Wolo Ni Ji Enyɔ Ni Akɛmaje Korintobii Lɛ

13 Enɛ ji shii etɛ nɔ ni mikɛɔ akɛ, “Miiba nyɛŋɔɔ.” “Yɛ odasefoi enyɔ loo etɛ awiemɔ* naa lɛ, sane fɛɛ sane ama shi.”+ 2 Eyɛ mli akɛ amrɔ nɛɛ mibɛ nyɛŋɔɔ moŋ, shi etamɔ nɔ ni miyɛ nyɛŋɔɔ nɔ ni ji shii enyɔ nɔ, ni miitsɔ hiɛ miibɔ mɛi ni be ko ni eho lɛ amɛfee esha, kɛ mɛi krokomɛi lɛ fɛɛ kɔkɔ akɛ, kɛ́ miná miba ekoŋŋ lɛ, mikɛ amɛhe ekeŋ amɛ, 3 ejaakɛ nyɛmiitao odaseyeli ni tsɔɔ akɛ, Kristo, mɔ ni gbɔjɔɔɔ yɛ nyɛgbɛfaŋ, shi moŋ ehe wa yɛ nyɛteŋ lɛ, miitsɔ minɔ eewie lɛɛlɛŋ. 4 Ejaakɛ agbe lɛ yɛ tso jaŋŋ lɛ nɔ yɛ gbɔjɔmɔ hewɔ lɛɛlɛŋ, shi ehiɛ kã yɛ Nyɔŋmɔ hewalɛ lɛ hewɔ.+ Eji anɔkwale akɛ, wɔ hu wɔgbɔjɔ, tamɔ bɔ ni tsutsu ko lɛ, lɛ hu egbɔjɔ lɛ moŋ, shi wɔ kɛ lɛ fɛɛ hiɛ baakamɔ+ yɛ Nyɔŋmɔ hewalɛ ni yɔɔ nyɛnɔ lɛ hewɔ.+

5 Nyɛyaa nɔ nyɛpɛia nyɛmli nyɛkwɛa akɛ nyɛyɛ hemɔkɛyeli lɛ mli lo; nyɛyaa nɔ nyɛkaa bɔ ni nyɛji diɛŋtsɛ lɛ nyɛkwɛa.+ Aloo nyɛyɔseee akɛ Yesu Kristo kɛ nyɛ efee ekome? Ja Nyɔŋmɔ náaa nyɛhe miishɛɛ. 6 Mihiɛ kã nɔ yɛ anɔkwale mli akɛ, nyɛbaana akɛ wɔjeee mɛi ni Nyɔŋmɔ náaa amɛhe miishɛɛ.

7 Agbɛnɛ, wɔmiisɔle wɔmiibi Nyɔŋmɔ koni nyɛkafee nɔ fɔŋ ko kwraa, koni akana wɔ tamɔ mɛi ni Nyɔŋmɔ yɔɔ amɛhe miishɛɛ, shi moŋ koni nyɛ lɛ nyɛfee nɔ ni hi, kɛ́ wɔ lɛ ana wɔ tamɔ mɛi ni Nyɔŋmɔ náaa amɛhe miishɛɛ po. 8 Ejaakɛ wɔnyɛŋ wɔfee nɔ ko wɔshi anɔkwale lɛ, shi moŋ kɛ́ nɔ ko yɛ ni wɔbaafee lɛ, wɔbaafee wɔhã anɔkwale lɛ. 9 Ekã shi faŋŋ akɛ, be fɛɛ be ni wɔbaagbɔjɔ, ni nyɛyɛ hewalɛ lɛ, wɔnáa miishɛɛ babaoo. Ni enɛ ji nɔ ni wɔsɔleɔ wɔbiɔ, no ji, ni aya nɔ ajaje nyɛ. 10 No hewɔ ni miŋma nibii nɛɛ be ni mibɛ nyɛŋɔɔ lɛ, koni kɛ́ miba nyɛŋɔɔ, ni mikɛ hegbɛ ni Nuŋtsɔ lɛ kɛhã mi akɛ mitswa nyɛ mima shi,+ shi jeee ni mikumɔ nyɛ mishwie shi lɛ miitsu nii lɛ, mikɛ nyɛ akaye kɛ joomɔ.

11 Naagbee lɛ, nyɛmimɛi, be fɛɛ be lɛ, nyɛnáa miishɛɛ, nyɛhãa ajajea nyɛ, nyɛhãa ashɛjea nyɛmii,+ nyɛhãa nyɛjwɛŋmɔ afea ekome,+ nyɛhia shi yɛ toiŋjɔlɛ mli;+ ni suɔmɔ kɛ toiŋjɔlɛ Nyɔŋmɔ+ lɛ kɛ nyɛ baahi shi. 12 Nyɛkɛ naashɔmɔ krɔŋkrɔŋ aŋaŋaa nyɛhe. 13 Mɛi krɔŋkrɔŋi lɛ fɛɛ miiŋa nyɛ.

14 Nuŋtsɔ Yesu Kristo dromɔ lɛ kɛ Nyɔŋmɔ suɔmɔ lɛ kɛ gbɛfaŋnɔ ni nyɛnáa yɛ mumɔ krɔŋkrɔŋ lɛ mli lɛ kɛ nyɛ fɛɛ ahi shi.