Ezekiel
21 Yehowa kɛɛ mi ekoŋŋ akɛ: 2 “Gbɔmɔ bi,* tsɔ ohiɛ ohã Yerusalem, ni oshiɛ otsɔɔ hei krɔŋkrɔŋi lɛ, ni ogba oshi Israel shikpɔŋ lɛ. 3 Kɛɛmɔ Israel shikpɔŋ lɛ akɛ, ‘Nɔ ni Yehowa kɛɛ nɛ: “Naa, mikɛ bo ená, ni magbala miklante lɛ kɛjɛ ehebo lɛ mli,+ ni mafolɔ jalɔi kɛ mɛi fɔji fɛɛ kɛje omli mashwie. 4 Akɛni mafolɔ jalɔi kɛ mɛi fɔji fɛɛ kɛje omli mashwie hewɔ lɛ, magbala miklante lɛ kɛjɛ ehebo lɛ mli mawo heloo* fɛɛ, kɛjɛ wuoyi aahu kɛyashi kooyi. 5 Gbɔmɛi fɛɛ baaná ale akɛ mi, Yehowa, mi diɛŋtsɛ migbala miklante lɛ kɛjɛ ehebo lɛ mli. Ekuŋ esɛɛ eyaŋ mli dɔŋŋ.”’+
6 “Ni bo, gbɔmɔ bi,* kɛ̃ɛmɔ be ni okpokpoɔ* lɛ, hɛɛ, kɛ̃ɛmɔ waa yɛ amɛhiɛ.+ 7 Ni kɛ́ amɛbi bo akɛ, ‘Mɛni hewɔ okɛ̃mɔɔ? lɛ,’ kɛɛmɔ akɛ, ‘Amaniɛbɔɔ ko hewɔ.’ Ejaakɛ bɔ fɛɛ bɔ ni fee lɛ, ebaaba mli, ni gbeyeishemɔ baahã tsui fɛɛ tsui asere, ni nine fɛɛ nine mli baajɔ, ni mumɔ fɛɛ mumɔ baahao, ni nu baatsere kɛjɛ nakutso fɛɛ nakutso mli.*+ ‘Naa! Bɔ fɛɛ bɔ ni fee lɛ, ebaaba—ebaaba mli,’ Nuŋtsɔ Ofe Yehowa kɛɛ.”
8 Yehowa kɛɛ mi ekoŋŋ akɛ: 9 “Gbɔmɔ bi,* gbaa ni okɛɛ akɛ, ‘Nɔ ni Yehowa kɛɛ nɛ: “Kɛɛmɔ akɛ, ‘Klante!+ Klante ni ajɔɔ naa ni asha he kaŋkaŋ. 10 Ajɔɔ naa koni akɛgbe mɛi babaoo; asha he kaŋkaŋ koni ekpɛlɛ tamɔ sarawa.’”’”
“Ani esaaa akɛ wɔnyaa?”
“‘Ani ebaakpoo* mi diɛŋtsɛ mibinuu lɛ maŋtsɛtso lɛ,+ tamɔ bɔ ni efeɔ tso fɛɛ tso lɛ?
11 “‘Akɛhã koni asha he kaŋkaŋ ni ahiɛ yɛ dɛŋ. Ajɔɔ klante nɛɛ naa ni asha he kaŋkaŋ, koni akɛwo gbɔmɔgbelɔ dɛŋ.+
12 “‘Gbɔmɔ bi,* bolɔmɔ ni owo yara,+ ejaakɛ ebaaba mimaŋ lɛ nɔ; ebaaba Israel lumɛi lɛ fɛɛ anɔ.+ Klante lɛ baagbe amɛ afata mimaŋ lɛ he. No hewɔ lɛ, gbalamɔ oshuɔ he mai kɛye awerɛho. 13 Ejaakɛ aka akwɛ,+ ni kɛ́ klante lɛ kpoo maŋtsɛtso lɛ, mɛni baaba? Ehiŋ shi dɔŋŋ,’*+ Nuŋtsɔ Ofe Yehowa kɛɛ.
14 “Ni bo gbɔmɔ bi,* gbaa ni otswa odɛ̃ ni okɛɛ shii etɛ sɔŋŋ akɛ ‘Klante!’ Eji klante ni gbeɔ mɛi, klante ni gbeɔ mɛi babaoo, klante ni ebɔle amɛ.+ 15 Gbeyeishemɔ baahã amɛtsuii asere+ ni mɛi babaoo baanyɔ yɛ amɛmaŋ lɛ agbói lɛ anaa; mikɛ klante lɛ baagbe mɛi. Hɛɛ, ekpɛlɛɔ tamɔ sarawa, ni asha he kaŋkaŋ koni akɛgbe mɛi! 16 Foo waa kɛya ninejurɔgbɛ! Foo kɛba abɛkugbɛ! Yaa he fɛɛ he ni abaawó onaa dade lɛ hiɛ atsɔɔ lɛ! 17 Agbɛnɛ hu, matswa midɛ̃ ni majɔɔ mimlifu lɛ he.+ Mi, Yehowa, mi diɛŋtsɛ miwie.”
18 Ni Yehowa kɛɛ mi ekoŋŋ akɛ: 19 “Ni bo gbɔmɔ bi,* gba gbɛi enyɔ ni Babilon maŋtsɛ lɛ klante lɛ baatsɔ nɔ kɛba. Enyɔ lɛ fɛɛ baajɛ shikpɔŋ kome nɔ kɛba, ni akɛ gbɛtsɔɔmɔ okadi* ama he ni gbɛ lɛ baagba kɛya maji enyɔ lɛ fɛɛ amli lɛ. 20 Gba gbɛ kome ni klante lɛ atsɔ nɔ kɛya Raba,+ ni ji Amonbii lɛ amaŋ lɛ, kɛ gbɛ kroko ni etsɔ nɔ kɛya Yerusalem ni atswa gbogboi awo he+ ni yɔɔ Yuda lɛ. 21 Ejaakɛ Babilon maŋtsɛ lɛ baawa edamɔ shi yɛ gbɛnta lɛ nɔ, he ni gbɛ lɛ gbaa enyɔ yɛ lɛ koni ekla. Ebaahoso gãimlibii lɛ. Ebaabi emagai* lɛ nii; ebaakwɛ mlɛbo lɛ mli. 22 Klamɔ ni yɔɔ eninejurɔ nɔ lɛ miikwɛ Yerusalem gbɛ, koni eyato tsei ni akɛkumɔɔ gbogboi, koni eyawie ni agbe mɛi, koni eyabɔ ta oshe, koni eyato tsei ni akɛkumɔɔ gbogboi yɛ agbói lɛ anaa, koni eyatswa kpokui, koni eyatswa kawoo gbogbo.+ 23 Shi ebaafee tamɔ amale klamɔ yɛ mɛi* ni ekamɔ amɛ kitã lɛ ahiŋmɛiiaŋ.+ Shi ebaakai amɛtɔmɔ lɛ, ni ebaamɔmɔ amɛ.+
24 “No hewɔ lɛ, nɔ ni Nuŋtsɔ Ofe Yehowa kɛɛ nɛ: ‘Nyɛjie nyɛtɔmɔi lɛ kpo ni nyɛhã ana nyɛhe eshai lɛ yɛ nyɛnifeemɔi lɛ fɛɛ amli ni no hewɔ lɛ, abaakai nyɛ diɛŋtsɛ nyɛtɔmɔ lɛ. Amrɔ nɛɛ ni akai nyɛ lɛ, akɛ nine baamɔmɔ nyɛ.’
25 “Shi bo Israel lumɔ ni yitsoŋ wa ni apila bo gbele pilamɔ, ogbi lɛ eshɛ,+ onaagbee toigbalamɔ be lɛ. 26 Nɔ ni Nuŋtsɔ Ofe Yehowa kɛɛ nɛ: ‘Jiemɔ fai lɛ, ni okpɔ akekere lɛ.+ Enɛ ehiŋ shi bɔ ni eyɔɔ lɛ dɔŋŋ.+ Wó mɔ ni baa shi lɛ nɔ,+ ni oba mɔ ni nɔ kwɔ lɛ shi.+ 27 Hiɛkpatamɔ, hiɛkpatamɔ, hiɛkpatamɔ mikɛbaaba enɔ. Efeŋ mɔ ko nɔ dɔŋŋ kɛyashi mɔ ni yɔɔ hegbɛ yɛ mla naa lɛ baaba,+ ni mikɛbaahã lɛ.’+
28 “Ni bo, gbɔmɔ bi,* gbaa ni okɛɛ akɛ, ‘Nɔ ni Nuŋtsɔ Ofe Yehowa kɛɛ yɛ Amonbii lɛ kɛ amɛjɛmɔi lɛ ahe nɛ.’ Kɛɛmɔ akɛ, ‘Klante! Agbala klante koni agbe mɛi; asha he kaŋkaŋ koni eye nii, koni ekpɛlɛ tamɔ sarawa. 29 Amale ninai lɛ kɛ amale klamɔ ni kɔɔ ohe lɛ fɛɛ sɛɛ lɛ, akɛ bo baafɔ̃ mɛi ni agbe lɛ* anɔ, mɛi fɔji ni amɛgbi lɛ eshɛ lɛ, amɛnaagbee toigbalamɔ be lɛ. 30 Okɛku sɛɛ okɛwo ehebo lɛ mli. Makojo bo yɛ he ni abɔ bo yɛ lɛ, yɛ shikpɔŋ ni ojɛ nɔ lɛ nɔ. 31 Mafɔse mimlila lɛ mashwie onɔ. Mahuu mimlifu lɛ la lɛ mashwie onɔ, ni mikɛ bo baawo hii ni yitseiaŋ wala adɛŋ, hiɛkpatamɔ he ŋaalɔi lɛ.+ 32 Obaatsɔ lai ohã la lɛ;+ abaashwie bo diɛŋtsɛ olá shi yɛ shikpɔŋ lɛ nɔ, ni akaiŋ bo dɔŋŋ, ejaakɛ mi, Yehowa, mi diɛŋtsɛ miwie.’”