Ezekiel

6 “‘Shi kɛ́ bulɔ lɛ na akɛ klante lɛ miiba, shi ekpãaa tɛtɛrɛmantɛrɛ* lɛ,+ ni maŋbii lɛ nuuu kɔkɔbɔɔ ko, ni klante lɛ ba ni ebaŋɔ amɛteŋ mɔ ko wala* lɛ, nakai mɔ lɛ baagbo yɛ lɛ diɛŋtsɛ etɔmɔ lɛ hewɔ moŋ, shi mabi elá shi yɛ bulɔ lɛ dɛŋ.’+

7 “Bo gbɔmɔ bi,* miwó bo bulɔ mihã Israel shĩa lɛ; ni kɛ́ onu wiemɔ ko yɛ minaa lɛ, bɔɔ amɛ kɔkɔ ohã mi.+ 8 Kɛ́ mikɛɛ efɔŋfeelɔ ko akɛ, ‘Efɔŋfeelɔ, bɔ fɛɛ bɔ ni fee lɛ obaagbo!’+ shi owieee kɛbɔɔɔ efɔŋfeelɔ lɛ kɔkɔ koni etsake egbɛ lɛ, ebaagbo akɛ efɔŋfeelɔ yɛ lɛ diɛŋtsɛ etɔmɔ lɛ hewɔ,+ shi mabi elá shi yɛ odɛŋ. 9 Shi kɛ́ obɔ efɔŋfeelɔ ko kɔkɔ koni eje gbɛ ni ekɔ lɛ nɔ, ni ejeee gbɛ ni ekɔ lɛ nɔ lɛ, ebaagbo yɛ etɔmɔ lɛ hewɔ,+ shi bɔ fɛɛ bɔ ni fee lɛ, obaahere bo diɛŋtsɛ owala.*+

10 “Ni bo gbɔmɔ bi,* kɛɛmɔ Israel shĩa lɛ akɛ, ‘Nyɛkɛɔ akɛ: “Atua ni wɔtseɔ lɛ kɛ wɔhe eshai lɛ tsii waa yɛ wɔnɔ, ni wɔmiitãra loo yɛ amɛhewɔ;+ no hewɔ lɛ, te wɔbaafee tɛŋŋ wɔya nɔ wɔhi wala mli lɛ?”’+ 11 Kɛɛmɔ amɛ akɛ, ‘“Gbii abɔ ni mihiɛ kã nɛɛ,” Nuŋtsɔ Ofe Yehowa kɛɛ, “Mináaa efɔŋfeelɔ gbele he miishɛɛ,+ shi moŋ, nɔ ni mináa he miishɛɛ ji akɛ, efɔŋfeelɔ lɛ atsake egbɛ+ ni eya nɔ ehi wala mli.+ Nyɛ Israel shĩa, nyɛjea, nyɛjea nyɛgbɛi fɔji lɛ anɔ,+ mɛni hewɔ esa akɛ nyɛgboi?”’+

12 “Ni bo gbɔmɔ bi,* kɛɛmɔ omaŋ lɛ mli bii* lɛ akɛ, ‘Kɛ́ jalɔ tse atua lɛ, ejalɛ nifeemɔi lɛ hereŋ lɛ;+ ni efɔŋfeelɔ hu, kɛ́ ekpa enɔfɔŋfeemɔ lɛ, efɔŋ ni efee lɛ hãŋ egbee shi;+ ni jalɔ hu, eyaŋ nɔ ehiŋ wala mli yɛ ejalɛ nifeemɔi lɛ ahewɔ yɛ gbi ni ebaafee esha lɛ nɔ.+ 13 Kɛ́ mikɛɛ jalɔ akɛ: “Bɔ fɛɛ bɔ ni fee lɛ, obaaya nɔ ohi wala mli,” ni ekɛ ehiɛ fɔ̃ lɛ diɛŋtsɛ ejalɛ nifeemɔi lɛ anɔ ni efee efɔŋ* lɛ,+ akaiŋ ejalɛ nifeemɔi lɛ eko eko, shi ebaagbo yɛ efɔŋ ni efee lɛ hewɔ.+

14 “‘Ni kɛ́ mikɛɛ efɔŋfeelɔ akɛ: “Bɔ fɛɛ bɔ ni fee lɛ obaagbo,” ni ekpa eshafeemɔ ni eye jalɛ sane ni efee nɔ ni ja,+ 15 ni efɔŋfeelɔ lɛ kɛ nɔ ni akɛbato awaba lɛ ku sɛɛ eyahã,+ ni eto nɔ ni ekɛ ojotswaa shɔ̃ lɛ najiaŋ,+ ni enyiɛ yɛ wala mlai lɛ amli ni efeee efɔŋ lɛ, bɔ fɛɛ bɔ ni fee lɛ ebaaya nɔ ehi wala mli.+ Egboŋ. 16 Agbalaŋ etoi yɛ eshai ni efee lɛ eko eko hewɔ.*+ Ejaakɛ jalɛ sane ni eye kɛ nɔ ni ja ni efee lɛ hewɔ lɛ, bɔ fɛɛ bɔ ni fee lɛ ebaaya nɔ ehi wala mli.’+

17 “Shi omaŋbii lɛ kɛɔ akɛ, ‘Yehowa gbɛ lɛ ejaaa,’ tsɛbelɛ amɛ moŋ amɛgbɛ ejaaa.

18 “Kɛ́ jalɔ kpa ejalɛ nifeemɔi lɛ ni efee efɔŋ lɛ, ebaagbo yɛ efɔŋ lɛ hewɔ.+ 19 Shi kɛ́ efɔŋfeelɔ kpa enɔfɔŋfeemɔ ni eye jalɛ sane ni efee nɔ ni ja lɛ, ebaaya nɔ ehi shi yɛ nomɛi ahewɔ.+

20 “Shi nyɛkɛɔ akɛ, ‘Yehowa gbɛ lɛ ejaaa.’+ Nyɛ Israel shĩa, makojo nyɛteŋ mɔ fɛɛ mɔ yɛ egbɛi lɛ anaa.”

21 Kɛkɛ ni yɛ afi ni ji 12 lɛ mli, yɛ nyɔɔŋ ni ji nyɔŋma lɛ mli, yɛ gbi ni ji enumɔ yɛ nyɔɔŋ ni aŋɔ wɔ nom kɛtee lɛ mli lɛ nɔ lɛ, nuu ko ni ejo foi kɛje Yerusalem ba miŋɔɔ+ ebakɛɛ akɛ: “Maŋ lɛ egbee shi!”+

22 Shi dani mɔ ni je mli lɛ baaba miŋɔɔ lɛ, Yehowa nine ba minɔ gbɛkɛnaashi mli, ni egbele minaa dani nuu lɛ ba miŋɔɔ enɔ leebi lɛ. No hewɔ lɛ, agbele minaa, ni mitɔɔɔ mu dɔŋŋ.+

23 Kɛkɛ ni Yehowa kɛɛ mi akɛ: 24 “Gbɔmɔ bi,* amaŋfɔi nɛɛ anɔ bii lɛ+ miiwie Israel shikpɔŋ lɛ he akɛ, ‘Abraham lɛ, gbɔmɔ kome kɛkɛ ji lɛ, shi eŋɔ shikpɔŋ lɛ.+ Shi wɔ lɛ, wɔyi fa; bɔ fɛɛ bɔ ni fee lɛ, akɛ shikpɔŋ lɛ ehã wɔ koni wɔŋɔ akɛ wɔnɔ.’

25 “No hewɔ lɛ, kɛɛmɔ amɛ akɛ, ‘Nɔ ni Nuŋtsɔ Ofe Yehowa kɛɛ nɛ: “Nyɛmiiye niyenii kɛ emli lá,+ ni nyɛholeɔ nyɛhiŋmɛii anɔ nyɛkwɛɔ nyɛmagai ni yɔɔ nyaŋemɔ* lɛ, ni nyɛyaa nɔ nyɛshwieɔ lá shi.+ No hewɔ lɛ, mɛni hewɔ esa akɛ nyɛŋɔ shikpɔŋ lɛ akɛ nyɛnɔ? 26 Nyɛkɛ nyɛhiɛ fɔ̃ɔ nyɛklante lɛ nɔ,+ nyɛkɛ nyɛhe woɔ nifeemɔi ni yɔɔ nyaŋemɔ amli, ni nyɛteŋ mɔ fɛɛ mɔ ebule enyɛmi gbɔmɔ ŋa.+ No hewɔ lɛ, mɛni hewɔ esa akɛ nyɛŋɔ shikpɔŋ lɛ akɛ nyɛnɔ?”’+

27 “Nɔ ni okɛɛ amɛ nɛ, ‘Nɔ ni Nuŋtsɔ Ofe Yehowa kɛɛ nɛ: “Gbii abɔ ni mihiɛ kã nɛɛ, mɛi ni yɔɔ amaŋfɔi lɛ amli lɛ baanyɔnyɔi yɛ klante lɛ naa; mikɛ mɛi ni yɔɔ ŋa lɛ nɔ lɛ baahã ŋa mli kooloi lɛ akɛ niyenii; ni mɛi ni yɔɔ teemɔhei lɛ kɛ tɛkpoji lɛ amli lɛ, hela baagbe amɛ.+ 28 Mahã shikpɔŋ lɛ atsɔ amaŋfɔ kɛ shikpɔŋ ni akɛfeee nɔ ko,+ ni abaafo shwã ni eshwãa babaoo lɛ sɛɛ, ni Israel gɔji lɛ baatsɔmɔ amaŋfɔ+ ni mɔ ko mɔ ko tsɔŋ nɔ kɛhoŋ. 29 Ni kɛ́ mihã shikpɔŋ lɛ tsɔ amaŋfɔ kɛ shikpɔŋ ni akɛfeee nɔ ko+ yɛ nyaŋemɔ nibii ni amɛfee+ lɛ hewɔ lɛ amɛbaaná amɛle akɛ miji Yehowa.”’

30 “Bo gbɔmɔ bi,* omaŋbii lɛ miiwie ohe yɛ gbogboi lɛ ahe kɛ shĩai lɛ ashinai lɛ anaa.+ Mɔ nɛ kɛ mɔ nɛ miiwie, mɔ fɛɛ mɔ miikɛɛ enyɛmi akɛ, ‘Nyɛbaa ni nyɛhãa wɔboa wiemɔ ni jɛ Yehowa ŋɔɔ lɛ toi.’ 31 Amɛbaabua amɛhe naa ni amɛbaaba amɛbatara shi yɛ ohiɛ akɛ mimaŋbii; ni amɛbaanu owiemɔi lɛ, shi amɛkɛtsuŋ nii.+ Ejaakɛ amɛkɛ amɛnaabu woɔ oyiteŋ mulu,* shi amɛtsui tiuɔ sɛɛnamɔ gbonyo sɛɛ. 32 Naa! Yɛ amɛhiɛ lɛ, otamɔ suɔmɔ lala ni ŋɔɔ ni akɛ gbee ni ŋɔɔ láa ni atswaa lɛ jogbaŋŋ yɛ kpãa saŋku nɔ. Amɛbaanu owiemɔi lɛ, shi amɛkɛtsuŋ nii. 33 Ni kɛ́ eba mli lɛ—ni ebaaba mli kɛ̃—amɛbaaná amɛle akɛ gbalɔ ko ehi amɛteŋ pɛŋ.”+