2 Maŋtsɛmɛi

25 Yɛ Zedekia nɔyeli afi ni ji nɛɛhu lɛ nɔ, yɛ nyɔɔŋ ni ji nyɔŋma lɛ nɔ gbi ni ji nyɔŋma lɛ nɔ lɛ, Babilon maŋtsɛ Nebukadnezar+ kɛ esraafoi lɛ fɛɛ ba koni amɛkɛ Yerusalem abawu.+ Ebɔ nsara ewo maŋ lɛ he ni etswa kpoku kɛbɔle he fɛɛ,+ 2 ni ewo maŋ lɛ he ka kɛyashi Maŋtsɛ Zedekia nɔyeli afi ni ji 11 lɛ nɔ. 3 Yɛ nyɔɔŋ ni ji ejwɛ lɛ nɔ gbi ni ji nɛɛhu lɛ nɔ lɛ, hɔmɔ lɛ naa bawa+ yɛ maŋ lɛ mli, ni shikpɔŋ lɛ nɔ bii lɛ náaa niyenii amɛye.+ 4 Ajwa maŋ lɛ gbogbo lɛ awo mli,+ ni asraafoi lɛ fɛɛ jo foi nyɔɔŋ kɛtsɔ agbó ni yɔɔ gbogboi enyɔ lɛ ateŋ lɛ, ni bɛŋkɛ maŋtsɛ lɛ abɔɔ lɛ mli, no mli lɛ, Kaldeabii lɛ ebɔle maŋ lɛ; ni maŋtsɛ lɛ tsɔ Araba lɛ gbɛ lɛ nɔ kɛtee.+ 5 Shi Kaldeabii lɛ asraafoi lɛ tiu maŋtsɛ lɛ, ni amɛyanina lɛ yɛ Yeriko ŋa kpataa lɛ nɔ, ni esraafoi lɛ fɛɛ gbɛ amɛshwã kɛje ehe. 6 Kɛkɛ ni amɛmɔ maŋtsɛ lɛ,+ ni amɛkɛ lɛ kwɔ kɛba Babilon maŋtsɛ lɛ ŋɔɔ yɛ Ribla, ni amɛkojo lɛ. 7 Amɛgbe Zedekia bihii lɛ yɛ ehiɛ; kɛkɛ ni Nebukadnezar shwila Zedekia hiŋmɛii, ni ewo lɛ akɔɔble gboklɛi, ni ekɛ lɛ tee Babilon.+

8 Yɛ Maŋtsɛ Nebukadnezar, Babilon maŋtsɛ lɛ nɔyeli afi ni ji 19 lɛ nɔ, yɛ nyɔɔŋ ni ji enumɔ lɛ nɔ gbi ni ji kpawo lɛ nɔ lɛ, Nebuzaradan,+ bulɔi lɛ anɔkwɛlɔ lɛ, ni ji Babilon maŋtsɛ lɛ tsulɔ lɛ, ba Yerusalem.+ 9 Eshã Yehowa shĩa lɛ,+ kɛ maŋtsɛ shĩa+ lɛ, kɛ shĩai fɛɛ ni yɔɔ Yerusalem lɛ;+ ni eshã hiɛnaanɔ gbɔmɔ fɛɛ hiɛnaanɔ gbɔmɔ shĩa hu.+ 10 Ni Kaldeabii lɛ asraafoi lɛ fɛɛ ni kɛ bulɔi lɛ anɔkwɛlɔ lɛ ba lɛ, kumɔ gbogboi ni bɔle Yerusalem he lɛ amɛshwie shi.+ 11 Agbɛnɛ, mɛi fɛɛ ni shwɛ yɛ Yerusalem lɛ, kɛ mɛi ni kɛ amɛhe yahã Babilon maŋtsɛ lɛ, kɛ shikpɔŋ lɛ nɔ bii krokomɛi ni shwɛ lɛ fɛɛ lɛ, Nebuzaradan, bulɔi lɛ anɔkwɛlɔ lɛ ŋɔ amɛ nom kɛtee.+ 12 Shi bulɔi lɛ anɔkwɛlɔ lɛ shi shikpɔŋ lɛ nɔ bii ni yeɔ ohia futaa lɛ ateŋ mɛi komɛi yɛ sɛɛ koni amɛsɔmɔ akɛ waintromsaalɔi kɛ okwaafoi ni anyɛɔ amɛnɔ kɛhã nitsumɔ.+ 13 Ni Kaldeabii lɛ kumɔ akɔɔble akulashiŋi+ lɛ ni yɔɔ Yehowa shĩa lɛ, kɛ akɔɔble nu shwiilii+ lɛ, kɛ akɔɔble nu taŋki ni atsɛɔ lɛ Ŋshɔ+ lɛ ni mamɔ Yehowa shĩa lɛ dukuduku, ni amɛkɛ akɔɔble lɛ tee Babilon.+ 14 Agbɛnɛ hu, amɛloo lamululoomɔnii lɛ, kɛ sofii lɛ, kɛ lagbeenii lɛ, kɛ kɔɔpoi lɛ, kɛ nibii krokomɛi ni akɛ akɔɔble fee ni akɛtsu nii yɛ sɔlemɔ shĩa lɛ fɛɛ kɛtee. 15 Bulɔi lɛ anɔkwɛlɔ lɛ loo lajeenii lɛ kɛ tsɛnsii ni akɛ shika tsuru krɔŋŋ+ kɛ jwiɛtɛi krɔŋŋ+ fee lɛ. 16 Shi akulashiŋi enyɔ lɛ, kɛ Ŋshɔ lɛ, kɛ nu shwiilii ni Solomon fee ewo Yehowa shĩa lɛ, anyɛɛɛ aŋmɛ akɔɔble ni ekɛfee nibii nɛɛ fɛɛ lɛ tsiimɔ.+ 17 Akulashiŋi lɛ eko fɛɛ eko kwɔlɛ ji ninetalɔi* 18,+ ni akɛ akɔɔble efee akekere kɛma nɔ; ni akekere lɛ ekome kwɔlɛ ji ninetalɔi etɛ, ni akɔɔble akɛfee yaa lɛ kɛ pomegranet aduawai ni bɔle akekere lɛ he lɛ.+ Akulashiŋ ni ji enyɔ lɛ kɛ ehe yaa lɛ hu tamɔ nakai nɔŋŋ.

18 Bulɔi lɛ anɔkwɛlɔ lɛ ŋɔ osɔfonukpa Seraia,+ kɛ Zefania,+ osɔfonukpa sɛɛkwɛlɔ lɛ, kɛ shinaanaakwɛlɔi etɛ lɛ hu nom kɛtee.+ 19 Ni eŋɔ maŋtsɛ shĩa onukpa kome ni kwɛɔ asraafoi lɛ anɔ, kɛ maŋtsɛ lɛ he gbɔmɛi enumɔ ni ana yɛ maŋ lɛ mli, kɛ agbɛnɛ hu tatsɛ lɛ woloŋmalɔ lɛ, ni ji mɔ ni buaa shikpɔŋ lɛ nɔ bii lɛ anaa kɛhã ta lɛ, kɛ shikpɔŋ lɛ nɔ hii 60 ni ana yɛ maŋ lɛ mli lɛ hu nom kɛje maŋ lɛ mli kɛtee. 20 Nebuzaradan,+ bulɔi lɛ anɔkwɛlɔ lɛ ŋɔ amɛ, ni ekɛ amɛ tee Babilon maŋtsɛ lɛ ŋɔɔ yɛ Ribla.+ 21 Babilon maŋtsɛ lɛ tswia amɛ nii ni egbe amɛ yɛ Ribla yɛ Hamat+ shikpɔŋ lɛ nɔ. No hewɔ lɛ, nɛkɛ ji bɔ ni fee ni aŋɔ Yuda nom kɛje eshikpɔŋ lɛ nɔ kɛtee.+

22 Babilon maŋtsɛ Nebukadnezar hã Gedalia,+ Shafan+ binuu Ahikam+ binuu lɛ sɔmɔ akɛ mɛi ni eshi yɛ sɛɛ yɛ Yuda shikpɔŋ lɛ nɔ lɛ anɔkwɛlɔ.+ 23 Be ni tatsɛmɛi lɛ fɛɛ kɛ amɛhii lɛ nu akɛ Babilon maŋtsɛ lɛ ewó Gedalia mɛi lɛ anɔkwɛlɔ lɛ, amɛba Gedalia ŋɔɔ yɛ Mizpa amrɔ nɔŋŋ. Mɛi ni ba lɛ ji, Ishmael, Netania binuu lɛ, kɛ Yohanan, Karea binuu lɛ, kɛ Seraia, ni ji Tanhumet, Netofatnyo lɛ binuu lɛ, kɛ Yaazania, Maakatnyo lɛ binuu lɛ. Amɛ kɛ amɛhii lɛ fɛɛ ba.+ 24 Gedalia kã amɛ kɛ amɛhii lɛ kitã, ni ekɛɛ amɛ akɛ: “Nyɛkashea gbeyei akɛ nyɛaatsɔmɔ Kaldeabii lɛ atsuji. Nyɛhia shikpɔŋ lɛ nɔ ni nyɛsɔmɔa Babilon maŋtsɛ lɛ, ni ebaahi ehã nyɛ.”+

25 Ni yɛ nyɔɔŋ ni ji kpawo lɛ nɔ lɛ, Ishmael,+ Elishama binuu Netania binuu lɛ, mɔ ni jɛ maŋtsɛmɛi aweku lɛ mli lɛ,* kɛ hii nyɔŋma fata ehe kɛba, ni amɛbatswa Gedalia nɔ ni egbo, lɛ kɛ Yudafoi lɛ kɛ Kaldeabii ni kɛ lɛ yɔɔ Mizpa lɛ.+ 26 No sɛɛ lɛ, mɛi lɛ fɛɛ, kɛjɛ mɔ bibioo nɔ kɛyashi mɔ wulu nɔ, kɛ tatsɛmɛi lɛ fɛɛ te shi ni amɛtee Ejipt,+ ejaakɛ amɛmiishe Kaldeabii lɛ gbeyei.+

27 Ni yɛ Yuda maŋtsɛ Yehoiakin+ nomŋɔɔ afi ni ji 37 lɛ nɔ, yɛ nyɔɔŋ ni ji 12 lɛ nɔ gbi ni ji 27 lɛ nɔ lɛ, Babilon maŋtsɛ Evil-merodak jie Yuda maŋtsɛ Yehoiakin* yɛ tsuŋwoo mli yɛ afi ni ebatsɔ maŋtsɛ lɛ nɔ.+ 28 Ekɛ lɛ wie yɛ naajɔlɛ naa ni ewó enɔ fe maŋtsɛmɛi krokomɛi fɛɛ ni kɛ lɛ yɔɔ Babilon lɛ.* 29 No hewɔ lɛ, Yehoiakin jie tsuŋwoohe atade lɛ, ni ewala gbii abɔ fɛɛ lɛ, ekɛ lɛ ye nii daa. 30 Ni gbi fɛɛ gbi lɛ, maŋtsɛ lɛ hãa lɛ niyenii ni ato ni ahã lɛ lɛ, ni efee nakai ehã lɛ ewala gbii abɔ fɛɛ.