53 Namɔ ehe nɔ ni anu kɛjɛ wɔŋɔɔ lɛ eye?+
Ni Yehowa nine lɛ,+ namɔ ajie lɛ kpo atsɔɔ?+
2 Ebaafã kpo tamɔ tso fɔ+ ko yɛ ehiɛ, tamɔ tso shishifã ni efã kpo kɛjɛ shikpɔŋ gbiŋ mli.
Ebɛ gbɔmɔtsoŋ hefɛo ko, ni ebɛ anunyam ko hu;+
Ni kɛ́ wɔna lɛ lɛ, ehiɛ su hãaa wɔnyɛ wɔbɛŋkɛ lɛ.
3 Anyaŋe lɛ, ni gbɔmɛi tsi amɛhe kɛje ehe,+
Gbɔmɔ ni le nɔ ni piŋmɔ ji ni ele helai hu.
Etamɔ nɔ ni akɛ ehiɛ etee wɔ.
Anyaŋe lɛ, ni wɔbuuu lɛ wɔhãaa nɔ ko.+
4 Lɛɛlɛŋ, lɛ etere wɔhelai,+
Ni etere wɔpiŋmɔi lɛ.+
Shi wɔbu lɛ akɛ mɔ ko ni Nyɔŋmɔ piŋ lɛ, ni etswa lɛ nɔ, ni ehã ena nɔ.
5 Shi atsu lɛ nɔ+ yɛ wɔnɔtɔmɔi lɛ ahewɔ;+
Atswia lɛ nii yɛ wɔtɔmɔi lɛ ahewɔ.+
Lɛ etere toigbalamɔ lɛ koni wɔná toiŋjɔlɛ,+
Ni yɛ ehe faji lɛ ahewɔ lɛ, atsa wɔ.+
6 Wɔ fɛɛ wɔdu gbɛ tamɔ gwantɛŋi,+
Mɔ fɛɛ mɔ ekɔ lɛ diɛŋtsɛ egbɛ,
Ni Yehowa ehã wɔ fɛɛ wɔhe esha lɛ ebakã enɔ.+
7 Awa lɛ yi,+ ni eŋmɛɛ ehe ehã nɔnaa,+
Shi egbeleee enaa.
Akɛ lɛ ba tamɔ gwantɛŋ ni ayaagbe lɛ,+
Tamɔ gwantɛŋyoo feɔ diŋŋ yɛ ehetsɔikulɔi ahiɛ lɛ,
Ni egbeleee enaa.+
8 Akɛ lɛ tee yɛ nɔnyɛɛ kɛ kojomɔ hewɔ;
Ni namɔ baagba ehe naa yɛ eyinɔ he saji lɛ ahe?
Ejaakɛ afo lɛ ashɛ afɔ̃ kɛje hiɛkãalɔi ashikpɔŋ lɛ nɔ;+
Ni atswa lɛ nɔ yɛ mimaŋ lɛ nɔtɔmɔ lɛ hewɔ.+
9 Ni ahã lɛ fuuhe yɛ mɛi fɔji ateŋ,+
Ni efata niiatsɛmɛi ahe yɛ egbele mli,+
Eyɛ mli akɛ efeko efɔŋ ko
Ni anaaa amale ko yɛ edaaŋ.+
10 Shi Yehowa miisumɔ akɛ etswa lɛ nɔ, ni eŋmɛ gbɛ ni hela mɔ lɛ.
Kɛ́ okɛ ewala baahã akɛ sɔ̃ afɔle lɛ,+
Ebaana eseshi, ni egbii asɛɛ baatsɛ,+
Ni nɔ ni Yehowa yɔɔ he miishɛɛ lɛ baaba mli kɛtsɔ enɔ.+
11 Ehaomɔ lɛ hewɔ lɛ, ebaana nibii kpakpai ni etsui baanyɔ emli.
Enilee lɛ hewɔ lɛ, jalɔ lɛ, mitsulɔ lɛ,+
Baahã abu mɛi babaoo jalɔi,+
Ni ebaatere amɛhe eshai lɛ.+
12 Enɛ hewɔ lɛ, mahã lɛ egbɛfaŋnɔ yɛ mɛi pii ateŋ,
Ni ekɛ hewalɔi baaja ta mli nii,
Ejaakɛ efɔse ewala eshwie shi yɛ gbele mli po+
Ni abu lɛ ashi nɔtɔlɔi anɔ;+
Etere mɛi pii ahe esha,+
Ni edamɔ mli ehã nɔtɔlɔi lɛ.+