Yesaia
36 Yɛ Maŋtsɛ Hezekia nɔyeli afi ni ji 14 lɛ nɔ lɛ, Asiria+ maŋtsɛ Senakerib kwɔ kɛba ni ekɛ Yuda maji fɛɛ ni atswa gbogboi awo amɛhe lɛ bawu, ni eŋɔ amɛ.+ 2 Kɛkɛ ni Asiria maŋtsɛ lɛ tsu Rabshake*+ lɛ kɛ asraafoi babaoo kɛjɛ Lakish+ kɛtee Maŋtsɛ Hezekia ŋɔɔ yɛ Yerusalem. Amɛyadamɔ ŋwɛigbɛ kpaakpo lɛ gɔɔta lɛ,+ ni yɔɔ gbɛ ni yaa niiahefɔlɔi ashikpɔŋ lɛ nɔ lɛ masɛi lɛ he.+ 3 Kɛkɛ ni Eliakim,+ Hilkia binuu lɛ, ni ji mɔ ni kwɛɔ maŋtsɛ shĩa lɛ nɔ lɛ, kɛ Shebna,+ ni ji woloŋmalɔ lɛ, kɛ Yoa, Asaf binuu lɛ, ni ji saji aŋmalalɔ lɛ, je kpo kɛba ni amɛkɛ lɛ bakpe.
4 No hewɔ lɛ, Rabshake lɛ kɛɛ amɛ akɛ: “Nyɛfainɛ, nyɛkɛa Hezekia akɛ, ‘Nɔ ni maŋtsɛ kpeteŋkpele lɛ, ni ji Asiria maŋtsɛ lɛ kɛɛ nɛ: “Mɛni nɔ kwraa okɛ ohiɛ efɔ̃?+ 5 Okɛɔ akɛ, ‘Mile bɔ ni awuɔ ta, ni miyɛ hewalɛ hu,’ shi owiemɔi lɛ naafuu wiemɔi kɛkɛ ni. Namɔ nɔ okɛ ohiɛ efɔ̃ hewɔ ni otse mihiɛ atua lɛ?+ 6 Naa! Okɛ ohiɛ efɔ̃ Ejipt, ni tamɔ gãlã ni eku etã nɛɛ nɔ, nɔ ni kɛ́ mɔ ko yakpasa lɛ, ebaagbu edɛ̃ kɛje kpo lɛ. Nɛkɛ ji bɔ ni Farao, Ejipt maŋtsɛ lɛ ji kɛhã mɛi fɛɛ ni kɛ amɛhiɛ fɔ̃ɔ enɔ lɛ.+ 7 Ni kɛ́ okɛɛ mi akɛ, ‘Wɔkɛ wɔhiɛ efɔ̃ Yehowa, wɔ-Nyɔŋmɔ lɛ nɔ’ lɛ, ani jeee ehei grɔŋŋi kɛ efɔleshaa latɛi lɛ Hezekia jie+ ni ekɛɛ Yuda kɛ Yerusalem akɛ, ‘Nyɛjáa yɛ afɔleshaa latɛ nɛɛ hiɛ’ lɛ?”’+ 8 No hewɔ lɛ, ofainɛ, jee minuŋtsɔ Asiria+ maŋtsɛ lɛ ŋwane: Mahã bo okpɔŋɔi 2,000 akɛ obaaná mɛi ni baatara nɔ lo. 9 No hewɔ lɛ, ni okɛ ohiɛ efɔ̃ Ejipt nɔ kɛhã shwiilii kɛ okpɔŋɔnɔtaralɔi nɛɛ, te ooofee tɛŋŋ oshwie amralo kome, ni ji minuŋtsɔ tsuji lɛ ateŋ mɔ bibioo kwraa lɛ po lɛ? 10 Ani jeee Yehowa ji mɔ ni tsu mi koni mikwɔ kɛba biɛ ni mibakpãtã shikpɔŋ nɛɛ hiɛ? Yehowa diɛŋtsɛ kɛɛ mi akɛ, ‘Kwɔɔ kɛya ni okɛ shikpɔŋ nɛɛ ayawu ni okpãtã ehiɛ.’”
11 Kɛkɛ ni Eliakim, kɛ Shebna,+ kɛ Yoa kɛɛ Rabshake+ lɛ akɛ: “Ofainɛ, okɛ otsuji awie yɛ Aramaik* wiemɔ mli,+ ejaakɛ wɔnuɔ shishi; okɛ wɔ akawie yɛ Yudafoi lɛ awiemɔ mli, koni mɛi ni yɔɔ gbogbo lɛ nɔ lɛ akanu.”+ 12 Shi Rabshake lɛ kɛɛ akɛ: “Ani nyɛ kɛ nyɛnuŋtsɔ lɛ pɛ ŋɔɔ minuŋtsɔ tsu mi ni mikɛ nyɛ abawie wiemɔi nɛɛ? Ani mɛi ni tara gbogbo lɛ nɔ lɛ hu fataaa he? Nyɛ kɛ amɛ fɛɛ lɛ, mɔ fɛɛ mɔ baaye lɛ diɛŋtsɛ efei, ni ebaanu lɛ diɛŋtsɛ eshamɔ.”
13 Kɛkɛ ni Rabshake lɛ te shi edamɔ shi ni ebolɔ waa yɛ Yudafoi lɛ awiemɔ lɛ mli+ ekɛɛ: “Nyɛboa maŋtsɛ kpeteŋkpele lɛ, ni ji Asiria maŋtsɛ+ lɛ toi. 14 Nɔ ni maŋtsɛ lɛ kɛɛ nɛ, ‘Nyɛkahãa Hezekia lakaa nyɛ, ejaakɛ enyɛŋ ejie nyɛ.+ 15 Ni nyɛkahãa Hezekia lakaa nyɛ ni nyɛkɛ nyɛhiɛ fɔ̃ Yehowa+ nɔ kɛ wiemɔi nɛɛ akɛ: “Yehowa baajie wɔ kɛ̃, ni akɛ maŋ nɛɛ woŋ Asiria maŋtsɛ lɛ dɛŋ.” 16 Nyɛkaboa Hezekia toi, ejaakɛ nɔ ni Asiria maŋtsɛ lɛ kɛɛ nɛ: “Nyɛkɛ mi abakpãtãa, ni nyɛŋmɛa nyɛhe nyɛhãa mi,* ni nyɛteŋ mɔ fɛɛ mɔ baaye lɛ diɛŋtsɛ ewain tso yibii kɛ egbami tso yibii ni ebaanu lɛ diɛŋtsɛ ebu ni akɛtoɔ nu lɛ mli nu, 17 kɛyashi maba ni mabaloo nyɛ kɛya shikpɔŋ ni tamɔ nyɛ diɛŋtsɛ nyɛshikpɔŋ lɛ nɔ,+ shikpɔŋ ni ŋmaa* kɛ wain hee yɔɔ nɔ, shikpɔŋ ni blodo* kɛ wain ŋmɔji yɔɔ nɔ. 18 Nyɛkahãa Hezekia lakaa nyɛ ekɛa akɛ, ‘Yehowa baajie wɔ.’ Ani jeŋmaji lɛ anyɔŋmɔi lɛ eko enyɛ ejie eshikpɔŋ lɛ kɛje Asiria maŋtsɛ lɛ dɛŋ?+ 19 Nɛgbɛ Hamat kɛ Arpad+ nyɔŋmɔi lɛ yɔɔ? Nɛgbɛ Sefarvaim+ nyɔŋmɔi lɛ yɔɔ? Ani amɛnyɛ amɛjie Samaria kɛje midɛŋ?+ 20 Shikpɔji nɛɛ anyɔŋmɔi lɛ ateŋ namɔ enyɛ ejie eshikpɔŋ kɛje midɛŋ hewɔ ni Yehowa baajie Yerusalem kɛje midɛŋ lɛ?”’”+
21 Shi amɛfee diŋŋ ni amɛhãaa lɛ hetoo ko, ejaakɛ maŋtsɛ lɛ efã amɛ akɛ, “Nyɛkafoa edaaŋ.”+ 22 Shi Eliakim, Hilkia binuu lɛ, ni ji mɔ ni kwɛɔ maŋtsɛ shĩa lɛ nɔ lɛ, kɛ Shebna,+ ni ji woloŋmalɔ lɛ, kɛ Yoa, Asaf binuu lɛ, ni ji saji aŋmalalɔ lɛ ba Hezekia ŋɔɔ, kɛ amɛtadei ni amɛgbala, ni amɛbabɔ lɛ nibii ni Rabshake lɛ wie lɛ.