɛ ahe, ni agbɛnɛ hu, amɛmiifee nibii ni yɔɔ nyaŋemɔ ni shikpɔji lɛ anɔ bii lɛ feɔ lɛ nɔŋŋ,+ ni ji nibii ni Kanaanbii lɛ, kɛ Hitbii lɛ, kɛ Perizbii lɛ, kɛ Yebusbii lɛ, kɛ Amonbii lɛ, kɛ Moabbii lɛ, kɛ Ejiptbii+ lɛ, kɛ Amorbii+ lɛ feɔ lɛ. 2 Amɛ kɛ amɛbihii lɛ kɛ shikpɔji lɛ anɔ bii lɛ abiyei lɛ ekomɛi ebote gbalashihilɛ mli.+ Ni agbɛnɛ, amɛ ni amɛji seshi* krɔŋkrɔŋ+ lɛ kɛ amɛhe eyafutu shikpɔji lɛ anɔ bii lɛ.+ Mɛi ni kɛ amɛhe ewo efɔŋfeemɔ nɛɛ mli titri ji lumɛi lɛ kɛ nɔkwɛlɔi lɛ.”

3 Ni be ni minu sane nɛɛ nɔŋŋ lɛ, migbála mitade lɛ kɛ mitade ni nine bɛ he lɛ, ni mifamɔ miyiteŋ tsɔi kɛ mitsɛŋshi tsɔi, ni minaa kpɛ mihe kɛta shi. 4 Ni mɔ fɛɛ mɔ ni sumɔɔ Israel Nyɔŋmɔ lɛ wiemɔi lɛ* badamɔ mimasɛi yɛ efɔŋ ni mɛi ni ejɛ nomŋɔɔ mli kɛba lɛ efee lɛ hewɔ, shi mi lɛ minaa kpɛ mihe kɛta shi aahu kɛyashi gbɛkɛnaashi ŋmaa* afɔleshaa+ be lɛ mli.

5 Kɛkɛ ni yɛ gbɛkɛnaashi ŋmaa afɔleshaa+ be lɛ mli lɛ, mite shi yɛ mihiɛgbele lɛ mli kɛ mitade kɛ mitade ni nine bɛ he ni egbála lɛ, ni mikula shi yɛ minakutsei anaa ni migbɛ minijiaŋ mitsɔɔ Yehowa, mi-Nyɔŋmɔ lɛ. 6 Ni mikɛɛ akɛ: “Ao mi-Nyɔŋmɔ, mihiɛ egbo ni eefee mi hiɛgbele akɛ mawó mihiɛ nɔ matsɔɔ bo, mi-Nyɔŋmɔ, ejaakɛ wɔhe eshai lɛ efa aahu kɛbashi wɔyiteŋ, ni wɔtɔmɔi lɛ ekwɔ aahu kɛyashi ŋwɛi.+ 7 Kɛjɛ wɔtsɛmɛi lɛ agbii lɛ amli aahu kɛbashi ŋmɛnɛ lɛ, wɔtɔmɔi lɛ efa babaoo;+ ni wɔtɔmɔi lɛ ahewɔ lɛ, akɛ wɔ, kɛ wɔmaŋtsɛmɛi lɛ, kɛ wɔsɔfoi lɛ ewo shikpɔji lɛ anɔ maŋtsɛmɛi lɛ adɛŋ, ni akɛ klante ekpãtã wɔhiɛ,+ ni aŋɔ wɔ nom,+ ni aloo wɔnibii yɛ ta mli,+ ni wɔhiɛ eshwie shi tamɔ bɔ ni eji ŋmɛnɛ gbi nɛɛ.+ 8 Shi be kukuoo nɛɛ mli lɛ, Yehowa, wɔ-Nyɔŋmɔ lɛ, edro wɔ ejaakɛ ebaa wɔteŋ mɛi fioo komɛi ayi, ni ehã wɔ he ko ni yɔɔ shweshweeshwe* yɛ ehe krɔŋkrɔŋ lɛ,+ koni ehã wɔhiŋmɛii anɔ atse, ni agbɛnɛ hu, koni ewaje wɔ fioo yɛ wɔnyɔŋyeli lɛ mli, Ao wɔ-Nyɔŋmɔ. 9 Eyɛ mli akɛ nyɔji ji wɔ moŋ,+ shi wɔ-Nyɔŋmɔ lɛ shiko wɔ yɛ wɔnyɔŋyeli lɛ mli; ejie esuɔmɔ ni tsakeee lɛ kpo etsɔɔ wɔ yɛ Persia maŋtsɛmɛi lɛ ahiɛ,+ koni ewaje wɔ ni wɔma wɔ-Nyɔŋmɔ lɛ shĩa lɛ,+ koni wɔsaa eshĩa lɛ ni ekumɔ lɛ, koni ehã wɔná gbogbo ni akɛ tɛ etswa* yɛ Yuda kɛ Yerusalem.

10 “Shi agbɛnɛ, wɔ-Nyɔŋmɔ, mɛni wɔbaanyɛ wɔkɛɛ yɛ enɛ fɛɛ sɛɛ? Ejaakɛ wɔshi okitãi lɛ asɛɛ, 11 kitãi ni otsɔ otsuji gbalɔi lɛ anɔ okɛhã wɔ okɛɛ: ‘Shikpɔŋ ni nyɛyaaŋɔ lɛ ji shikpɔŋ ni nɔ tseee, ejaakɛ shikpɔji lɛ anɔ bii lɛ ahe tseee, ni agbɛnɛ hu enɔ tseee yɛ nibii ni yɔɔ nyaŋemɔ ni shikpɔji lɛ anɔ bii lɛ efee kɛwo shikpɔŋ lɛ nɔ fɛɛ muji kɛjɛ afã kome kɛyashi afã kroko lɛ hewɔ.+ 12 No hewɔ lɛ, nyɛkɛ nyɛbiyei lɛ akahãa amɛbihii lɛ, ni nyɛkaŋɔa amɛbiyei hu nyɛhãa nyɛbihii;+ ni nyɛkafea nɔ ko ni baahã amɛná toiŋjɔlɛ ni amɛshwere,+ koni nyɛhe awa ni nyɛye shikpɔŋ lɛ nɔ nii kpakpai lɛ, ni shikpɔŋ lɛ atsɔ nyɛ kɛ nyɛbii lɛ anɔ kɛya naanɔ.’ 13 Ni yɛ nibii ni eba wɔnɔ yɛ nibii gbohii ni wɔfee kɛ nibii fɔji babaoo ni wɔfee lɛ fɛɛ sɛɛ lɛ—ejaakɛ bo, wɔ-Nyɔŋmɔ, okɛ wɔ yeko yɛ wɔtɔmɔi lɛ anaa,+ ni obaa wɔ mɛi ni wɔyɔɔ biɛ lɛ ayi+— 14 ani esa akɛ wɔje okitãi lɛ asɛɛ ekoŋŋ ni wɔkɛ mɛi ni feɔ nyaŋemɔ nibii nɛɛ abote gbalashihilɛ mli?+ Ani omli fuŋ wɔ aahu kɛyashi be ni obaakpãtã wɔ fɛɛ wɔhiɛ ni oshiii mɔ ko loo obaaa mɔ ko yi? 15 Ao Yehowa, Israel Nyɔŋmɔ, oja,+ ejaakɛ obaa wɔ yi kɛbashi ŋmɛnɛ gbi nɛɛ. Amrɔ nɛɛ wɔba ohiɛ yɛ wɔhe eshai lɛ ahewɔ, ejaakɛ anyɛŋ adamɔ ohiɛ kɛ enɛ.”+