3 Mose

27 Yehowa tee nɔ ekɛ Mose wie ekɛɛ: 2 “Okɛ Israelbii lɛ awie ni okɛɛ amɛ akɛ, ‘Kɛ́ mɔ ko wo shi krɛdɛɛ+ ko akɛ ekɛ gbɔmɔ ko yi jara ni atsɔɔ lɛ baahã Yehowa lɛ, 3 no lɛ, kɛ́ mɔ lɛ eye kɛjɛ afii 20 kɛyashi 60 ni nuu ni lɛ, eyi jara lɛ afee jwiɛtɛi shekeli* 50 yɛ shekel ni akɛtsuɔ nii yɛ he krɔŋkrɔŋ lɛ naa.* 4 Shi kɛ́ yoo ni lɛ, eyi jara lɛ afee shekeli 30. 5 Kɛ́ mɔ lɛ eye kɛjɛ afii 5 kɛyashi 20 ni nuu ni lɛ, eyi jara lɛ afee shekeli 20, ni kɛ́ yoo ni lɛ, eyi jara lɛ afee shekeli 10. 6 Kɛ́ mɔ lɛ eye kɛjɛ nyɔɔŋ kome kɛyashi afii enumɔ ni nuu ni lɛ, eyi jara lɛ afee jwiɛtɛi shekeli enumɔ, ni kɛ́ yoo ni lɛ, eyi jara lɛ afee jwiɛtɛi shekeli etɛ.

7 “‘Kɛ́ mɔ lɛ eye kɛjɛ afii 60 kɛyaa ni nuu ni lɛ, eyi jara lɛ afee shekeli 15, ni kɛ́ yoo ni lɛ, eyi jara lɛ afee shekeli 10. 8 Shi kɛ́ mɔ lɛ miiye ohia waa, ni enyɛɛɛ ewo jara ni atsɔɔ lɛ,+ no lɛ, eyadamɔ osɔfo lɛ hiɛ ní osɔfo lɛ awo eyi jara. Osɔfo lɛ adamɔ nɔ ni mɔ ni woɔ shi lɛ baanyɛ ahã lɛ nɔ ewo jara lɛ.+

9 “‘Kɛ́ nɔ ni awo shi akɛ akɛbaahã lɛ ji kooloo ni abaanyɛ akɛshã afɔle ahã Yehowa lɛ, no lɛ, eko fɛɛ eko ni akɛbaahã Yehowa lɛ baatsɔ nɔ krɔŋkrɔŋ. 10 Mɔ lɛ kɛ ekroko akaye najiaŋ, ni ekɛ nɔ ni hi akatsake nɔ ni ehiii, ni ekɛ nɔ ni ehiii hu akatsake nɔ ni hi. Shi kɛ́ eba lɛ akɛ ekɛ kooloo kroko aaatsake klɛŋklɛŋ kooloo lɛ, no lɛ, klɛŋklɛŋ kooloo lɛ kɛ nɔ ni akɛtsakeɔ lɛ lɛ fɛɛ baatsɔmɔ nii krɔŋkrɔŋ. 11 Kɛ́ kooloo lɛ ji nɔ ni he tseee+ ni anyɛŋ akɛshã afɔle ahã Yehowa lɛ, no lɛ, ekɛ kooloo lɛ ayadamɔ osɔfo lɛ hiɛ. 12 Ni osɔfo lɛ akwɛ kɛji kooloo lɛ ji nɔ ni hi loo nɔ ni ehiii, ni edamɔ no nɔ etsɔɔ ejara. Jara ni osɔfo lɛ baatsɔɔ lɛ, no akɛtsu nii. 13 Shi kɛ́ eba lɛ akɛ eetao ekpɔ̃ kooloo lɛ, no lɛ, ekɛ ejara lɛ mlijai enumɔ mli ekome afata jara lɛ he kɛhã.+

14 “‘Agbɛnɛ, kɛ́ mɔ ko jɔɔ eshĩa nɔ eke* Yehowa akɛ nɔ krɔŋkrɔŋ lɛ, no lɛ, osɔfo lɛ akwɛ kɛ́ eji shĩa kpakpa loo ejeee ekpakpa, ní edamɔ no nɔ etsɔɔ ejara. Jara ni osɔfo lɛ baatsɔɔ lɛ, no baafee shĩa lɛ jara.+ 15 Shi kɛ́ mɔ ni jɔɔ eshĩa lɛ nɔ eke lɛ miitao ekpɔ̃ shĩa lɛ, no lɛ, ekɛ jara ni atsɔɔ lɛ mlijai enumɔ mli ekome afata jara lɛ he kɛhã, ni ebaatsɔ enɔ.

16 “‘Kɛ́ mɔ ko jɔɔ shikpɔŋ ni eyɔɔ lɛ fã ko nɔ eke* Yehowa lɛ, adamɔ wui abɔ ni abaanyɛ adu yɛ shikpɔŋ lɛ nɔ lɛ nɔ atsɔɔ ejara: barle* wui homer* kome afee jwiɛtɛi shekeli 50. 17 Kɛ́ ejɔɔ eshikpɔŋ lɛ nɔ eke yɛ Heyeli Afi+ lɛ mli lɛ, no lɛ, akɛ jara ni atsɔɔ lɛ atsu nii. 18 Kɛ́ ejɔɔ eshikpɔŋ lɛ nɔ eke yɛ Heyeli Afi lɛ sɛɛ lɛ, no lɛ, osɔfo lɛ adamɔ afii abɔ ni eshwɛ ni Heyeli Afi ni nyiɛ sɛɛ lɛ baashɛ lɛ nɔ etse jara ni atsɔɔ lɛ nɔ.+ 19 Shi kɛ́ eba lɛ akɛ mɔ ni jɔɔ shikpɔŋ lɛ nɔ eke lɛ miitao ekpɔ̃ shikpɔŋ lɛ, no lɛ, ekɛ shika ni atsɔɔ akɛ eji shikpɔŋ lɛ jara lɛ mlijai enumɔ mli ekome afata he kɛhã, ni ebaatsɔ enɔ. 20 Shi kɛ́ ekpɔ̃ɔɔ shikpɔŋ lɛ, ni ahɔ̃ɔ shikpɔŋ lɛ ahã mɔ kroko lɛ, anyɛŋ akpɔ̃ dɔŋŋ. 21 Kɛ́ aŋmɛɛ shikpɔŋ lɛ he yɛ Heyeli Afi lɛ mli lɛ, ebaatsɔ nɔ krɔŋkrɔŋ kɛhã Yehowa akɛ shikpɔŋ ni ajɔɔ nɔ ake lɛ. Ebaatsɔ osɔfoi lɛ anɔ.+

22 “‘Kɛ́ mɔ ko jɔɔ shikpɔŋ ko ni ehé lɛ nɔ eke Yehowa, ni shikpɔŋ lɛ fataaa nɔ ni agbo ashi ahã lɛ lɛ he lɛ,+ 23 osɔfo lɛ adamɔ be ni eshwɛ ní Heyeli Afi lɛ baashɛ lɛ nɔ ebu ejara lɛ naa ehã lɛ, ní mɔ lɛ awo jara ni abaatsɔɔ lɛ yɛ nakai gbi lɛ nɔ nɔŋŋ.+ Eji nɔ krɔŋkrɔŋ hã Yehowa. 24 Heyeli Afi lɛ mli lɛ, shikpɔŋ lɛ baaku sɛɛ atsɔ mɔ ni ehé shikpɔŋ lɛ yɛ edɛŋ lɛ nɔ ekoŋŋ, ebaatsɔ shikpɔŋtsɛ lɛ nɔ.+

25 “‘Adamɔ shekel ni akɛtsuɔ nii yɛ he krɔŋkrɔŋ lɛ nɔ atsɔɔ jara fɛɛ jara. Shekel kome afee gerai* 20.

26 “‘Shi mɔ ko mɔ ko akajɔɔ kooloi akromɔbi ko nɔ eke, ejaakɛ kromɔbii ní afɔɔ lɛ, Yehowa nɔ ni.+ Tsina jio, too jio, Yehowa nɔ ni momo.+ 27 Kɛ́ eji kooloo ni he tseee, ni ekpɔ̃ lɛ yɛ jara ni atsɔɔ lɛ naa lɛ, ekɛ jara lɛ mlijai enumɔ mli ekome afata jara lɛ he kɛhã.+ Shi kɛ́ akpɔ̃ɔɔ kooloo lɛ, no lɛ, ahɔ̃ɔ yɛ jara ni atsɔɔ lɛ naa.

28 “‘Shi nɔ fɛɛ nɔ ni mɔ ko yɔɔ ni ebaajɔɔ nɔ eke Yehowa kwraa* lɛ, kɛ́ eji gbɔmɔ jio, kooloo jio, eshikpɔŋ jio, akahɔ̃ɔ, ni akakpɔ̃ hu. Nɔ fɛɛ nɔ ni ajɔɔ nɔ ake lɛ ji nɔ krɔŋkrɔŋ fe fɛɛ hã Yehowa.+ 29 Agbɛnɛ hu, gbɔmɔ fɛɛ gbɔmɔ ni abu lɛ gbele fɔ,* ni ajie lɛ ato afã koni akpãtã ehiɛ lɛ, akakpɔ̃ lɛ.+ Bɔ fɛɛ bɔ ni fee lɛ, agbe lɛ.+

30 “‘Shikpɔŋ lɛ nɔ nibaa nii lɛ amlijai nyɔŋma mli ekome+ fɛɛ mlijai nyɔŋma mli ekome lɛ, kɛ́ eji ŋmɔshi nibii jio, tsei ayibii jio, Yehowa nɔ ni. Eji nɔ krɔŋkrɔŋ hã Yehowa. 31 Kɛ́ eba lɛ akɛ mɔ ko miitao ekpɔ̃ enibii amlijai nyɔŋma mli ekome lɛ ateŋ eko lɛ, no lɛ, ekɛ nii lɛ jara lɛ mlijai enumɔ mli ekome afata jara lɛ he kɛhã. 32 Shi tsinai kɛ toi amlijai nyɔŋma mli ekome fɛɛ mlijai nyɔŋma mli ekome, nɔ fɛɛ nɔ ni tsɔɔ tookwɛlɔ tso lɛ shishi kɛhoɔ lɛ, kooloo* ni ji nyɔŋma nɔ lɛ atsɔ nɔ krɔŋkrɔŋ ahã Yehowa. 33 Ekakwɛ akɛ kooloo lɛ hi loo ehiii, ni ekɛ eko akatsake hu. Shi kɛ́ eka akɛ ekɛ eko baatsake lɛ, no lɛ, klɛŋklɛŋ kooloo lɛ kɛ nɔ ni etaoɔ ekɛtsake lɛ lɛ fɛɛ baatsɔmɔ nii krɔŋkrɔŋ.+ Anyɛŋ akpɔ̃ dɔŋŋ.’”

34 Enɛɛmɛi ji kitãi ni Yehowa kɛhã Mose yɛ Sinai Gɔŋ+ lɛ nɔ koni ekɛhã Israelbii lɛ.