Yesaia

20 Afi nɔ ni Asiria maŋtsɛ Sargon tsu Tartan lɛ* kɛba Ashdod+ lɛ, ekɛ Ashdod bawu ta ni eŋɔ maŋ lɛ.+ 2 Nakai be lɛ mli lɛ, Yehowa tsɔ Amoz binuu Yesaia+ nɔ ewie akɛ: “Yaa ni oyajie kpekpe* lɛ yɛ ohɛ, ni ojie otokotai lɛ hu yɛ onane.” Ni efee nakai, ni enyiɛ kɛ ehe folo* kɛ enane hu folo.

3 Kɛkɛ ni Yehowa kɛɛ akɛ: “Bɔ ni mitsulɔ Yesaia enyiɛ kɛ ehe folo kɛ enane folo afii etɛ akɛ okadi+ kɛ gbalɛ kɛhã Ejipt+ kɛ Etiopia+ lɛ, 4 nakai nɔŋŋ Asiria maŋtsɛ lɛ baakpala Ejiptbii+ ni aŋɔ amɛ nom kɛ Etiopiabii ni ashwie amɛ kɛje amɛshikpɔŋ lɛ nɔ lɛ kɛya, gbekɛbii hii kɛ hii onukpai, mɛi ni hiɛ amɛhe folo kɛ mɛi ni hiɛ amɛnane folo ni aana amɛdunaa, ni ji Ejipt yayaiaŋ* lɛ. 5 Ni amɛtsui baafã ni amɛhiɛ baagboi yɛ amɛhiɛnɔkamɔ ni ji Etiopia lɛ, kɛ nɔ ni amɛkɛshwãa ni ji Ejipt* lɛ hewɔ. 6 Nakai gbi lɛ nɔ lɛ, ŋshɔnaabii nɛɛ baakɛɛ akɛ, ‘Nyɛkwɛa nɔ ni eba mɔ ni wɔhiɛ kã enɔ ni wɔjo foi kɛtee eŋɔɔ koni eye ebua wɔ ni ejie wɔ kɛje Asiria maŋtsɛ lɛ dɛŋ lɛ nɔ! Agbɛnɛ, te wɔɔfee tɛŋŋ wɔje mli lɛ?’”