Hiob

 2 “Mɛɛ beyinɔ nɔŋŋ nyɛbaakã he nyɛgba minaa,*+

Ní nyɛkɛ wiemɔi akumɔ mi dukuduku kɛyashi?+

 3 Shii nyɔŋma sɔŋŋ nɛ ni nyɛkãa mihiɛ;*

Efeee nyɛ hiɛgbele akɛ nyɛkɛ mi miiye kɛ joomɔ nɛkɛ.+

 4 Ni kɛ́ mitɔ̃ lɛɛlɛŋ lɛ,

Mitɔmɔ lɛ, mihe eyɔɔ.

 5 Kɛ́ nyɛmiitao ni doo lɛ nyɛwó nyɛhe nɔ yɛ minɔ,

Ni nyɛmiikɛɛ akɛ ahora ni abɔɔ mi lɛ sa lɛ,

 6 No lɛ, nyɛnáa nyɛlea akɛ, Nyɔŋmɔ ji mɔ ni elaka mi,

Ni edu mi yɛ egbɔbimɔ yaa lɛ mli.

 7 Naa! Mibolɔɔ akɛ, ‘Aawa mi yi!’ shi ahereee mi nɔ;+

Mibolɔɔ ní aye abua mi, shi ayeee jalɛ sane.+

 8 Ekɛ tɛ gbogbo etsĩ migbɛ lɛ, ni minyɛɛɛ maho;

Ekɛ duŋ eha migbɛjegbɛi lɛ anɔ.+

 9 Ekpɔlɔ minunyam lɛ yɛ mihe

Ni ejie akekere lɛ yɛ miyitso.

10 Ekumɔɔ mi yɛ he fɛɛ he kɛyashi mihiɛ baakpãtã;

Efãa mihiɛnɔkamɔ lɛ tamɔ tso.

11 Emli woɔ la ewoɔ mi,

Ni enaa mi tamɔ ehenyɛlɔ.+

12 Esraafoi lɛ buaa amɛhe naa, ni amɛwoɔ mihe ka,

Ni amɛbɔɔ nsara kɛbɔleɔ mimama tsũ lɛ.

13 Eshwie mi diɛŋtsɛ minyɛmimɛi kɛje mihe kɛtee shɔŋŋ,

Ni mɛi ni le mi lɛ ekpa yɛ misɛɛ.+

14 Minanemɛi* kpaakpa etee,

Ni mɛi ni mile amɛ jogbaŋŋ lɛ ahiɛ ekpa minɔ.+

15 Gbɔi ni yɔɔ mishĩa+ lɛ kɛ minyɔji yei buɔ mi mɔkpɔŋ;

Mitsɔ maŋsɛɛnyo yɛ amɛhiɛ.

16 Mitsɛɔ mitsulɔ, shi efooo midaaŋ;

Mikɛ minaabu kpaa lɛ fai koni emusuŋ atsɔ lɛ yɛ mihe.

17 Mimumɔ po miije fu miiwo miŋa,+

Ni mihe miije fu miiwo mi diɛŋtsɛ minyɛmimɛi.*

18 Gbekɛbii po gbeɔ mihe guɔ;

Kɛ́ mite shi lɛ, kɛkɛ lɛ amɛbɔi miyi wɔmɔ.

19 Minanemɛi ni bɛŋkɛ mi kpaakpa lɛ fɛɛ nyaŋeɔ mi,+

Ni mɛi ni misumɔɔ lɛ etsɔmɔ amɛhiɛ amɛwo mi.+

20 Miwui ekpɛtɛ mihewolo kɛ miheloo he,+

Ni shwɛ sharao kulɛ migbo.*

21 Nyɛnaa mi mɔbɔ, minanemɛi, nyɛnaa mi mɔbɔ,

Ejaakɛ Nyɔŋmɔ diɛŋtsɛ nine eta mihe.+

22 Mɛni hewɔ nyɛyaa nɔ nyɛwaa mi yi tamɔ Nyɔŋmɔ feɔ lɛ,+

Ni nyɛtutuaa mi ni nyɛkpaaa lɛ?*+

23 Miná kulɛ, aŋma miwiemɔi lɛ ashwie shi,

Miná kulɛ, aŋma awo wolo mli!

24 Miná kulɛ, akpɛ́ yɛ tɛsaa nɔ kɛmiiya naanɔ,

Hɛɛ, miná kulɛ akɛ dade pɛn* kɛ sumui kpɛ́!

25 Ejaakɛ mile jogbaŋŋ akɛ, mikpɔ̃lɔ+ lɛ hiɛ kã;

Sɛɛ mli lɛ ebaaba, ni ebaate shi edamɔ shi yɛ shikpɔŋ lɛ nɔ.*

26 Be ni akpãtã mihewolo hiɛ yɛ nɛkɛ gbɛ nɔ sɛɛ,

Ní miyɛ miheloo mli lolo lɛ, mana Nyɔŋmɔ,

27 Mi diɛŋtsɛ mana lɛ,

Mi diɛŋtsɛ mihiŋmɛii baana lɛ, jeee mɔ kroko nɔ.+

29 Nyɛshea klante gbeyei,+

Ejaakɛ klante kɛ toigbalamɔ baa mɛi ni tɔ̃ɔ lɛ anɔ;

Nyɛnáa nyɛlea akɛ kojolɔ ko yɛ.”+