4 Mose
36 Manase binuu Makir+ binuu Gilead seshibii lɛ aweku yitsei, ní amɛ fɛɛ amɛjɛ Yosef bihii lɛ ateŋ lɛ tsi amɛbɛŋkɛ, ni amɛbawie yɛ Mose kɛ wekunukpai lɛ, ni ji Israelbii lɛ awekui lɛ anɔ onukpai lɛ ahiɛ. 2 Amɛwie akɛ: “Yehowa fã minuŋtsɔ akɛ etsɔ oshikifɔɔ nɔ eja shikpɔŋ+ lɛ ehã Israelbii lɛ akɛ amɛgboshinii; ni Yehowa fã minuŋtsɔ akɛ ekɛ wɔnyɛmi nuu Zelofehad gboshinii lɛ ahã ebiyei lɛ.+ 3 Kɛji yei lɛ kɛ hii ni jɛ Israel weku kroko mli bote gbalashihilɛ mli lɛ, no lɛ, abaajie amɛgboshinii lɛ kɛjɛ wɔtsɛmɛi lɛ agboshinii lɛ mli, ni akɛbaafata weku ni amɛbaayaje mli lɛ anɔ lɛ he, ni tsɔɔ akɛ, ajie kɛjɛ wɔgboshinii ni atsɔ oshikifɔɔ nɔ akɛhã wɔ lɛ mli. 4 Agbɛnɛ, kɛ́ Israelbii lɛ a-Heyeli Afi+ lɛ shɛ lɛ, akɛ yei lɛ agboshinii lɛ baayafata weku ni amɛbaayaje mli lɛ agboshinii lɛ he, ni tsɔɔ akɛ, ajie amɛgboshinii lɛ kɛjɛ wɔtsɛmɛi aweku lɛ gboshinii lɛ mli.”
5 Ni Mose kɛɛ Israelbii lɛ yɛ Yehowa famɔ naa akɛ: “Nɔ ni Yosef bihii lɛ aweku lɛ wieɔ lɛ ja. 6 Nɔ ni Yehowa efã yɛ Zelofehad biyei lɛ ahewɔ nɛ: ‘Amɛbaanyɛ amɛkɛ mɔ fɛɛ mɔ ni amɛsumɔɔ abote gbalashihilɛ mli. Shi esa akɛ amɛkɛ mɔ ko ni jɛ amɛtsɛ weku lɛ mli abote gbalashihilɛ mli. 7 Israelbii lɛ agboshinii ko gboshinii ko akajɛ weku kome mli kɛmiiya weku kroko mli, ejaakɛ esa akɛ Israelbii lɛ ahiɛ amɛtsɛmɛi aweku lɛ gboshinii lɛ mli kpɛŋŋ. 8 Ni biyoo fɛɛ biyoo ni yɔɔ gboshinii ko yɛ Israel wekui lɛ ateŋ lɛ, esa akɛ ekɛ epapa weku lɛ mli nyo abote gbalashihilɛ mli,+ koni Israelbii lɛ atsɛmɛi agboshinii lɛ aya nɔ ahi amɛdɛŋ. 9 Gboshinii ko gboshinii ko akajɛ weku kome mli kɛmiiya weku kroko mli, ejaakɛ esa akɛ Israel wekui lɛ ahiɛ amɛ diɛŋtsɛ amɛgboshinii lɛ mli kpɛŋŋ.’”
10 Zelofehad biyei lɛ fee tamɔ bɔ ni Yehowa fã Mose lɛ pɛpɛɛpɛ.+ 11 No hewɔ lɛ, Mala kɛ Tirza kɛ Hogla kɛ Milka kɛ Noa, ni ji Zelofehad biyei+ lɛ, kɛ amɛtsɛ nyɛmimɛi hii lɛ abihii bote gbalashihilɛ mli. 12 Amɛkɛ hii ni jɛ Yosef binuu Manase wekui lɛ amli lɛ bote gbalashihilɛ mli, bɔ ni afee ni amɛgboshinii lɛ aya nɔ ahi amɛtsɛ weku lɛ mli.
13 Enɛɛmɛi ji kitãi kɛ yiŋkpɛi* ni Yehowa tsɔ Mose nɔ ekɛhã Israelbii lɛ yɛ Moab ŋa kpataa lɛ nɔ, yɛ Yordan lɛ naa, yɛ Yeriko lɛ.+