Kojolɔi
1 Yoshua gbele sɛɛ lɛ,+ Israelbii lɛ bi Yehowa akɛ:+ “Wɔteŋ namɔ klɛŋklɛŋ baakwɔ kɛya ni ekɛ Kanaanbii lɛ ayawu?” 2 Yehowa hã hetoo akɛ: “Yuda weku lɛ baakwɔ kɛya.+ Naa! Mikɛ shikpɔŋ lɛ miiwo* amɛdɛŋ.” 3 Ni Yuda weku lɛ kɛɛ Simeon weku lɛ, ni ji amɛnyɛmimɛi* lɛ, akɛ: “Nyɛbafataa wɔhe ni wɔkwɔa kɛyaa shikpɔŋ ni akɛhã wɔ*+ lɛ nɔ koni wɔkɛ Kanaanbii lɛ ayawu. No sɛɛ lɛ, wɔ hu wɔbaafata nyɛhe kɛya shikpɔŋ ni akɛhã nyɛ lɛ nɔ.” No hewɔ lɛ, Simeon weku lɛ kɛ amɛ tee.
4 Be ni Yuda weku lɛ kwɔ kɛtee lɛ, Yehowa kɛ Kanaanbii lɛ kɛ Perizbii lɛ wo amɛdɛŋ,+ ni amɛgbe hii 10,000 yɛ Bezek. 5 Amɛyana Adoni-bezek yɛ Bezek, ni amɛkɛ lɛ wu, ni amɛgbegbee Kanaanbii+ lɛ kɛ Perizbii+ lɛ. 6 Be ni Adoni-bezek jo foi lɛ, amɛtiu lɛ, ni amɛyamɔ lɛ, ni amɛfolɔ enine gɔntii kɛ enane gɔntii. 7 Kɛkɛ ni Adoni-bezek kɛɛ akɛ: “Mifolɔfolɔɔ maŋtsɛmɛi 70 anine gɔntii kɛ amɛnane gɔntii, ni mihã amɛkɔlɔ niyenii yɛ mikpɔlɔ lɛ shishi. Bɔ ni mifee lɛ, nakai pɛpɛɛpɛ Nyɔŋmɔ eto mi najiaŋ nɛɛ.” No sɛɛ lɛ, amɛkɛ lɛ ba Yerusalem,+ ni egbo yɛ jɛmɛ.
8 Agbɛnɛ hu, Yudabii* lɛ kɛ Yerusalem+ wu ni amɛŋɔ maŋ lɛ; amɛkɛ klante gbegbee emli bii lɛ, ni amɛma maŋ lɛ naa la. 9 No sɛɛ lɛ, Yudabii* lɛ kpeleke shi koni amɛkɛ Kanaanbii ni yɔɔ gɔji lɛ anɔ lɛ kɛ Negeb lɛ kɛ Shefela lɛ ayawu.+ 10 No hewɔ lɛ, Yuda weku lɛ fã ni amɛkɛ Kanaanbii ni yɔɔ Hebron lɛ yawu (tsutsu lɛ, atsɛɔ Hebron akɛ Kiriat-arba), ni amɛgbe Sheshai, Ahiman, kɛ Talmai.*+
11 Amɛfã kɛjɛ jɛmɛ ni amɛkɛ Debirbii lɛ yawu.+ ( Tsutsu lɛ, atsɛɔ Debir akɛ Kiriat-sefer.)+ 12 Kɛkɛ ni Kaleb+ kɛɛ akɛ: “Mɔ ni baatswia Kiriat-sefer nii ní ebaaŋɔ maŋ lɛ, mikɛ mibiyoo Aksa baahã lɛ akɛ eŋa.”+ 13 Ni Otniel,+ ni ji Kaleb nyɛmi nuu fioo Kenaz+ binuu lɛ yaŋɔ maŋ lɛ. No hewɔ lɛ, ekɛ ebiyoo Aksa hã lɛ akɛ eŋa. 14 Be ni Aksa yaa shĩa lɛ, ekɛɛ ewu lɛ koni ebi epapa ní ehã lɛ shikpɔŋ. Kɛkɛ ni Aksa yi shi kɛjɛ eteji lɛ nɔ.* Kaleb bi lɛ akɛ: “Mɛni otaoɔ?” 15 Aksa kɛɛ lɛ akɛ: “Ofainɛ, jɔɔmɔ mi,* ejaakɛ ohã mi shikpɔŋ yɛ wuoyigbɛ;* okɛ Gulot-maim* hu ahã mi.” No hewɔ lɛ, Kaleb kɛ Gɔŋnɔgbɛ Gulot kɛ Jɔɔŋgbɛ Gulot hã lɛ.
16 Ni Kennyo+ lɛ, ni ji Mose shaanuu+ lɛ seshibii lɛ kɛ Yudabii lɛ kwɔ kɛjɛ tɛŋ tsei amaŋ+ lɛ mli kɛba Yuda ŋa lɛ ni kã Arad+ wuoyigbɛ lɛ nɔ. Amɛtee jɛmɛ ni amɛyahi mɛi ni yɔɔ jɛmɛ lɛ ateŋ.+ 17 Shi Yudabii lɛ kɛ amɛnyɛmimɛi Simeonbii lɛ fã kɛyatutua Kanaanbii ni yɔɔ Zefat lɛ, ni amɛkpãtã maŋ lɛ hiɛ.+ No hewɔ lɛ, amɛwo maŋ lɛ gbɛ́i akɛ Horma.*+ 18 Kɛkɛ ni Yudabii lɛ ŋɔ Gaza+ kɛ ehe shikpɔji lɛ, Ashkelon+ kɛ ehe shikpɔji lɛ, kɛ Ekron+ kɛ ehe shikpɔji lɛ. 19 Yehowa ye ebua Yuda weku lɛ,* no hewɔ lɛ, amɛŋɔ shikpɔji ni yɔɔ gɔji lɛ anɔ lɛ, shi amɛnyɛɛɛ amɛshwie mɛi ni yɔɔ jɔɔ lɛ mli lɛ, ejaakɛ amɛyɛ ta shwiilii kɛ amɛhe dadei.*+ 20 Amɛkɛ Hebron hã Kaleb tamɔ bɔ ni Mose wo shi lɛ pɛpɛɛpɛ,+ ni eshwie Anak bihii etɛ+ lɛ kɛje jɛmɛ.
21 Shi Benyaminbii lɛ eshwieee Yebusbii ni yɔɔ Yerusalem lɛ, no hewɔ lɛ, Yebusbii lɛ tee nɔ amɛkɛ Benyaminbii lɛ hi Yerusalem, ni amɛkɛ amɛ yɛ kɛbashi ŋmɛnɛ.+
22 Yosef weku+ lɛ kwɔ kɛtee ni amɛkɛ Betel maŋ lɛ yawu, ni Yehowa ye ebua amɛ.*+ 23 No mli lɛ, Yosef weku lɛ miikpá Betel maŋ lɛ shi (no mli lɛ, maŋ lɛ gbɛ́i ji Luz),+ 24 ni mɛi ni kpáa maŋ lɛ shi lɛ na nuu ko miije kpo kɛmiijɛ maŋ lɛ mli. No hewɔ lɛ, amɛkɛɛ lɛ akɛ: “Ofainɛ, tsɔɔmɔ wɔ gbɛ ni yaa maŋ lɛ mli, ni wɔbaafee bo ejurɔ.”* 25 No hewɔ lɛ, nuu lɛ tsɔɔ amɛ gbɛ ni yaa maŋ lɛ mli lɛ, ni amɛkɛ klante gbe maŋ lɛ mli bii lɛ, shi amɛŋmɛɛ nuu lɛ kɛ eweku muu lɛ fɛɛ he.+ 26 Nuu lɛ yiŋ etee Hitbii lɛ ashikpɔŋ lɛ nɔ, ni eyato maŋ ko ni ewo lɛ gbɛ́i akɛ Luz, ni nakai atsɛɔ maŋ lɛ kɛbashi ŋmɛnɛ.
27 Manase weku lɛ eŋɔɔɔ Bet-shean maŋ lɛ kɛ emaji ni baa lɛ abo* lɛ, Taanak+ maŋ lɛ kɛ emaji ni baa lɛ abo lɛ, mɛi ni yɔɔ Dor maŋ lɛ mli lɛ kɛ emaji ni baa lɛ abo lɛ, mɛi ni yɔɔ Ibleam maŋ lɛ mli lɛ kɛ emaji ni baa lɛ abo lɛ, kɛ mɛi ni yɔɔ Megido maŋ lɛ mli lɛ kɛ emaji ni baa lɛ abo lɛ.+ Kanaanbii lɛ tee nɔ amɛhi shikpɔŋ lɛ nɔ ni amɛshiii. 28 Be ni Israelbii lɛ ná hewalɛ waa lɛ, amɛnyɛ Kanaanbii lɛ anɔ koni amɛtsu nitsumɔ ni wa amɛhã amɛ,+ shi amɛshwieee amɛ.+
29 Nakai nɔŋŋ Efraim weku lɛ hu eshwieee Kanaanbii ni yɔɔ Gezer lɛ. Kanaanbii lɛ tee nɔ amɛhi amɛteŋ yɛ Gezer.+
30 Zebulon weku lɛ eshwieee mɛi ni yɔɔ Kitron kɛ mɛi ni yɔɔ Nahalol lɛ.+ Kanaanbii lɛ tee nɔ amɛhi amɛteŋ, ni amɛnyɛ Kanaanbii lɛ anɔ koni amɛtsu nitsumɔ ni wa amɛhã amɛ.+
31 Asher weku lɛ eshwieee mɛi ni yɔɔ Ako kɛ mɛi ni yɔɔ Sidon,+ Ahelab, Akzib,+ Helba, Afik,+ kɛ Rehob+ maji lɛ amli lɛ. 32 No hewɔ lɛ, Asherbii lɛ tee nɔ amɛhi Kanaanbii ni yɔɔ shikpɔŋ lɛ nɔ lɛ ateŋ, ejaakɛ amɛshwieee amɛ.
33 Naftali weku lɛ eshwieee mɛi ni yɔɔ Bet-shemesh kɛ mɛi ni yɔɔ Bet-anat lɛ,+ shi amɛtee nɔ amɛhi Kanaanbii ni yɔɔ shikpɔŋ lɛ nɔ lɛ ateŋ.+ Amɛnyɛ mɛi ni yɔɔ Bet-shemesh kɛ mɛi ni yɔɔ Bet-anat lɛ anɔ koni amɛtsu nitsumɔ ni wa amɛhã amɛ.
34 Amorbii lɛ tsĩ Dan weku lɛ naa amɛwo gɔji lɛ anɔ, ejaakɛ amɛŋmɛɛɛ amɛ gbɛ ni amɛkpeleke shi kɛba jɔɔ lɛ mli.+ 35 No hewɔ lɛ, Amorbii lɛ tee nɔ amɛhi Heres Gɔŋ lɛ nɔ, kɛ Ayalon,+ kɛ Shaalbim.+ Shi be ni Yosef weku lɛ ná hewalɛ waa* lɛ, amɛnyɛ Amorbii lɛ anɔ koni amɛtsu nitsumɔ ni wa amɛhã amɛ. 36 Amorbii lɛ ashikpɔŋ lɛ jeɔ shishi kɛjɛɔ gbɛ ni akwɔɔ kɛyaa Akrabim+ lɛ he, kɛ agbɛnɛ hu kɛjɛ Sela kɛyaa gɔŋ nɔ gbɛ.