12 Mɔ ni sumɔɔ tsɔsemɔ lɛ, esumɔɔ nilee,+
Shi mɔ ni nyɛɔ jajemɔ lɛ, ebɛ jwɛŋmɔ. +
2 Gbɔmɔ kpakpa hiɛ baa nyam yɛ Yehowa hiɛ,
Shi mɔ ni toɔ ŋaa fɔŋ lɛ, ebuɔ lɛ fɔ.+
3 Efɔŋfeemɔ hãaa mɔ ko ahi shi ni oshãra ko ninaaa lɛ,+
Shi jalɔi ashishifã lɛ, afãŋ kɔkɔɔkɔ.
4 Yoo kpakpa lɛ, eji akekere hã ewu,+
Shi ŋa ni feɔ hiɛgbejianii lɛ, etamɔ hela ni hãa ewu wuiaŋ kpɔtɔɔ.+
5 Jalɔi asusumɔi ja,
Shi mɛi fɔji aŋaawoo lɛ, lakamɔ ni.
6 Mɛi fɔji awiemɔi tamɔ mɔ ko ni etee ehe koni egbe mɔ ko;+
Shi jalɔi anaabu lɛ, yiwalaheremɔ ni.+
7 Kɛ́ abutu mɛi fɔji lɛ, amɛshishi tãa,
Shi jalɔi ashĩa baaya nɔ ama shi.+
8 Gbɔmɔ ni wieɔ hiɛshikamɔ wiemɔi lɛ, ajieɔ eyi,+
Shi mɔ ni tsui ekɔ̃dɔ̃ lɛ, abaagbe ehe guɔ.+
9 Mɔ ni abuuu lɛ tsɔ ni eyɔɔ tsulɔ lɛ hi fe
Mɔ ni woɔ lɛ diɛŋtsɛ ehiɛ nyam ni ebɛ niyenii. +
10 Jalɔ kwɛɔ eshĩa kooloi jogbaŋŋ,+
Shi mɛi fɔji amɔbɔnalɛ po lɛ, yiwaa ni.
11 Mɔ ni huɔ eshikpɔŋ lɛ baaná niyenii eye ni etɔ,+
Shi mɔ ni tiuɔ nibii ni he bɛ sɛɛnamɔ sɛɛ lɛ, ebɛ jwɛŋmɔ.
12 Mɔ fɔŋ hiɛ kɔ̃ɔ nɔ ni efɔŋfeelɔi krokomɛi emɔ lɛ nɔ,
Shi jalɔi ashishifã woɔ yibii.
13 Efɔŋfeelɔ lɛ, lɛ diɛŋtsɛ ewiemɔi fɔji lɛ nɔŋŋ ni duɔ lɛ,+
Shi jalɔ jeɔ haomɔ mli.
14 Gbɔmɔ daaŋ yibii hãa etɔɔ kɛ nibii kpakpai,+
Ni eninenaa nitsumɔ ji nɔ ni baajwere lɛ.
15 Buulu gbɛ ja yɛ lɛ diɛŋtsɛ ehiɛ,+
Shi hiɛshikalɔ boɔ ŋaawoo toi.+
16 Buulu jieɔ emlifu kpo oya,+
Shi hiɛtɛ̃lɔ kuɔ ehiɛ efɔ̃ɔ jɛmɔ nɔ.
17 Odasefonyo anɔkwafo baawie anɔkwale lɛ,
Shi amale odasefonyo lakaa mɔ.
18 Wiemɔ ni awieɔ ni asusuuu he lɛ, etamɔ nɔ ni aabamɔ klante,
Shi hiɛshikalɔi alilɛi tsaa mɔ.+
19 Naabu ni wieɔ anɔkwale lɛ baahi shi kɛya naanɔ,+
Shi lilɛi ni maleɔ lɛ baahi shi be kukuoo ko.+
20 Mɛi ni toɔ ŋaa fɔŋ lɛ, lakamɔ yɛ amɛtsui mli,
Shi mɛi ni sumɔɔ toiŋjɔlɛ lɛ yɛ miishɛɛ.+
21 Sane fɔŋ ko baŋ jalɔ nɔ,+
Shi mɛi fɔji baayimɔ obɔbɔ kɛ amanehulu.+
22 Naabu ni maleɔ lɛ, Yehowa miihi,+
Shi mɛi ni yeɔ anɔkwa lɛ hãa enáa miishɛɛ.
23 Hiɛtɛ̃lɔ tsĩɔ nɔ ni ele lɛ nɔ,
Shi buulu tsui jieɔ ebuulufeemɔ lɛ kpo.+
24 Mɔdɛŋbɔlɔi anine baaye nɔ,+
Shi abaanyɛ niji ni tsuuu nii lɛ anɔ ni amɛtsu nii.+
25 Gbɔmɔ tsui mli ŋkɔmɔyeli hãa ehaoɔ,+
Shi wiemɔ kpakpa hãa enáa miishɛɛ.+
26 Jalɔ pɛiɔ ekooloi alɛɛhei lɛ amli ekwɛɔ,
Shi mɛi fɔji agbɛ lɛ hãa amɛduɔ gbɛ.
27 Anihaolɔ tiuuu kooloo ni agbɔbiɔ lɛ,+
Shi mɔdɛŋbɔɔ lɛ, eji gbɔmɔ jwetri ni jara wa.
28 Jalɛ nifeemɔ gbɛ kɛ mɔ yaa wala mli;+
Ni gbele bɛ egbɛ nɔ.