Yohane Klɛŋklɛŋ Wolo Lɛ

1 Nɔ ni yɔɔ kɛjɛ shishijee lɛ, ni wɔnu, ni wɔna kɛ wɔhiŋmɛii, ni wɔkwɛ ni wɔniji tara he, ni kɔɔ wala wiemɔ lɛ he lɛ,+ 2 (hɛɛ, ajie wala lɛ kpo, ni wɔna ni wɔmiiye odase+ ni wɔmiibɔ nyɛ naanɔ wala+ ni no mli lɛ ekɛ Tsɛ lɛ yɔɔ, ni ajie lɛ kpo atsɔɔ wɔ lɛ he amaniɛ), 3 nɔ ni wɔna ni wɔnu lɛ, no he amaniɛ wɔbɔɔ nyɛ hu lɛ,+ koni nyɛ hu nyɛkɛ wɔ abɔ naanyo.* Ni Tsɛ lɛ kɛ e-Bi Yesu Kristo hu fata wɔnaanyobɔɔ nɛɛ he.+ 4 Ni wɔmiiŋma nibii nɛɛ koni miishɛɛ ni wɔ kɛ nyɛ fɛɛ yɔɔ lɛ ayi obɔ.

5 Sane ni wɔnu kɛjɛ eŋɔɔ ni wɔmiibɔ nyɛ he amaniɛ lɛ nɛ: Nyɔŋmɔ lɛ, la ji lɛ,+ ni duŋ ko kwraa bɛ emli.* 6 Kɛ́ wɔkɛɛ akɛ, “Wɔkɛ lɛ miibɔ naanyo,” shi wɔyaa nɔ wɔnyiɛɔ yɛ duŋ mli lɛ, no lɛ wɔmiimale ni wɔhiii shi yɛ anɔkwale lɛ naa.+ 7 Shi kɛ́ wɔnyiɛɔ yɛ la lɛ mli, tamɔ bɔ ni lɛ diɛŋtsɛ hu eyɔɔ la lɛ mli lɛ, no lɛ wɔkɛ wɔhe miibɔ naanyo, ni e-Bi Yesu lá lɛ hãa wɔhe tseɔ kɛjeɔ esha fɛɛ esha mli.+

8 Kɛ́ wɔkɛɛ akɛ, “Esha ko kwraa bɛ wɔhe” lɛ, no lɛ wɔmiilaka wɔ diɛŋtsɛ wɔhe,+ ni anɔkwale lɛ bɛ wɔmli. 9 Kɛ́ wɔjaje wɔhe eshai lɛ wɔtsɔɔ lɛ, anɔkwafo kɛ jalɔ ji lɛ, ni no hewɔ lɛ, ekɛ wɔhe eshai lɛ baake wɔ ni ebaahã wɔhe atse kɛje nii ni ejaaa fɛɛ mli.+ 10 Kɛ́ wɔkɛɛ akɛ, “Wɔfeko esha” lɛ, no lɛ wɔmiihã eetsɔ amalelɔ, ni ewiemɔ lɛ bɛ wɔmli.