3 Mose
19 Yehowa tee nɔ ekɛ Mose wie ekɛɛ: 2 “Okɛ Israel maŋ muu lɛ fɛɛ awie ni okɛɛ amɛ akɛ, ‘Nyɛfea krɔŋkrɔŋ, ejaakɛ mi Yehowa, nyɛ-Nyɔŋmɔ lɛ, miyɛ krɔŋkrɔŋ.+
3 “‘Nyɛteŋ mɔ fɛɛ mɔ abu emami kɛ epapa,*+ ni nyɛyea mihejɔɔmɔ gbii+ lɛ hu. Miji Yehowa, nyɛ-Nyɔŋmɔ lɛ. 4 Nyɛkayanyiɛa nyɔŋmɔi ni he bɛ sɛɛnamɔ asɛɛ,+ ni nyɛkɛ dade akafea nyɔŋmɔi+ nyɛhãa nyɛhe. Miji Yehowa, nyɛ-Nyɔŋmɔ lɛ.
5 “‘Agbɛnɛ, kɛ́ nyɛkɛ naanyobɔɔ afɔle miihã Yehowa lɛ,+ nyɛfea lɛ bɔ ni baahã nyɛná ehiɛ dromɔ.+ 6 Aye yɛ gbi ni nyɛkɛ nyɛfɔle lɛ hãa lɛ nɔ nɔŋŋ kɛ enɔ jetsɛremɔ, shi nɔ ni baashwɛ kɛyashi gbi ni ji etɛ lɛ nɔ lɛ, ashã yɛ la mli.+ 7 Shi kɛ́ aye afɔle lɛ eko yɛ gbi ni ji etɛ lɛ nɔ lɛ, nihiinii ni, ni anáŋ he miishɛɛ. 8 Mɔ ni yeɔ eko lɛ, ehe sɔ̃ baakã enɔ, ejaakɛ ebule Yehowa nibii krɔŋkrɔŋi lɛ eko, ni nakai mɔ* lɛ, afo lɛ ashɛ afɔ̃* kɛje emaŋbii lɛ ateŋ.
9 “‘Kɛ́ nyɛmiikpa nyɛshikpɔŋ lɛ nɔ nibaa nii lɛ, kaakpa nɔ ni yɔɔ oŋmɔ lɛ naabunaabu lɛ fɛɛ kɛmɔ shi, ni onikpamɔnii lɛ amli nɔ ni baashwɛ lɛ hu, kaakpa.*+ 10 Agbɛnɛ hu, kaakpa owain ŋmɔ lɛ mli yibii ni baashwɛ lɛ, ni owain ŋmɔ lɛ mli yibii ni shwie shi lɛ hu, kaaloo. Shi ohã ohiafo*+ kɛ gbɔ. Miji Yehowa, nyɛ-Nyɔŋmɔ lɛ.
11 “‘Nyɛkajua,+ nyɛkalakaa mɔ ko,+ ni nyɛteŋ mɔ ko akashishiu enaanyo. 12 Nyɛkɛ migbɛ́i lɛ akakãa amale kitã,+ ní nyɛkɛbule nyɛ-Nyɔŋmɔ lɛ gbɛ́i lɛ. Miji Yehowa lɛ. 13 Nyɛkashishiua nyɛnyɛmi gbɔmɔ,+ ni nyɛkajua.*+ Nyɛkatsĩa apaafonyo nyɔmɔwoo naa jenamɔ muu fɛɛ kɛyashi enɔ leebi.+
14 “‘Kaalomɔ* toimulɔ, ni okɛ nɔ ko akama shwilafo gbɛ nɔ,+ ni she o-Nyɔŋmɔ lɛ gbeyei.+ Miji Yehowa lɛ.
15 “‘Nyɛkatsɔa sane hiɛ nyɛbua shi kɛ́ nyɛmiikojo. Nyɛkakwɛa hiɛiaŋ ni nyɛye sane nyɛhã ohiafo aloo nyɛye sane nyɛhã niiatsɛ.+ Nyɛkojoa nyɛnyɛmi gbɔmɔ yɛ jalɛ naa.
16 “‘Kaanyiɛ ni oowie mɔ ko he efɔŋ yɛ omaŋbii lɛ ateŋ.+ Kaate shi oshi onyɛmi gbɔmɔ wala* kɔkɔɔkɔ.*+ Miji Yehowa lɛ.
17 “‘Kaanyɛ onyɛmi yɛ otsui mli.+ Bɔ fɛɛ bɔ ni fee lɛ, jajemɔ onyɛmi gbɔmɔ,+ koni okɛ lɛ fɛɛ akafee esha.
18 “‘Kaatɔ owele,+ ni kaabɛ omaŋbii lɛ ateŋ mɔ ko owo omli; suɔmɔ onyɛmi gbɔmɔ tamɔ bo diɛŋtsɛ ohe.+ Miji Yehowa lɛ.
19 “‘Nyɛyea mimlai nɛɛ anɔ: Kaahã oshĩa kooloi srɔtoi enyɔ miifutu kɛmiikwɔ amɛhe. Kaadu wui srɔtoi enyɔ yɛ oŋmɔ mli,+ ni kaawo atade ni akɛ kpãi srɔtoi enyɔ futu kɛfee.+
20 “‘Agbɛnɛ, kɛ́ nuu ko kɛ yoo ko ná bɔlɛ ni yoo lɛ ji tsulɔ yoo ni ato akɛ akɛ lɛ baahã nuu kroko, shi akpɔ̃ko lɛ loo ahãko eye ehe lɛ, agbala amɛtoi. Shi akagbe amɛ, ejaakɛ ahãko yoo lɛ aye ehe. 21 Nuu lɛ kɛ esɔ̃ afɔle abahã Yehowa yɛ kpee buu lɛ shinaa lɛ naa; ekɛ gwantɛŋnuu aba akɛ sɔ̃ afɔle.+ 22 Osɔfo lɛ kɛ sɔ̃ afɔle gwantɛŋnuu lɛ akpãtã ahã lɛ yɛ Yehowa hiɛ, yɛ esha ni efee lɛ hewɔ, ni akɛ esha ni efee lɛ baake lɛ.
23 “‘Kɛ́ nyɛbashɛ shikpɔŋ lɛ nɔ ni nyɛdu* yelitso ko lɛ, nyɛbua eyibii lɛ akɛ ehe tseee ni aahi. Nyɛbua lɛ akɛ nɔ ni aahi kɛyashi afii etɛ. Nyɛkayea. 24 Shi yɛ afi ni ji ejwɛ lɛ mli lɛ, eyibii lɛ fɛɛ baafee krɔŋkrɔŋ, ni ebaafee be ni akɛbaaná miishɛɛ waa yɛ Yehowa hiɛ.+ 25 Kɛkɛ lɛ, yɛ afi ni ji enumɔ lɛ mli lɛ, nyɛbaanyɛ nyɛye eyibii lɛ, bɔ ni afee ni eyibii lɛ afa babaoo ahã nyɛ. Miji Yehowa, nyɛ-Nyɔŋmɔ lɛ.
26 “‘Nyɛkayea nɔ ko ni lá yɔɔ mli.+
“‘Nyɛkabia nii,* ni nyɛkafea majik.+
27 “‘Nyɛkashɛa* tsɔi ni yɔɔ nyɛtoishi kɛbashi nyɛtsɛŋ he* lɛ, ni nyɛkakua nyɛtsɛŋ naa ni nyɛkɛfite lɛ.+
28 “‘Nyɛkafolɔa nyɛhewolo nɔ gbɛ̃i yɛ mɔ ko ni egbo* hewɔ,+ ni nyɛkafea tatuu yɛ nyɛhewolo nɔ. Miji Yehowa lɛ.
29 “‘Kaahã obiyoo miifee ashawo+ ni okɛshwie ehiɛ shi, koni shikpɔŋ lɛ kɛ ehe akawo ashawofeemɔ mli ní enɔ bayi obɔ kɛ jeŋbai gbohii.+
30 “‘Nyɛyea mihejɔɔmɔ gbii+ lɛ, ni nyɛkɛ woo ahãa mijamɔhe lɛ.* Miji Yehowa lɛ.
31 “‘Nyɛkayaa mumɔi atsɛlɔi aŋɔɔ,+ ni nyɛkabia klamɔfoi+ anii ni no hã nyɛwo nyɛhe muji. Miji Yehowa, nyɛ-Nyɔŋmɔ lɛ.
32 “‘Tee shi yɛ wajiatsɛ hiɛ,+ okɛ woo ahã mɔ ni egbɔ,+ ní oshe o-Nyɔŋmɔ lɛ gbeyei.+ Miji Yehowa lɛ.
33 “‘Kɛ́ gbɔ ko bato nyɛ gbɔ yɛ nyɛshikpɔŋ lɛ nɔ lɛ, nyɛkafea lɛ niseniianii.+ 34 Gbɔ ni ebato nyɛ gbɔ lɛ, nyɛbua lɛ tamɔ nyɛmaŋnyo;+ ni suɔmɔ lɛ tamɔ bo diɛŋtsɛ ohe, ejaakɛ nyɛ hu nyɛyahi Ejipt shikpɔŋ lɛ nɔ akɛ gbɔi.+ Miji Yehowa, nyɛ-Nyɔŋmɔ lɛ.
35 “‘Nyɛkɛ susumɔnii ni ejaaa akasusua nibii akɛlɛmɔ, nibii atsiimɔ, loo nibii afalɛ.+ 36 Nyɛkɛ nsɛnii ni ja kɛ nsɛni tɛi ni ja kɛ nibii gbiji asusumɔnii ni ja* kɛ nu* susumɔnii ni ja* atsua nii.+ Miji Yehowa, nyɛ-Nyɔŋmɔ ni jie nyɛ kɛjɛ Ejipt shikpɔŋ lɛ nɔ kɛba lɛ. 37 No hewɔ lɛ, nyɛyea mimlai lɛ fɛɛ kɛ miyiŋkpɛi* lɛ fɛɛ anɔ, ni nyɛkɛtsua nii.+ Miji Yehowa lɛ.’”