3 Mose
10 Sɛɛ mli lɛ, Aaron bihii ni ji Nadab kɛ Abihu+ lɛ ateŋ mɔ fɛɛ mɔ kɔ elajeenii, ni amɛkɛ la wo mli ni amɛkɛ tsofa-kɛ-ŋma+ shwie nɔ. Ni amɛkɛ la ni mla eŋmɛɛɛ gbɛ ba Yehowa hiɛ,+ nɔ ko ni efãko amɛ akɛ amɛfee. 2 Kɛkɛ ni la jɛ Yehowa ŋɔɔ ni ebakpãtã amɛhiɛ,+ no hewɔ lɛ, amɛgboi yɛ Yehowa hiɛ.+ 3 Ni Mose kɛɛ Aaron akɛ: “Nɔ ni Yehowa kɛɛ nɛ, ‘Esa akɛ afee mi krɔŋkrɔŋ yɛ mɛi ni bɛŋkɛ mi lɛ ateŋ,+ ni awo mihiɛ nyam yɛ maŋbii lɛ fɛɛ ahiɛ.’” Ni Aaron etswaaa esɛŋ.
4 No hewɔ lɛ, Mose tsɛ Mishael kɛ Elzafan, ni ji Aaron tsɛkwɛ̃ Uziel+ bihii lɛ, ni ekɛɛ amɛ akɛ: “Nyɛbaa nyɛbaholea nyɛnyɛmimɛi lɛ kɛjea he krɔŋkrɔŋ lɛ hiɛ kɛyaa nsara lɛ sɛɛ he ko.” 5 No hewɔ lɛ, amɛba ni amɛbahole gbohii lɛ be ni amɛwo amɛtadei kakadaji lɛ lolo, ni amɛkɛ amɛ tee nsara lɛ sɛɛ he ko, tamɔ bɔ ni Mose kɛɛ amɛ lɛ pɛpɛɛpɛ.
6 Ni Mose kɛɛ Aaron kɛ ebihii krokomɛi ni ji Eleazar kɛ Itamar lɛ akɛ: “Nyɛkahãa nyɛyiteŋ fea tsaŋtsaŋ, ni nyɛkagbálaa nyɛtadei lɛ hu,+ koni nyɛkagboi, ní Nyɔŋmɔ mli wo la ewo maŋ muu lɛ fɛɛ. Nyɛnyɛmimɛi lɛ, ni ji Israelbii lɛ fɛɛ baafó mɛi ni Yehowa kɛ la lɛ gbe amɛ lɛ. 7 Nyɛkajea kpee buu lɛ shinaa lɛ naa, kɛjeee nakai lɛ nyɛbaagboi, ejaakɛ Yehowa mufɔɔ mu lɛ yɛ nyɛnɔ.”+ No hewɔ lɛ, amɛfee tamɔ bɔ ni Mose wie lɛ pɛpɛɛpɛ.
8 Ni Yehowa kɛɛ Aaron akɛ: 9 “Kaanu wain loo dãa kroko ni wa, bo kɛ obihii ni fata ohe lɛ fɛɛ kɛ́ nyɛmiiba kpee buu lɛ mli,+ koni nyɛkagboi. Eji mla ni kã shi daa hã nyɛyinɔi lɛ fɛɛ. 10 Enɛ baahã nyɛna srɔto ni yɔɔ nɔ krɔŋkrɔŋ kɛ nɔ ni bɛ krɔŋkrɔŋ teŋ, nɔ ni he tse kɛ nɔ ni he tseee teŋ,+ 11 koni nyɛtsɔɔ Israelbii lɛ mlai* fɛɛ ni Yehowa tsɔ Mose nɔ ekɛhã amɛ lɛ.”+
12 Ni Mose kɛɛ Aaron kɛ ebihii ni eshwɛ, ni ji Eleazar kɛ Itamar lɛ akɛ: “Nyɛŋɔa ŋmaa* afɔle lɛ mli nɔ ni shwɛ yɛ afɔlei ni akɛ la shãa ahãa Yehowa lɛ amli lɛ, ní nyɛyea lɛ akɛ blodo ni ashikishaŋ-sha* bɛ mli, yɛ afɔleshaa latɛ lɛ masɛi,+ ejaakɛ eji nɔ krɔŋkrɔŋ fe fɛɛ.+ 13 Nyɛyea yɛ he ko ni yɔɔ krɔŋkrɔŋ,+ ejaakɛ eji ogbɛfaŋnɔ kɛ obihii lɛ hu agbɛfaŋnɔ yɛ afɔlei ni akɛ la shãa ahãa Yehowa lɛ amli, ejaakɛ nakai ji bɔ ni afã mi. 14 Agbɛnɛ hu, nyɛyea tsitsi lɛ ni akɛhã akɛ fɔ̃ɔ afɔle lɛ kɛ nane lɛ ni akɛhã akɛ gbɛfaŋnɔ krɛdɛɛ*+ lɛ yɛ he ko ni tse, bo kɛ obihii kɛ obiyei ni fata ohe lɛ,+ ejaakɛ akɛ nibii nɛɛ ehã akɛ ogbɛfaŋnɔ kɛ obihii lɛ hu agbɛfaŋnɔ yɛ Israelbii lɛ anaanyobɔɔ afɔlei lɛ amli. 15 Amɛkɛ nane ni akɛhã akɛ gbɛfaŋnɔ krɛdɛɛ lɛ kɛ tsitsi lɛ ni akɛhã akɛ fɔ̃ɔ afɔle lɛ afata fɔ afɔlei ni akɛ la shãa lɛ ahe kɛba, koni afɔ̃ fɔ̃ɔ afɔle lɛ kɛya kɛba yɛ Yehowa hiɛ; ni etsɔ gbɛfaŋnɔ ni kã shi daa hã bo kɛ obihii ni fata ohe lɛ,+ tamɔ bɔ ni Yehowa fã lɛ pɛpɛɛpɛ.”
16 Ni Mose tao esha afɔle abotia+ lɛ aahu, ni ena akɛ ashã lɛ. No hewɔ lɛ, emli wo la ewo Eleazar kɛ Itamar, ni ji Aaron bihii ni eshwɛ lɛ, ni ekɛɛ: 17 “Mɛni hewɔ nyɛyeee esha afɔle lɛ yɛ he ni yɔɔ krɔŋkrɔŋ lɛ,+ ejaakɛ eji nɔ krɔŋkrɔŋ fe fɛɛ, ni ekɛhã nyɛ koni nyɛtere maŋbii lɛ anɔtɔmɔ lɛ, ní nyɛkpãtã nyɛhã amɛ yɛ Yehowa hiɛ? 18 Naa! Akɛ elá lɛ bako he ni yɔɔ krɔŋkrɔŋ lɛ.+ Kulɛ esa akɛ nyɛye yɛ he krɔŋkrɔŋ lɛ, tamɔ bɔ ni afã mi lɛ pɛpɛɛpɛ.” 19 Aaron hã Mose hetoo akɛ: “Naa! Ŋmɛnɛ lɛ, amɛkɛ amɛhe esha afɔle kɛ amɛshãa afɔle lɛ ba Yehowa hiɛ,+ ni kɛ̃lɛ, nibii nɛɛ eba minɔ. Eji ŋmɛnɛ lɛ miye esha afɔle lɛ kulɛ, ani Yehowa baaná he miishɛɛ?” 20 Be ni Mose nu enɛ lɛ, etsui nyɔ emli.