2 Kronika
7 Agbɛnɛ, be ni Solomon gbe sɔlemɔ lɛ naa nɔŋŋ lɛ,+ la jɛ ŋwɛi+ ni ebashã shãa afɔle lɛ kɛ afɔlei krokomɛi lɛ, ni Yehowa anunyam yi shĩa lɛ obɔ.+ 2 Osɔfoi lɛ nyɛɛɛ abote Yehowa shĩa lɛ mli, ejaakɛ Yehowa anunyam lɛ eyi Yehowa shĩa lɛ obɔ.+ 3 Be ni la lɛ jɛ ŋwɛi kɛba ni Yehowa anunyam lɛ bayi shĩa lɛ nɔ lɛ, no mli lɛ Israelbii lɛ fɛɛ miikwɛ, ni amɛkɛ amɛhiɛ bumɔ shi yɛ tɛi ni akɛkala shikpɔŋ lɛ nɔ ni amɛkoto Yehowa ni amɛda lɛ shi, “ejaakɛ ehi; ni esuɔmɔ ni tsakeee lɛ hiɔ shi kɛyaa naanɔ.”
4 Ni maŋtsɛ lɛ kɛ maŋbii lɛ fɛɛ shã afɔlei yɛ Yehowa hiɛ.+ 5 Maŋtsɛ Solomon kɛ tsinai 22,000 kɛ gwantɛŋi 120,000 shã afɔle. Nɛkɛ ji bɔ ni maŋtsɛ lɛ kɛ maŋbii lɛ fɛɛ fee kɛgbele anɔkwa Nyɔŋmɔ lɛ shĩa lɛ naa.+ 6 Osɔfoi lɛ damɔ amɛgbɛhei lɛ yɛ amɛnitsumɔi ni ato ahã amɛ lɛ naa, ni Levibii lɛ ni hiɛɔ nibii ni akɛtswaa lala be ni aalá aahã Yehowa lɛ hu fata amɛhe.+ (Maŋtsɛ David fee nibii ni akɛtswaa lala nɛɛ koni akɛda Yehowa shi—“ejaakɛ esuɔmɔ ni tsakeee lɛ hiɔ shi kɛyaa naanɔ”—be fɛɛ be ni David kɛ amɛ* baajie Nyɔŋmɔ yi lɛ.) Ni osɔfoi lɛ miikpã tɛtɛrɛmantɛrɛi+ lɛ waa yɛ amɛhiɛ, be ni Israelbii lɛ fɛɛ damɔ shi lɛ.
7 Kɛkɛ ni Solomon fee kpo lɛ ni yɔɔ Yehowa shĩa lɛ hiɛ lɛ teŋ lɛ krɔŋkrɔŋ, ejaakɛ jɛmɛ ji he ni eshã shãa afɔlei+ lɛ, kɛ naanyobɔɔ afɔlei lɛ ahe fɔi lɛ yɛ, akɛni akɔɔble afɔleshaa latɛ+ ni Solomon fee lɛ edaaa bɔ ni shãa afɔlei lɛ, kɛ niyenii afɔlei+ lɛ, kɛ afɔlei lɛ ahe fɔi+ lɛ fɛɛ baaya nɔ lɛ hewɔ. 8 Nakai be lɛ mli lɛ, Solomon kɛ Israel fɛɛ, asafo babaoo ni jɛ Lebo-hamat* aahu kɛyashi Ejipt Nujɔɔ+ lɛ he lɛ, ye gbi jurɔ gbii kpawo.+ 9 Shi yɛ gbi ni ji kpaanyɔ lɛ nɔ lɛ,* amɛfee henaabuamɔ krɔŋkrɔŋ,+ ejaakɛ amɛkɛ gbii kpawo gbele afɔleshaa latɛ lɛ naa, ni amɛye gbi jurɔ hu gbii kpawo. 10 Kɛkɛ ni yɛ gbi ni ji 23 lɛ nɔ yɛ nyɔɔŋ ni ji kpawo lɛ nɔ lɛ, ewo maŋbii lɛ gbɛ, ni amɛtee amɛshĩai kɛ miishɛɛ+ kɛ tsuijurɔ yɛ nibii kpakpai fɛɛ ni Yehowa efee ehã David kɛ Solomon kɛ emaŋ Israel lɛ hewɔ.+
11 No hewɔ lɛ, Solomon gbe Yehowa shĩa lɛ, kɛ maŋtsɛ shĩa lɛ maa naa;+ ni nɔ fɛɛ nɔ ni kã Solomon tsui nɔ akɛ efee yɛ Yehowa shĩa lɛ kɛ lɛ diɛŋtsɛ eshĩa lɛ hu he lɛ, efee fɛɛ egbe naa.+ 12 Kɛkɛ ni Yehowa jie ehe kpo etsɔɔ Solomon+ nyɔɔŋ ni ekɛɛ lɛ akɛ: “Minu osɔlemɔ lɛ, ni mihala shĩa nɛɛ mihã mihe akɛ afɔleshaa shĩa.+ 13 Kɛ́ miŋa ŋwɛii anaa ni nugbɔ enɛɛɛ, loo mifã agãi lɛ koni amɛbafite shikpɔŋ lɛ, loo mikɛ tsɛŋemɔ hela ni gbeɔ mɔ ba miwebii lɛ ateŋ, 14 ni miwebii ni migbɛ́i kã amɛnɔ+ lɛ ba amɛhe shi+ ni amɛsɔle ni amɛtao mihiɛ dromɔ ni amɛtsi amɛhe kɛje amɛgbɛi fɔji lɛ anɔ lɛ,+ no lɛ, majɛ ŋwɛii mabo amɛ toi ni mikɛ amɛhe eshai lɛ baake amɛ ni mahã amɛshikpɔŋ lɛ aba nii.*+ 15 Agbɛnɛ, mihiŋmɛii baahi jɛmɛ, ni maka mitoii mahã sɔlemɔ ni asɔleɔ yɛ biɛ lɛ.+ 16 Ni agbɛnɛ, mihala shĩa nɛɛ ni mifee lɛ krɔŋkrɔŋ koni migbɛ́i ahi jɛmɛ kɛya naanɔ,+ ni mihiŋmɛii kɛ mitsui baahi jɛmɛ daa.+
17 “Ni bo lɛ, kɛ́ onyiɛ yɛ mihiɛ tamɔ bɔ ni otsɛ David nyiɛ yɛ mihiɛ lɛ, kɛtsɔ nɔ fɛɛ nɔ ni miwoɔ bo he kitã ni ooofee, kɛ mitaomɔ nii, kɛ miyiŋkpɛi* lɛ anɔ ni oooye lɛ nɔ lɛ,+ 18 no lɛ, mahã omaŋtsɛyeli maŋtsɛ sɛi lɛ ama shi shiŋŋ+ tamɔ bɔ ni mikɛ otsɛ David kpaŋ+ akɛ, ‘Ebaŋ kɔkɔɔkɔ akɛ be ko baashɛ ni anáŋ oseshinyo ko ni baaye Israel nɔ maŋtsɛ’ lɛ.+ 19 Shi kɛ́ nyɛje misɛɛ ni nyɛyeee mimlai lɛ, kɛ mikitãi ni mikɛshwie nyɛhiɛ lɛ anɔ, ni nyɛyasɔmɔ nyɔŋmɔi krokomɛi ni nyɛkoto amɛ lɛ,+ 20 no lɛ, mafã Israel kɛje mishikpɔŋ ni mikɛhã amɛ lɛ nɔ,+ ni shĩa nɛɛ ni mifee lɛ krɔŋkrɔŋ mihã migbɛ́i lɛ, majie yɛ mihiɛ mashɛ mafɔ̃, ni mahã etsɔ nyaŋemɔ nii* kɛ nɔ ko ni ayeɔ he fɛo yɛ maji fɛɛ ateŋ.+ 21 Ni shĩa nɛɛ baatsɔ koikoi. Mɔ fɛɛ mɔ ni baatsɔ he kɛho lɛ naa baakpɛ ehe+ ni ebaabi akɛ, ‘Mɛni hewɔ Yehowa fee shikpɔŋ nɛɛ kɛ shĩa nɛɛ nɛkɛ?’+ 22 Ni amɛbaakɛɛ akɛ, ‘Ejaakɛ amɛje Yehowa, amɛtsɛmɛi a-Nyɔŋmɔ lɛ sɛɛ,+ mɔ ni jie amɛ kɛje Ejipt shikpɔŋ lɛ nɔ lɛ,+ ni amɛkɛ amɛhe yakpɛtɛ nyɔŋmɔi krokomɛi ahe ni amɛkoto amɛ ni amɛsɔmɔ amɛ.+ No hewɔ ni ekɛ amanehului nɛɛ fɛɛ eba amɛnɔ nɛɛ.’”+