2 Samuel
9 Kɛkɛ ni David kɛɛ akɛ: “Ani Saul shĩabii lɛ ateŋ mɔ ko yɛ lolo ni manyɛ majie suɔmɔ ni tsakeee kpo matsɔɔ lɛ yɛ Yonatan hewɔ?”+ 2 No mli lɛ, sɔɔlɔ ko yɛ Saul shĩa lɛ ni atsɛɔ lɛ Ziba,+ no hewɔ lɛ, amɛyatsɛ lɛ amɛhã David, ni maŋtsɛ lɛ bi lɛ akɛ: “Bo ji Ziba lɛ?” Ni ekɛɛ akɛ: “Otsulɔ nɛ.” 3 Maŋtsɛ lɛ wie kɛtsa nɔ akɛ: “Ani Saul shĩabii lɛ ateŋ mɔ ko yɛ ni manyɛ majie Nyɔŋmɔ suɔmɔ ni tsakeee kpo matsɔɔ lɛ?” Ziba kɛɛ maŋtsɛ lɛ akɛ: “Yonatan binuu kome ko yɛ lolo; eji obubuafo.”*+ 4 Maŋtsɛ lɛ bi lɛ akɛ: “Nɛgbɛ eyɔɔ?” Ziba kɛɛ maŋtsɛ lɛ akɛ: “Eyɛ Makir,+ Amiel binuu lɛ shĩa lɛ yɛ Lo-debar.”
5 Amrɔ nɔŋŋ ni Maŋtsɛ David tsu kɛtee Makir, Amiel binuu lɛ shĩa lɛ yɛ Lo-debar ni ayaŋɔ lɛ kɛba. 6 Be ni Mefiboshet, Saul binuu Yonatan binuu lɛ bashɛ David ŋɔɔ lɛ, oya nɔŋŋ ni ekula shi ni ekoto lɛ. Kɛkɛ ni David kɛɛ akɛ: “Mefiboshet!” ni ehere nɔ akɛ: “Naa otsulɔ.” 7 David kɛɛ lɛ akɛ: “Kaashe gbeyei, bɔ fɛɛ bɔ ni fee lɛ, majie suɔmɔ ni tsakeee+ kpo matsɔɔ bo yɛ opapa Yonatan hewɔ, ni mikɛ onii Saul shikpɔji lɛ fɛɛ baahã bo, ni obaaye nii* yɛ mikpɔlɔ lɛ he daa.”+
8 Kɛkɛ ni ekoto lɛ ni ekɛɛ: “Namɔ ji otsulɔ ni otse ohiɛ ohã mi, mi ni mitamɔ gbee ni egbo+ nɛɛ?” 9 Agbɛnɛ, maŋtsɛ lɛ tsu ni ayatsɛ Ziba, Saul sɔɔlɔ lɛ kɛba, ni ekɛɛ lɛ akɛ: “Miiŋɔ nibii fɛɛ ni ji Saul kɛ eshĩa lɛ fɛɛ nɔ lɛ miihã onuŋtsɔ nabi nɛɛ.+ 10 Obaahu shikpɔŋ lɛ ohã lɛ—bo kɛ obihii lɛ kɛ otsuji lɛ—ni okpa enɔ nii koni mɛi ni ji onuŋtsɔ lɛ nabi lɛ shĩabii lɛ aná niyenii aye. Shi Mefiboshet, onuŋtsɔ lɛ nabi lɛ, baaye nii yɛ mikpɔlɔ lɛ he daa.”+
No mli lɛ, Ziba yɛ bihii 15 kɛ tsuji 20.+ 11 Kɛkɛ ni Ziba kɛɛ maŋtsɛ lɛ akɛ: “Otsulɔ baafee nibii fɛɛ ni minuŋtsɔ maŋtsɛ efã etsulɔ akɛ efee lɛ.” No hewɔ lɛ, Mefiboshet ye nii yɛ David okpɔlɔ* lɛ he tamɔ maŋtsɛ lɛ bihii lɛ eko. 12 Mefiboshet yɛ binuu fioo ko ni atsɛɔ lɛ Mika;+ ni mɛi fɛɛ ni yɔɔ Ziba shĩa lɛ batsɔmɔ Mefiboshet tsuji. 13 Ni Mefiboshet hi Yerusalem, ejaakɛ eyeɔ nii yɛ maŋtsɛ lɛ okpɔlɔ lɛ he daa;+ ni eji obubuafo.+