Yesaia
39 Nakai be lɛ mli lɛ, Babilon maŋtsɛ Merodak-baladan, Baladan binuu lɛ, ŋmala woji ni ekɛ woji lɛ kɛ nikeenii tsu ni akɛbahã Hezekia,+ ejaakɛ enu akɛ hela mɔ Hezekia ni ená hewalɛ.+ 2 Hezekia here amɛ kɛ miishɛɛ ni etsɔɔ amɛ enitoohe lɛ mli nii+—jwiɛtɛi lɛ, kɛ shika tsuru lɛ, kɛ balsam mu lɛ, kɛ mui kpakpai krokomɛi lɛ, kɛ etawuu nii lɛ fɛɛ, kɛ nɔ fɛɛ nɔ ni yɔɔ enitoohei lɛ. Nɔ ko nɔ ko bɛ ni yɔɔ Hezekia diɛŋtsɛ maŋtsɛ shĩa lɛ kɛ enɔyeli lɛ mli fɛɛ ni ekɛtsɔɔɔ amɛ.
3 No sɛɛ lɛ, gbalɔ Yesaia ba Maŋtsɛ Hezekia ŋɔɔ ebabi lɛ akɛ: “Nɛgbɛ hii nɛɛ jɛ, ni mɛni amɛkɛɛ?” Ni Hezekia kɛɛ akɛ: “Amɛjɛ he ko shɔŋŋ, amɛjɛ Babilon tɔ̃ɔ.”+ 4 No sɛɛ lɛ, Yesaia bi lɛ akɛ: “Mɛni amɛna yɛ omaŋtsɛ shĩa lɛ mli?” Hezekia kɛɛ lɛ akɛ: “Amɛna nɔ fɛɛ nɔ ni yɔɔ mimaŋtsɛ shĩa lɛ mli. Nɔ ko nɔ ko bɛ minitoohei lɛ ni mikɛtsɔɔɔ amɛ.”
5 Agbɛnɛ, Yesaia kɛɛ Hezekia akɛ: “Bo nɔ ni Yehowa, taiatsɛ lɛ, kɛɛ lɛ toi, 6 ‘Naa! Gbii miiba, ni abaaloo nɔ fɛɛ nɔ ni yɔɔ omaŋtsɛ shĩa lɛ kɛ nɔ fɛɛ nɔ ni otsɛmɛi lɛ kɛto kɛbashi ŋmɛnɛ lɛ kɛya Babilon. Ashiŋ nɔ ko nɔ ko,’+ Yehowa kɛɛ.+ 7 ‘Ni akɛ bo diɛŋtsɛ oseshibii* ni obaatsɔ amɛtsɛ lɛ hu baaya, ni amɛbaatsɔmɔ maŋtsɛ shĩa onukpai yɛ Babilon maŋtsɛ lɛ maŋtsɛ shĩa lɛ.’”+
8 Kɛkɛ ni Hezekia kɛɛ Yesaia akɛ: “Nɔ ni Yehowa etsɔ onɔ ewie lɛ ja.” Ni ewie kɛfata he akɛ: “Ejaakɛ toiŋjɔlɛ kɛ shweshweeshwe shihilɛ* baahi shi yɛ miwala beiaŋ.”*+