2 Mose
9 No hewɔ lɛ, Yehowa kɛɛ Mose akɛ: “Yaa Farao ŋɔɔ ní oyakɛɛ lɛ akɛ, ‘Bɔ ni Yehowa, Hebribii lɛ a-Nyɔŋmɔ lɛ kɛɛ nɛ: “Hã mimaŋ lɛ aya koni amɛyasɔmɔ mi.+ 2 Shi kɛ́ ohãaa amɛya, ni otee nɔ otsĩ amɛnaa lɛ, 3 naa! Yehowa baatswia+ okooloi ni yɔɔ ŋa lɛ mli lɛ nii.* Hela ní naa wa waa baamɔmɔ okpɔŋɔi lɛ kɛ tejii lɛ kɛ afukpɔŋɔi lɛ kɛ tsinai lɛ kɛ toi lɛ.+ 4 Ni Yehowa baahã ana srɔto ni yɔɔ Israel kooloi lɛ kɛ Ejipt kooloi lɛ ateŋ, ni Israelbii lɛ anɔ lɛ eko eko gboŋ.”’”+ 5 Agbɛnɛ hu, Yehowa to be ekɛɛ: “Wɔ́ lɛ, Yehowa baafee enɛ yɛ shikpɔŋ lɛ nɔ.”
6 Ni enɔ jetsɛremɔ nɔŋŋ lɛ, Yehowa fee nakai, ni kooloi srɔtoi fɛɛ ni yɔɔ Ejipt lɛ bɔi gboimɔ,+ shi Israel kooloi lɛ ateŋ ekome folo po gbooo. 7 Be ni Farao tao mli lɛ, naa! Israel kooloi lɛ ateŋ ekome folo po gboko. Fɛɛ sɛɛ lɛ, Farao tsuiŋ wa lolo, ni ehãaa maŋ lɛ aya.+
8 Ni Yehowa kɛɛ Mose kɛ Aaron akɛ: “Nyɛwoa nyɛkɔkɔi obɔbɔ kɛ flɔnɔɔ* mli lamulu,* ni Mose afɔ̃ awo kɔɔyɔɔ lɛ mli yɛ Farao hiɛ. 9 Ni ebaatsɔ mulu, ni ebaaha Ejipt shikpɔŋ lɛ nɔ fɛɛ, ni ebaatsɔ asanei ní fuɔ waa, ni ebaatsɛ̃rɛ̃ gbɔmɛi kɛ kooloi yɛ Ejipt shikpɔŋ lɛ nɔ fɛɛ.”
10 No hewɔ lɛ, amɛkpiti flɔnɔɔ mli lamulu lɛ ni amɛyadamɔ Farao hiɛ, ni Mose fɔ̃ ewo kɔɔyɔɔ lɛ mli, ni etsɔ asanei ní fuɔ waa, ni etsɛ̃rɛ̃ gbɔmɛi kɛ kooloi. 11 Majikfeelɔi lɛ nyɛɛɛ Mose hiɛ adamɔ yɛ asanei lɛ ahewɔ, ejaakɛ asanei lɛ etsɛ̃rɛ̃ majikfeelɔi lɛ kɛ Ejiptbii lɛ fɛɛ.+ 12 Shi Yehowa ŋmɛ gbɛ ni Farao kpiliŋ etsui, ni ebooo amɛ toi, tamɔ bɔ ni Yehowa ekɛɛ Mose lɛ.+
13 Ni Yehowa kɛɛ Mose akɛ: “Tee shi leebi maŋkpa ní oyadamɔ Farao hiɛ, ni okɛɛ lɛ akɛ, ‘Bɔ ni Yehowa, Hebribii lɛ a-Nyɔŋmɔ lɛ kɛɛ nɛ: “Hã mimaŋ lɛ aya koni amɛyasɔmɔ mi. 14 Kɛjeee nakai lɛ, mahã mihaomɔi lɛ fɛɛ aba bo, otsuji lɛ, kɛ omaŋbii lɛ anɔ, koni oná ole akɛ mɔ ko mɔ ko bɛ ni tamɔ mi yɛ shikpɔŋ lɛ nɔ fɛɛ.+ 15 Ejaakɛ kulɛ, benɛ nɛɛ mikpã minine mli mihã hela ko ni naa wa waa emɔ bo kɛ omaŋbii* lɛ, ni kulɛ, benɛ nɛɛ akpãtã ohiɛ* kɛje shikpɔŋ lɛ nɔ momo. 16 Shi nɔ tuuntu hewɔ ní mihã otee nɔ ohi wala mli lɛ nɛ: koni majie mihewalɛ lɛ kpo matsɔɔ bo, ní ajaje migbɛ́i lɛ atsɔɔ yɛ shikpɔŋ lɛ nɔ fɛɛ.+ 17 Ani okã he oowó ohe nɔ yɛ mimaŋbii lɛ anɔ, ni ohãaa amɛya? 18 Naa, wɔ́ aaafee nɛkɛ beiaŋ lɛ, mahã nyɔŋmɔŋtɛi anɛ waa diɛŋtsɛ, bɔ ni eko bako pɛŋ yɛ Ejipt kɛjɛ gbi nɔ ní ato maŋ lɛ kɛbashi amrɔ nɛɛ. 19 No hewɔ lɛ, tsu ni ayaŋɔ okooloi fɛɛ kɛ onii fɛɛ ni yɔɔ ŋa mli lɛ kɛbawo tsũ mli. Gbɔmɔ fɛɛ gbɔmɔ kɛ kooloo fɛɛ kooloo ni abaana yɛ ŋa mli ní akɛ lɛ baaa shĩa lɛ, kɛji nyɔŋmɔŋtɛi lɛ nɛ shwie amɛnɔ lɛ, amɛbaagboi.”’”
20 Farao tsuji lɛ ateŋ mɔ fɛɛ mɔ ní yashe Yehowa wiemɔ lɛ gbeyei lɛ he fee oya ni eyaŋɔ lɛ diɛŋtsɛ etsuji kɛ ekooloi kɛba shĩa,* 21 shi mɔ fɛɛ mɔ ní ebuuu Yehowa wiemɔ* lɛ shi etsuji kɛ ekooloi yɛ ŋa lɛ mli.
22 Agbɛnɛ, Yehowa kɛɛ Mose akɛ: “Kpã onine mli otsɔɔ ŋwɛigbɛ, koni nyɔŋmɔŋtɛi lɛ anɛ yɛ Ejipt shikpɔŋ lɛ nɔ fɛɛ,+ enɛ eshwie gbɔmɔ kɛ kooloo kɛ kwɛ̃ɛ nii fɛɛ ni yɔɔ Ejipt shikpɔŋ lɛ nɔ lɛ anɔ.”+ 23 No hewɔ lɛ, Mose kpã etso lɛ mli etsɔɔ ŋwɛigbɛ, ni Yehowa hã nugbɔshiimɔ, nyɔŋmɔŋtɛi, kɛ la* ba shikpɔŋ lɛ nɔ, ni Yehowa hã nyɔŋmɔŋtɛi lɛ tee nɔ enɛ yɛ Ejipt shikpɔŋ lɛ nɔ. 24 Nyɔŋmɔŋtɛi lɛ nɛ, ni la kpɛlɛ plamplam yɛ nyɔŋmɔŋtɛi lɛ ateŋ. Enaa wa waa; anako enɔ dã yɛ Ejipt shikpɔŋ lɛ nɔ kɛjɛ be ni etsɔ jeŋmaŋ nɛɛ.+ 25 Nyɔŋmɔŋtɛi lɛ kpãtã nɔ fɛɛ nɔ ni yɔɔ ŋa mli yɛ Ejipt shikpɔŋ lɛ nɔ fɛɛ lɛ hiɛ, kɛjɛ gbɔmɔ nɔ kɛyashi kooloo nɔ, ni ekpãtã kwɛ̃ɛ nii lɛ fɛɛ ahiɛ, ni ekumɔ tsei fɛɛ ni yɔɔ ŋa mli lɛ.+ 26 Goshen shikpɔŋ lɛ nɔ, he ni Israelbii lɛ yɔɔ lɛ pɛ nyɔŋmɔŋtɛi lɛ enɛɛɛ yɛ.+
27 No hewɔ lɛ, Farao tsu ayatsɛ Mose kɛ Aaron kɛba, ni ekɛɛ amɛ akɛ: “Agbɛnɛ, mina akɛ mifee esha. Jalɔ ji Yehowa, shi mi kɛ mimaŋbii lɛ moŋ wɔtɔ̃. 28 Kpa Yehowa fai koni ehã enugbɔshiimɔi kɛ nyɔŋmɔŋtɛi lɛ asɛɛ afo. Kɛkɛ lɛ, mahã nyɛya, ni nyɛhiŋ biɛ dɔŋŋ.” 29 No hewɔ lɛ, Mose kɛɛ lɛ akɛ: “Kɛ́ mije kpo yɛ maŋ lɛ mli nɔŋŋ lɛ, magbɛ minijiaŋ yɛ Yehowa hiɛ. Nugbɔshiimɔi lɛ asɛɛ baafo, ni nyɔŋmɔŋtɛi lɛ eyaŋ nɔ enɛŋ dɔŋŋ, koni oná ole akɛ, shikpɔŋ lɛ Yehowa nɔ ni.+ 30 Shi bo kɛ otsuji lɛ, mile momo akɛ no po hãŋ nyɛshe Yehowa Nyɔŋmɔ gbeyei.”
31 Agbɛnɛ, akpãtã flaks* tsei lɛ kɛ barle* tsei lɛ ahiɛ, ejaakɛ no mli lɛ, barle tsei lɛ ewo, ni flaks tsei lɛ hu egba afoforo. 32 Shi wiitii kɛ spɛlt* lɛ ahiɛ kpãtãaa, ejaakɛ nomɛi lɛ, amɛkpeɔ sɛɛ kɛwoɔ.* 33 Agbɛnɛ, Mose je Farao ŋɔɔ ni eje kpo yɛ maŋ lɛ mli, ni eyagbɛ enijiaŋ yɛ Yehowa hiɛ, ni nugbɔshiimɔi lɛ kɛ nyɔŋmɔŋtɛi lɛ asɛɛ fo, ni nugbɔ lɛ kpa nɛmɔ yɛ shikpɔŋ lɛ nɔ.+ 34 Be ni Farao na akɛ nugbɔnɛmɔ lɛ, nyɔŋmɔŋtɛi lɛ, kɛ nugbɔshiimɔi lɛ asɛɛ efo lɛ, esaa efee esha ekoŋŋ kɛtsɔ etsui ní ekpiliŋ+ lɛ nɔ, lɛ kɛ etsuji lɛ fɛɛ. 35 Ni Farao tee nɔ ekpiliŋ etsui, ni ehãaa Israelbii lɛ aya, tamɔ bɔ ni Yehowa etsɔ Mose nɔ ewie lɛ.+