3 Mose
24 Yehowa tee nɔ ekɛ Mose wie ekɛɛ: 2 “Fã Israelbii lɛ ní amɛkɛ oliv mu krɔŋŋ ni akɛ oliv yibii ni ashi* fee abahã bo ní akɛwo kanei lɛ amli kɛsu, koni kanei lɛ atso be fɛɛ be.+ 3 Aaron akwɛ koni kanei lɛ atso be fɛɛ be kɛjɛ gbɛkɛ kɛyashi leebi yɛ Yehowa hiɛ, yɛ Odaseyelinɔ pateeshɛŋ lɛ hiɛgbɛ, yɛ kpee buu lɛ mli. Eji mla ni kã shi daa hã nyɛyinɔi lɛ fɛɛ. 4 Eto kanei lɛ ahe gbɛjianɔ yɛ shika tsuru krɔŋŋ kanetso+ lɛ nɔ yɛ Yehowa hiɛ be fɛɛ be.
5 “Okɛ ashikishaŋ kpakpa afee blodoi 12 ni abɔlɔ lɛ tamɔ gai. Okɛ efa mlijai nyɔŋma mli enyɔ* afee blodoi lɛ eko fɛɛ eko. 6 Too blodoi lɛ kui enyɔ bɔ ni eko kã eko nɔ yɛ shika tsuru krɔŋŋ okpɔlɔ lɛ nɔ yɛ Yehowa hiɛ,+ blodoi ekpaa ahi kuu fɛɛ kuu mli.+ 7 Okɛ frankinsɛnsi krɔŋŋ ashwie kuu fɛɛ kuu nɔ, ni no baafee blodo ni akɛbaahã akɛ kaimɔ afɔle*+ ni akɛ la shãa ahãa Yehowa. 8 Eto yɛ Yehowa hiɛ be fɛɛ be,+ yɛ Hejɔɔmɔ Gbi fɛɛ Hejɔɔmɔ Gbi nɔ. Eji kpaŋmɔ ni kã shi daa yɛ mi kɛ Israelbii lɛ ateŋ. 9 Etsɔ Aaron kɛ ebihii lɛ anɔ,+ ni amɛye yɛ he ko ni yɔɔ krɔŋkrɔŋ,+ ejaakɛ eji afɔlei ni akɛ la shãa ahãa Yehowa lɛ amli nɔ ko ni yɔɔ krɔŋkrɔŋ fe fɛɛ kɛhã lɛ. Eji mla* ni kã shi daa.”
10 Agbɛnɛ, nuu ko yɛ Israelbii lɛ ateŋ ni eji Israel yoo ko binuu ni ekɛ Ejiptnyo ko fɔ,+ ni ekɛ nuu ko ni ji Israelnyo nɔ yɛ nsara lɛ mli. 11 Israel yoo lɛ binuu lɛ wie Gbɛ́i lɛ* he wiemɔ fɔŋ, ni elomɔ* Gbɛ́i lɛ.+ No hewɔ lɛ, akɛ lɛ ba Mose ŋɔɔ.+ Emami ji Shelomit, ni ji Dibri ni jɛ Dan weku lɛ mli lɛ biyoo lɛ. 12 Amɛtsĩ enaa amɛwo he ko kɛyashi be ni Yehowa yiŋkpɛɛ yɛ sane lɛ he lɛ fee faŋŋ ehã amɛ.+
13 Ni Yehowa kɛɛ Mose akɛ: 14 “Okɛ mɔ ni lomɔ lɛ aje kpo kɛya nsara lɛ sɛɛ, ni mɛi fɛɛ ni nu akɛ eelomɔ lɛ kɛ amɛniji ashwie eyiteŋ, ni no sɛɛ lɛ, maŋ muu lɛ fɛɛ atswia lɛ tɛi.+ 15 Ni kɛɛmɔ Israelbii lɛ akɛ, ‘Kɛ́ mɔ ko lomɔ e-Nyɔŋmɔ lɛ, ehe esha lɛ he sɔ̃ lɛ baakã enɔ. 16 No hewɔ lɛ, mɔ ni wieɔ Yehowa gbɛ́i lɛ he wiemɔ fɔŋ lɛ, bɔ fɛɛ bɔ ni fee lɛ, agbe lɛ.+ Bɔ fɛɛ bɔ ni fee lɛ, maŋ muu lɛ fɛɛ atswia lɛ tɛi. Gbɔ ni jio, maŋnyo ni jio, kɛ́ ewie Gbɛ́i lɛ he wiemɔ fɔŋ lɛ, agbe lɛ.
17 “‘Kɛ́ mɔ ko kpãtã gbɔmɔ ko wala hiɛ* lɛ, bɔ fɛɛ bɔ ni fee lɛ, agbe lɛ.+ 18 Mɔ fɛɛ mɔ ni tswaa shĩa kooloo ko nɔ ni egboɔ* lɛ, eto najiaŋ, akɛ wala ato wala najiaŋ.* 19 Kɛ́ mɔ ko pila enyɛmi gbɔmɔ lɛ, no lɛ, nɔ ni efee mɔ lɛ, lɛ hu afee lɛ eko.+ 20 Aku wu kɛto wu ni eku najiaŋ, akɛ hiŋmɛi ato hiŋmɛi najiaŋ, nyanyɔŋ yɛ nyanyɔŋ najiaŋ, nɔ pilamɔ ni epila mɔ lɛ, apila lɛ eko pɛpɛɛpɛ kɛtse.+ 21 Mɔ ni tswaa kooloo nɔ ni egboɔ lɛ, eto najiaŋ,+ shi mɔ ni tswaa gbɔmɔ nɔ ni egboɔ lɛ, agbe lɛ.+
22 “‘Yiŋkpɛɛ* kome too lɛ nɔŋŋ akã shi ahã nyɛ, gbɔ jio, maŋnyo jio,+ ejaakɛ miji Yehowa, nyɛ-Nyɔŋmɔ lɛ.’”
23 Kɛkɛ ni Mose kɛ Israelbii lɛ wie, ni amɛkɛ mɔ ni lomɔ lɛ je kpo kɛtee nsara lɛ sɛɛ, ni amɛyatswia lɛ tɛi.+ No hewɔ lɛ, Israelbii lɛ fee bɔ ni Yehowa fã Mose lɛ pɛpɛɛpɛ.