Kɛhã lalatsɔɔlɔ lɛ. Lala ni David fo. Lala.
65 Ao Nyɔŋmɔ, yijiemɔ miimɛ bo yɛ Zion;+
Wɔbaaye shi ni wɔwo bo lɛ nɔ.+
2 Ao Sɔlemɔ Toibolɔ, bo oŋɔɔ gbɔmɛi srɔtoi fɛɛ baaba.+
3 Mitɔmɔi lɛ fa babaoo,+
Shi otsĩmɔɔ wɔhe eshai lɛ anɔ.+
4 Mɔ ni ohalaa ni ohãa ebɛŋkɛɔ bo
Koni ehi okpoi lɛ anɔ lɛ yɛ miishɛɛ.+
Wɔbaatɔrɔ kɛ nibii kpakpai ni yɔɔ oshĩa lɛ,+
Osɔlemɔ shĩa krɔŋkrɔŋ+ lɛ.
5 Ao wɔyiwalaheremɔ Nyɔŋmɔ,
Okɛ jalɛ naakpɛɛ nitsumɔi baahere wɔ nɔ;+
Bo ji mɛi ni yɔɔ shikpɔŋ lɛ naagbeehei lɛ fɛɛ
Kɛ mɛi ni yɔɔ ŋshɔ sɛɛ shɔŋŋ lɛ fɛɛ a-Hiɛnɔkamɔ.+
6 Ohã gɔji lɛ ma shi shiŋŋ yɛ ohewalɛ lɛ naa;
Hewalɛ ewula bo.+
7 Ojɔɔ ŋshɔ ni efee hamahama lɛ he,+
Amɛshɔkei ni kumɔɔ lɛ kɛ jeŋmaji lɛ ahoofeemɔ lɛ.+
8 Mɛi ni yɔɔ hei ni yɔɔ shɔŋŋshɔŋŋ lɛ baashe gbeyei yɛ okadi ni ofeɔ lɛ hewɔ;+
Obaahã mɛi ni yɔɔ hulushiteehe kɛyashi hulushinyɔɔhe lɛ anya waa.
9 Okwɛɔ shikpɔŋ lɛ,
Ni ohãa ebaa nii babaoo kɛ yibii kpakpai.+
Faa ni jɛ Nyɔŋmɔ ŋɔɔ lɛ mli eyi obɔ kɛ nu;
Ohãa amɛ ŋmaa,+
Ejaakɛ nakai ji bɔ ni ofee shikpɔŋ lɛ.
10 Ogbalaa nujɔi owoɔ mli ni osaa enɔ shia lɛ nɔ;
Ohãa nugbɔ nɛɔ kɛjɔɔ he; ojɔɔ enɔ nibaa nii lɛ.+
11 Okɛ onii kpakpai lɛ fiɔ afi lɛ akekere;
Ogbɛi lɛ anɔ eyi obɔ kɛteke nɔ.+
12 Kooloi alɛɛhei ni yɔɔ ŋa lɛ nɔ lɛ yaa nɔ etsereɔ kɛ bɔ,+
Ni miishɛɛ ewula gɔŋkpɔi lɛ.+
13 Tookui eyi lɛɛhei lɛ fɛɛ,
Ni ŋmaa eha jɔi lɛ amli fɛɛ.+
Amɛbolɔɔ kɛ nyamɔ, hɛɛ, amɛláa.+