Bɔfoi Lɛ Anitsumɔi
21 Ekpakpa ko dani wɔnyɛ wɔkɛ amɛ gbála mli, ni no sɛɛ lɛ, wɔwo meele kɛnyiɛ ŋshɔ lɛ hiɛ tɛ̃ɛ kɛba Kos, enɔ jetsɛremɔ lɛ wɔtee Rodo, ni wɔjɛ jɛmɛ kɛtee Patara. 2 Be ni wɔna meele ko ni miifo mli kɛmiiya Foinike lɛ, wɔbote mli ni wɔtee. 3 Be ni wɔshɛ he ko lɛ, wɔna Kipro ŋshɔkpɔ lɛ yɛ wɔhiɛ, ni wɔtswa lɛ wɔfɔ̃ abɛku ni wɔtsa nɔ kɛbashɛ Siria, ni wɔyakpeleke yɛ Tiro, he ni abaajie meele lɛ mli jatsui lɛ yɛ lɛ. 4 Wɔtao kaselɔi lɛ ni wɔna amɛ ni wɔhi jɛmɛ gbii kpawo. Shi nɔ ni mumɔ lɛ jie kpo etsɔɔ amɛ lɛ hewɔ lɛ, amɛkɛɛ Paulo shii abɔ akɛ enane akayi Yerusalem.+ 5 No hewɔ lɛ, be ni wɔye wɔgbii lɛ wɔtã lɛ, wɔshi jɛmɛ ni wɔyi mli, shi amɛ fɛɛ, yei kɛ gbekɛbii lɛ fɛɛ bajie wɔ gbɛ kɛba maŋ lɛ ŋshɔ lɛ naa. Ni wɔkula shi yɛ ŋshɔ lɛ naa ni wɔsɔle 6 ni wɔkɛ wɔhe ye shɛɛ. Kɛkɛ ni wɔbote meele lɛ mli, ni amɛ hu amɛku amɛsɛɛ kɛtee amɛshĩai.
7 Agbɛnɛ, gbɛ ni wɔfã kɛjɛ Tiro kɛnyiɛ ŋshɔ lɛ hiɛ lɛ kɛ wɔ bashɛ Ptolemai, ni wɔyaŋa nyɛmimɛi lɛ ni wɔkɛ amɛ hi shi gbi kome. 8 Enɔ jetsɛremɔ lɛ, wɔyi mli ni wɔyashɛ Kaisarea, ni wɔyabote sane kpakpa shiɛlɔ Filipo, ni ji hii kpawo lɛ ateŋ mɔ kome+ lɛ shĩa lɛ mli, ni wɔkɛ lɛ hi shi. 9 Nuu nɛɛ yɛ biyei ejwɛ ni boteko gbalashihilɛ mli* ni gbaa.+ 10 Shi be ni wɔhi jɛmɛ gbii saŋŋ lɛ, gbalɔ ko ni atsɛɔ lɛ Agabo+ lɛ kpeleke shi kɛjɛ Yudea kɛba. 11 Ni eba wɔŋɔɔ ni eŋɔ Paulo bɛlti lɛ ni ekɛfi lɛ diɛŋtsɛ enaji kɛ eniji ni ekɛɛ: “Bɔ ni mumɔ krɔŋkrɔŋ lɛ kɛɛ nɛ, ‘Nuu ni bɛlti nɛɛ ji enɔ lɛ, nɛkɛ Yudafoi lɛ baafi lɛ yɛ Yerusalem+ ni amɛkɛ lɛ baawo jeŋmajiaŋbii lɛ adɛŋ.’”+ 12 Agbɛnɛ be ni wɔnu enɛ lɛ, wɔ kɛ mɛi ni yɔɔ jɛmɛ lɛ fɛɛ bɔi lɛ faikpamɔ akɛ ekakwɔ kɛtee Yerusalem. 13 Kɛkɛ ni Paulo hã hetoo akɛ: “Mɛni nyɛfeɔ nɛɛ? Mɛni hewɔ nyɛfóɔ? Ani nyɛmiitao nyɛje minijiaŋ wui lo?* Nyɛnáa nyɛlea akɛ, jeee fi ni abaafi mi lɛ kɛkɛ misaa mihe mito, shi moŋ misaa mihe mito gbele hu yɛ Yerusalem yɛ Nuŋtsɔ Yesu gbɛ́i lɛ hewɔ.”+ 14 Be ni wɔna akɛ wɔnyɛɛɛ wɔtsake ejwɛŋmɔ lɛ, wɔkpa enaatsĩi* ni wɔkɛɛ: “Afee nɔ ni Yehowa* sumɔɔ.”
15 Agbɛnɛ, gbii nɛɛ asɛɛ lɛ, wɔsaa wɔhe kɛhã gbɛfãa lɛ ni wɔyi mli akɛ wɔmiiya Yerusalem. 16 Kaselɔi ni jɛ Kaisarea lɛ ateŋ mɛi komɛi hu kɛ wɔ tee, ni amɛkɛ wɔ ba Mnason ni jɛ Kipro lɛ ŋɔɔ, eji mra mli kaselɔi lɛ ateŋ mɔ kome, ni eshĩa wɔbaato gbɔ yɛ. 17 Be ni wɔyashɛ Yerusalem lɛ, nyɛmimɛi lɛ here wɔ kɛ miishɛɛ. 18 Shi enɔ jetsɛremɔ lɛ, Paulo kɛ wɔ tee Yakobo ŋɔɔ,+ no mli lɛ, onukpai lɛ fɛɛ yɛ jɛmɛ. 19 Ni eŋa amɛ, ni ebɔi amɛ nibii ni Nyɔŋmɔ tsɔ esɔɔmɔ lɛ nɔ efee yɛ jeŋmaji lɛ ateŋ lɛ gbaa fitsofitso.
20 Be ni amɛnu enɛ lɛ, amɛwo Nyɔŋmɔ hiɛ nyam, shi amɛkɛɛ lɛ akɛ: “Anyɛmi, ona akɛ mɛi akpei abɔ ehe Nuŋtsɔ lɛ nɔ amɛye yɛ Yudafoi lɛ ateŋ, ni amɛ fɛɛ amɛji mɛi ni hiɛ dɔɔ Mla lɛ he hu.+ 21 Shi amɛnu sane ko ni abawie yɛ ohe akɛ otsɔɔ Yudafoi fɛɛ ni yɔɔ jeŋmaji lɛ ateŋ lɛ akɛ amɛkwa Mose Mla lɛ; okɛɔ amɛ akɛ amɛkafolɔ amɛbii ketia loo amɛkanyiɛ kusumii lɛ asɛɛ.+ 22 No hewɔ lɛ, mɛni esa akɛ afee yɛ he? Bɔ fɛɛ bɔ ni fee lɛ, amɛbaanu akɛ oba. 23 No hewɔ lɛ, feemɔ nɔ ni wɔkɛɔ bo nɛɛ: Wɔyɛ hii ejwɛ ni ewo Nyɔŋmɔ shi. 24 Ŋɔɔ hii nɛɛ kɛya ni okɛ amɛ fɛɛ ayafee nyɛhe krɔŋkrɔŋ yɛ kusum naa ni owo nyɔji ni amɛbaabɔ lɛ ohã amɛ, koni ashɛ amɛyi. Ni no baahã mɔ fɛɛ mɔ aná ale akɛ saji ni abawie yɛ ohe lɛ bɛ mli, shi moŋ onyiɛɔ yɛ Mla lɛ naa ni oyeɔ Mla lɛ nɔ hu.+ 25 Shi mɛi ni ehe Nuŋtsɔ lɛ nɔ amɛye yɛ jeŋmaji lɛ ateŋ lɛ, wɔŋma wɔyiŋkpɛɛ lɛ wɔmaje amɛ akɛ, amɛya nɔ amɛtsi amɛhe kɛje nibii ni akɛshã afɔle ahã amagai ahe,+ kɛje lá he,+ kɛje kooloi ni ashɔ̃tɔ* ahe,+ kɛ agbɛnɛ hu kɛje ajwamaŋbɔɔ* he.”+
26 Kɛkɛ ni enɔ jetsɛremɔ lɛ, Paulo ŋɔ hii lɛ kɛfata ehe ni ekɛ amɛ fɛɛ tee koni amɛyafee amɛhe krɔŋkrɔŋ yɛ kusum naa,+ ni eyiŋ etee sɔlemɔ shĩa lɛ koni eyatsɔɔ be ni gbii ni amɛkɛbaafee amɛhe krɔŋkrɔŋ yɛ kusum naa lɛ baaba naagbee, kɛ be ni esa akɛ ashã afɔle ahã amɛteŋ mɔ fɛɛ mɔ.
27 Agbɛnɛ, be ni gbii kpawo lɛ miihe aba naagbee lɛ, Yudafoi ni jɛ Asia lɛ na lɛ yɛ sɔlemɔ shĩa lɛ, ni amɛwo mɛi ni bua shi yɛ jɛmɛ lɛ fɛɛ ayiŋ, ni amɛmɔ lɛ, 28 ni amɛbolɔ akɛ: “Israel hii, nyɛbawaa wɔ ee! Nuu nɛɛ ji mɔ ni tsɔɔ mɛi nibii ni teɔ shi woɔ wɔmaŋ lɛ kɛ wɔ-Mla lɛ kɛ biɛ nɛɛ yɛ he fɛɛ he lɛ. Ni nɔ ni ehiii fe fɛɛ lɛ, ekɛ Greekbii po eba sɔlemɔ shĩa lɛ, ni ebule he krɔŋkrɔŋ nɛɛ.”+ 29 Ejaakɛ no mli lɛ amɛna lɛ kɛ Trofimo+ ni jɛ Efeso lɛ yɛ maŋ lɛ mli momo, no hewɔ lɛ amɛsusu akɛ Paulo kɛ lɛ eba sɔlemɔ shĩa lɛ. 30 Maŋ lɛ mli fɛɛ fee basabasa, ni mɛi lɛ fɛɛ sha foi kɛba, ni amɛmɔ Paulo ni amɛgbala lɛ kɛjɛ sɔlemɔ shĩa lɛ kɛje kpo, ni amrɔ lɛ aŋamɔ shinai lɛ. 31 Be ni amɛmiitao amɛgbe lɛ lɛ, ayakɛɛ asraafoi akuu lɛ nɔ tatsɛ lɛ akɛ basabasafeemɔ miiya nɔ yɛ Yerusalem fɛɛ; 32 ni amrɔ lɛ, eŋɔ asraafoi kɛ asraafoiatsɛmɛi, ni ekɛ amɛ kpeleke shi kɛ foi kɛba amɛŋɔɔ. Be ni amɛhiŋmɛi gba tatsɛ lɛ kɛ asraafoi lɛ anɔ lɛ, amɛkpa Paulo yii.
33 Kɛkɛ ni tatsɛ lɛ tsi ebɛŋkɛ ni emɔ lɛ, ni efã akɛ awo lɛ tsein* enyɔ;+ no sɛɛ lɛ, ebi mɔ ni eji kɛ nɔ ni efee. 34 Shi mɛi ni bua shi lɛ ateŋ mɛi komɛi bɔi bolɔmɔ nɛkɛ, ni mɛi krokomɛi hu bolɔ ekroko. No hewɔ lɛ, akɛni enyɛɛɛ ele sane lɛ mli anɔkwale lɛ yɛ hoofeemɔ lɛ hewɔ lɛ, efã koni akɛ lɛ aba asraafoi ashihilɛhe lɛ. 35 Shi be ni eshɛ atrakpoi lɛ anaa lɛ, asraafoi lɛ wó lɛ yɛ gidigidi ni mɛi lɛ feɔ lɛ hewɔ, 36 ejaakɛ mɛi babaoo nyiɛ esɛɛ lolo ni amɛmiibolɔ akɛ: “Nyɛgbea lɛ!”
37 Be ni eshwɛ fioo ni akɛ Paulo baabote asraafoi ashihilɛhe lɛ, ekɛɛ tatsɛ lɛ akɛ: “Ani miyɛ hegbɛ akɛ mikɛɔ bo nɔ ko?” Ekɛɛ akɛ: “Owieɔ Greek? 38 Belɛ, ani jeee bo ji Ejiptnyo ni be ko ni eho lɛ, ewo mɛi ayiŋ ni amɛtse atua, ni eloo hii 4,000 ni gbalaa kakla lɛ kɛnyiɛ esɛɛ kɛtee ŋa lɛ nɔ lɛ?” 39 Kɛkɛ ni Paulo kɛɛ: “Anɔkwa, Yudanyo ji mi,+ ni mijɛ Tarso,+ Kilikia maŋ ko ni ehe gbɛ́i lɛ mli. No hewɔ lɛ, miikpa bo fai, ŋmɛɛ mi gbɛ ni mikɛ mɛi lɛ awie.” 40 Be ni ehã lɛ hegbɛ lɛ, Paulo damɔ atrakpoi lɛ anɔ, ni ekɛ enine fee okadi etsɔɔ mɛi lɛ. Be ni jɛmɛ jɔ diŋŋ lɛ, ekɛ mɛi lɛ wie yɛ Hebri wiemɔ mli+ ekɛɛ: