Yesaia
16 Nyɛjɛa Sela kɛtsɔa ŋa lɛ nɔ
Kɛyaa Zion biyoo lɛ gɔŋ lɛ nɔ,
Ni nyɛkɛ gwantɛŋnuu ayahãa shikpɔŋ lɛ nɔyelɔ lɛ.
2 Bɔ ni loofɔlɔ feɔ kɛ́ ashwie lɛ kɛje etsũ mli lɛ,+
Nakai Moab biyei lɛ baafee yɛ hei ni afoɔ Arnon+ Faa lɛ yɛ lɛ.
3 “Nyɛwoa ŋaa, nyɛtsua yiŋkpɛɛ lɛ he nii.
Shwane fintiŋŋ lɛ, nyɛhãa nyɛhɔɔŋ lɛ afea tamɔ jenamɔ.
Nyɛkɛ mɛi ni egbɛ eshwã lɛ atoa, ni nyɛkajiea mɛi ni miijo foi lɛ nyɛhãa.
4 Ao Moab, hã miwebii ni egbɛ eshwã lɛ ahi omli.
Tsɔ teemɔhe ohã amɛ yɛ hiɛkpatalɔ lɛ hewɔ.+
Yiwalɔ lɛ naagbee baaba,
Hiɛkpatamɔ lɛ baaba naagbee,
Ni mɛi ni naanaa mɛi anɔ lɛ ahiɛ baakpãtã kɛje shikpɔŋ lɛ nɔ.
5 Kɛkɛ lɛ, akɛ suɔmɔ ni tsakeee baato maŋtsɛ sɛi ko ama shi shiŋŋ.
Mɔ ni ta nɔ yɛ David mama tsũ lɛ mli lɛ baaye anɔkwa;+
Ebaakojo yɛ jalɛ naa, ni ebaafee jalɛ nii oya.”+
6 Wɔnu Moab shwãa lɛ he—eshwãa waa+—
Wɔnu ehenɔwomɔ, kɛ eshwãa, kɛ emlifu lɛ he;+
Shi eshwãa lɛ baafee efolo.
Mɛi ni atswia amɛ nii lɛ baakɛ̃mɔ yɛ Kir-hareset+ wain yibii keekii lɛ ahewɔ.
8 Ejaakɛ Heshbon+ ŋmɔji lɛ eŋala,
Sibma+ wain tso lɛ,
Jeŋmaji lɛ anɔyelɔi lɛ enaanaa etsei niji tsuji* lɛ anɔ;
Amɛyashɛ Yazer+ tɔ̃ɔ;
Amɛtsa nɔ kɛtee ŋa lɛ nɔ.
Eniji lɛ amli ekpã, amɛmli ekpã kɛtee ŋshɔ lɛ naa tɔ̃ɔ.
9 No hewɔ ni mafó yɛ Sibma wain tso lɛ hewɔ tamɔ mifó yɛ Yazer hewɔ lɛ.
Bo Heshbon kɛ Eleale,+ mikɛ miyaafonui lɛ baafɔ nyɛ,
Ejaakɛ nyamɔ ni anyaa yɛ olatsa beiaŋ aduawa lɛ kɛ onikpamɔ lɛ hewɔ lɛ eba naagbee.*
10 Nyamɔ kɛ miishɛɛ sɛɛ efo yɛ aduawa ŋmɔ lɛ mli,
Ni nyamɔ kɛ nyamɔ lalai asɛɛ efo yɛ wain ŋmɔji lɛ amli.+
Mɔ ni naanaa wain yibii anɔ lɛ enaaa wain yibii anɔ dɔŋŋ yɛ hei ni aŋaa wain yɛ lɛ,
Ejaakɛ mihã nyamɔ lɛ sɛɛ efo.+
11 No hewɔ ni mimli gbɛɔ yɛ Moab+ hewɔ,
Tamɔ bɔ ni saŋku mli kpãa jijeɔ lɛ,
Ni mimusuŋ hu gbɛɔ yɛ Kir-hareset+ hewɔ lɛ.
12 Kɛ́ Moab yagbo deŋme yɛ he grɔŋŋ lɛ, ni etee eyasɔle yɛ ehe krɔŋkrɔŋ lɛ po, ebaafee efolo.+
13 Enɛ ji wiemɔ ni Yehowa tsɔ hiɛ ewie yɛ Moab he. 14 Shi nɔ ni Yehowa kɛɔ bianɛ ji akɛ: “Biɛ afii etɛ pɛpɛɛpɛ, tamɔ bɔ ni apaafonyo buɔ efii lɛ,* akɛ haomɔi srɔtoi fɛɛ baashwie Moab anunyam lɛ hiɛ shi, ni ebaashwɛ mɛi fioo pɛ, ni amɛnáŋ hewalɛ ko.”+