Kojolɔi
17 Nuu ko yɛ Efraim gɔji+ lɛ anɔ ni atsɛɔ lɛ Mika. 2 Ekɛɛ emami akɛ: “Jwiɛtɛi kapɛji 1,100 ni awó yɛ odɛŋ ni olomɔ yɛ he ni minu lɛ—naa! jwiɛtɛi lɛ yɛ midɛŋ. Miji mɔ ni wó.” Kɛkɛ ni emami kɛɛ akɛ: “Yehowa ajɔɔ mibinuu lɛ.” 3 No hewɔ lɛ, ekɛ jwiɛtɛi kapɛji 1,100 lɛ ku sɛɛ ehã emami, shi emami kɛɛ akɛ: “Majɔɔ jwiɛtɛi ni yɔɔ midɛŋ lɛ nɔ mahã Yehowa kɛ̃, koni mibinuu lɛ kɛfee amaga ni agbɔ* kɛ dade amaga.+ Agbɛnɛ, mikɛmiihã bo ekoŋŋ.”
4 Be ni ekɛ jwiɛtɛi lɛ ehã emami sɛɛ lɛ, emami kɛ jwiɛtɛi kapɛji 200 hã jwiɛtɛi sɔ̃lɔ lɛ. Jwiɛtɛi sɔ̃lɔ lɛ kɛfee amaga ni agbɔ* kɛ dade amaga; ni akɛba Mika shĩa lɛ. 5 Nɛkɛ nuu Mika nɛɛ yɛ shĩa ko ni ji nyɔŋmɔi ashĩa, ni efee efɔd+ kɛ terafim amagai,*+ ni ewó ebihii lɛ ateŋ mɔ kome osɔfo* koni esɔmɔ akɛ osɔfo ehã lɛ.+ 6 Nakai beiaŋ lɛ, abɛ maŋtsɛ ko yɛ Israel.+ Mɔ fɛɛ mɔ feɔ nɔ ni esusuɔ akɛ eja.*+
7 No mli lɛ, oblanyo ko yɛ Betlehem+ yɛ Yuda, ni eyɛ Yuda weku lɛ mli. Eji Levinyo+ ni ebato gbɔ yɛ jɛmɛ. 8 Nuu lɛ fã kɛjɛ Betlehem yɛ Yuda koni eyatao he ko ehi. Be ni eyaa lɛ, eyashɛ Mika+ shĩa lɛ yɛ Efraim gɔji lɛ anɔ. 9 Kɛkɛ ni Mika bi lɛ akɛ: “Nɛgbɛ ojɛ kɛbaa nɛɛ?” Ehã lɛ hetoo akɛ: “Levinyo ji mi, ni mijɛ Betlehem yɛ Yuda, ni miiya miyatao he ko mahi.” 10 No hewɔ lɛ, Mika kɛɛ lɛ akɛ: “Okɛ mi abahi shi ni osɔmɔ akɛ tsɛ* kɛ osɔfo ohã mi. Daa afi lɛ, mahã bo jwiɛtɛi kapɛji nyɔŋma kɛ hetsakemɔ atadei kɛ oniyenii.” Ni Levinyo lɛ bote shĩa lɛ mli. 11 Levinyo lɛ kpɛlɛ akɛ ekɛ nuu lɛ baahi shi, ni oblanyo lɛ batsɔ tamɔ ebihii lɛ ateŋ mɔ kome. 12 Agbɛnɛ hu, Mika wó Levinyo lɛ osɔfo* koni esɔmɔ akɛ osɔfo ehã lɛ,+ ni ehi Mika shĩa lɛ. 13 Kɛkɛ ni Mika kɛɛ akɛ: “Agbɛnɛ, mile akɛ Yehowa kɛ mi baaye jogbaŋŋ, ejaakɛ Levinyo lɛ ebatsɔ osɔfo ehã mi.”