Kojolɔi

19 Yɛ nakai bei lɛ amli, be ni maŋtsɛ ko bɛ Israel lɛ,+ Levinyo ko ni no mli lɛ eyɔɔ he ko shɔŋŋ yɛ Efraim gɔji+ lɛ anɔ lɛ yaŋɔ yoo ko kɛjɛ Betlehem+ yɛ Yuda akɛ ehemɔ.* 2 Shi ehemɔ lɛ je esɛɛ eyabɔ ajwamaŋ,* ni eshi nuu lɛ ni etee epapa shĩa yɛ Betlehem yɛ Yuda. Yoo lɛ hi jɛmɛ nyɔji ejwɛ. 3 Kɛkɛ ni ewu lɛ tee koni eyakɔne eyiŋ ni eku esɛɛ eba; ekɛ esɔɔlɔ nuu kɛ tejii enyɔ tee. No hewɔ lɛ, yoo lɛ kɛ lɛ tee epapa shĩa lɛ. Be ni yoo lɛ papa na nuu lɛ, ená miishɛɛ waa akɛ ekɛ lɛ ekpe. 4 No hewɔ lɛ, nuu lɛ shaanuu, ni ji oblayoo lɛ papa lɛ, kɔne nuu lɛ yiŋ koni ekɛ lɛ ahi shi gbii etɛ; ni amɛyeɔ nii ni amɛnuɔ nii, ni ewɔɔ jɛmɛ.

5 Gbi ni ji ejwɛ lɛ nɔ be ni amɛte shi leebi maŋkpa ni amɛbaashi lɛ, oblayoo lɛ papa kɛɛ eshaanuu lɛ akɛ: “Ye nɔ ko koni oná hewalɛ,* ni no sɛɛ lɛ, nyɛya.” 6 No hewɔ lɛ, amɛta shi, ni amɛyi enyɔ lɛ fɛɛ amɛye nɔ ko ni amɛnu nɔ ko; no sɛɛ lɛ, oblayoo lɛ papa kɛɛ nuu lɛ akɛ: “Ofainɛ wɔ ni oná ohewɔ miishɛɛ.”* 7 Be ni nuu lɛ te shi ni ebaaya lɛ, eshaanuu lɛ tee nɔ ekpa lɛ fai, no hewɔ lɛ, ewɔ jɛmɛ ekoŋŋ.

8 Enɔ jetsɛremɔ leebi maŋkpa yɛ gbi ni ji enumɔ lɛ nɔ be ni ete shi koni eya lɛ, oblayoo lɛ papa kɛɛ akɛ: “Ofainɛ, ye nɔ ko koni oná hewalɛ.”* Ni amɛlilaa shi aahu kɛyashi hulushinyɔɔ mli,* ni amɛyi enyɔ lɛ fɛɛ amɛtee nɔ amɛye nii. 9 Be ni nuu lɛ te shi koni ekɛ ehemɔ lɛ kɛ esɔɔlɔ lɛ aya lɛ, eshaanuu lɛ, ni ji oblayoo lɛ papa lɛ kɛɛ lɛ akɛ: “Naa! amrɔ nɛɛ je ena etã. Ofainɛ wɔ. Eshwɛ fioo ni gbi lɛ baaba naagbee. Wɔ ni oná ohewɔ miishɛɛ. Wɔ lɛ, obaanyɛ ote shi leebi maŋkpa ni oya oshĩa lɛ.”* 10 Shi nuu lɛ sumɔɔɔ ni je tsɛreɔ lɛ dɔŋŋ yɛ jɛmɛ, no hewɔ lɛ, ete shi ni eyiŋ kɛtee Yebus, ni ji Yerusalem tɔ̃ɔ.+ Ekɛ tejii enyɔ ni awo amɛnɔ nii lɛ, ehemɔ lɛ, kɛ esɔɔlɔ lɛ ni tee.

11 Be ni amɛbɛŋkɛ Yebus lɛ, no mli lɛ, eshwɛ fioo ni hulu lɛ baanyɔ shi. No hewɔ lɛ, sɔɔlɔ lɛ kɛɛ enuŋtsɔ lɛ akɛ: “Ani wɔya Yebusbii lɛ amaŋ lɛ mli ni wɔyawɔ jɛmɛ lo?” 12 Shi enuŋtsɔ lɛ kɛɛ lɛ akɛ: “Esaaa akɛ wɔyaa mɛikpɔji, mɛi ni jeee Israelbii lɛ amaŋ ko mli. Hã wɔfo mli kɛya Gibea.”+ 13 Kɛkɛ ni ekɛɛ esɔɔlɔ lɛ akɛ: “Hã wɔbɔ mɔdɛŋ wɔshɛ maji nɛɛ ateŋ ekome nɔ; wɔbaaya Gibea aloo Rama+ ni wɔyawɔ jɛmɛ.” 14 No hewɔ lɛ, amɛtsa amɛnyiɛmɔ lɛ nɔ, ni be ni amɛbɛŋkɛ Gibea, ni ji Benyaminbii lɛ amaŋ lɛ, no mli lɛ, hulu lɛ miinyɔ shi.

15 No hewɔ lɛ, amɛtee Gibea koni amɛyawɔ jɛmɛ. Be ni amɛbote maŋ lɛ mli lɛ, amɛyata shi yɛ maŋ lɛ henaabuamɔhe lɛ, shi mɔ ko mɔ ko ebahereee amɛ kɛyaaa eshĩa ni amɛyawɔ jɛmɛ.+ 16 Saŋŋ mli yɛ nakai gbɛkɛ lɛ mli lɛ, naa nuumo ko ni eyatsu nii yɛ eŋmɔ mli ni eku esɛɛ eeba. Ebato gbɔ yɛ Gibea, shi Efraim gɔji+ lɛ anɔ ji he ni ejɛ; Benyaminbii ji mɛi ni yɔɔ Gibea maŋ lɛ mli.+ 17 Be ni nuumo lɛ wó ehiɛ nɔ ni ena gbɛfalɔ lɛ yɛ maŋ lɛ henaabuamɔhe lɛ, ebi lɛ akɛ: “Nɛgbɛ ojɛ, ni nɛgbɛ oyaa?” 18 Ehã hetoo akɛ: “Wɔjɛ Betlehem yɛ Yuda, ni wɔmiiya he ko shɔŋŋ yɛ Efraim gɔji lɛ anɔ, jɛmɛ ji he ni mijɛ. Mitee Betlehem yɛ Yuda,+ ni miiya Yehowa shĩa lɛ,* shi mɔ ko mɔ ko ebahereee mi kɛyaaa eshĩa. 19 Wɔyɛ jwɛi kɛ niyenii ni fa saŋŋ kɛhã wɔtejii lɛ,+ ni blodo+ kɛ wain hu yɛ kɛhã mi, kɛ yoo lɛ, kɛ wɔsɔɔlɔ lɛ. Nɔ ko nɔ ko he ehiaaa wɔ.” 20 Shi nuumo lɛ kɛɛ lɛ akɛ: “Toiŋjɔlɛ ahã bo! Nɔ fɛɛ nɔ ni he baahia bo lɛ, mahã bo. Henaabuamɔhe lɛ kɛkɛ okawɔ.” 21 No hewɔ lɛ, eŋɔ lɛ kɛtee eshĩa ni ehã etejii lɛ niyenii. Kɛkɛ ni amɛfɔfɔɔ amɛnaji ahe, ni amɛye nɔ ko ni amɛnu nɔ ko.

22 Be ni amɛnáa amɛhewɔ miishɛɛ lɛ, maŋ lɛŋ hii yaka gbɔmɛi komɛi babɔle shĩa lɛ he kɛkpe, ni amɛbɔi shinaa lɛ shiimɔ, ni amɛtee nɔ amɛkɛɛ nuumo lɛ, ni ji shĩatsɛ lɛ akɛ: “Jiemɔ nuu ni eba oshĩa lɛ ohã wɔ koni wɔkɛ lɛ aná bɔlɛ.”+ 23 Kɛkɛ ni shĩatsɛ lɛ je kpo eyakɛɛ amɛ akɛ: “Dabi, minyɛmimɛi, nyɛkafea efɔŋ nɛɛ. Nyɛfainɛ, nuu nɛɛ ebato gbɔ yɛ mishĩa lɛ. Nyɛkafea hiɛgbejianii nɛɛ. 24 Mibi oblayoo fro kɛ nuu lɛ hu hemɔ yɛ biɛ. Mikɛ amɛ baaje kpo abahã nyɛ koni kɛ́ nyɛmiisumɔ lɛ, nyɛto amɛ kabonaa.*+ Shi nuu nɛɛ kɛkɛ nyɛkafea lɛ hiɛgbejianii nɛɛ.”

25 Shi hii lɛ booo lɛ toi, no hewɔ lɛ, nuu lɛ mɔ ehemɔ+ lɛ ni ekɛ lɛ je kpo ebahã amɛ. Amɛto lɛ kabonaa ni amɛfee lɛ niseniianii nyɔɔŋ muu lɛ fɛɛ kɛyashi leebi. Ni be ni eshwɛ fioo ni hulu baaje lɛ, amɛŋmɛɛ ehe. 26 Leebi maŋkpa lɛ, yoo lɛ bagbee nuumo lɛ shinaa lɛ shi he ni enuŋtsɔ lɛ yɔɔ lɛ, ni ekã jɛmɛ aahu kɛyashi hulu je. 27 Be ni enuŋtsɔ lɛ te shi leebi ni egbele shĩa lɛ shinai lɛ koni eje kpo ni etsa egbɛfãa lɛ nɔ lɛ, ena yoo lɛ, ni ji ehemɔ lɛ ni ekã shĩa lɛ shinaa lɛ shi ni eniji jwere shinaa lɛ kpoku lɛ nɔ. 28 No hewɔ lɛ, ekɛɛ yoo lɛ akɛ: “Tee shi wɔtee.” Shi yoo lɛ ewieee. Kɛkɛ ni nuu lɛ wó yoo lɛ efɔ̃ eteji lɛ nɔ ni eyi gbɛ koni eya eshĩa.

29 Be ni eshɛ eshĩa lɛ, ekɔ kakla ni akɛfolɔɔ loo, ni emɔ ehemɔ lɛ mli, ni efolɔ emli yɛ etalɔi lɛ anaa, efolɔ emli 12 ni ehã akɛ ekomekomei tee Israel shikpɔji lɛ eko fɛɛ eko nɔ. 30 Mɔ fɛɛ mɔ ni naa lɛ kɛɔ akɛ: “Kɛjɛ gbi nɔ ni Israelbii lɛ kwɔ kɛshi Ejipt shikpɔŋ lɛ nɔ kɛbashi ŋmɛnɛ lɛ, nɔ ko ni tamɔ nɛkɛ bako pɛŋ ni anako eko hu pɛŋ. Nyɛjwɛŋa he,* nyɛsusua he,+ ni nyɛkɛa wɔ nɔ ni wɔfee.”