Yeremia
5 Nyɛkpaa Yerusalem gbɛjegbɛi lɛ anɔ.
Nyɛkwɛa ni nyɛkadia nɔ ni nyɛbaana lɛ.
Nyɛkwɛa ehenaabuamɔhei lɛ akɛ
Nyɛbaana nuu ni yeɔ jalɛ sane,+
Mɔ ni taoɔ akɛ eye anɔkwa lo,
Ni mikɛ Yerusalem he baake lɛ.
2 Kɛ́ amɛkɛɛ akɛ: “Gbii abɔ ni Yehowa hiɛ kã nɛɛ!” po lɛ,
Amale kitãi lɛ nɔŋŋ amɛkãmɔɔ lɛ.+
3 Ao Yehowa, ani jeee anɔkwayeli ohiŋmɛii kwɛɔ?+
Otswa amɛ nii, shi amɛtsakeee.*
Okpãtã amɛhiɛ, shi amɛmɔɔɔ tsɔsemɔ lɛ mli.+
4 Shi mikɛɛ mihe akɛ: “Mɛi nɛɛ, mɛi foji ji amɛ.
Amɛfeɔ buuluianii, ejaakɛ amɛleee Yehowa gbɛ lɛ,
Amɛ-Nyɔŋmɔ lɛ yiŋkpɛi* lɛ.
5 Maya gbɔmɛi wuji lɛ aŋɔɔ koni mikɛ amɛ ayawie,
Ejaakɛ amɛ lɛ amɛbaale Yehowa gbɛ lɛ,
Shi amɛ fɛɛ amɛkumɔ kɔɔŋtso lɛ
Ni amɛtserɛ kpãi ni fimɔ amɛ lɛ amli.”
6 No hewɔ ni koo mli jata tutuaa amɛ lɛ,
Ni ŋa mli gbee ni yɔɔ ŋa kpataa nɔ yaa nɔ ekpãtãa amɛhiɛ lɛ,
Ni kootsɛ woɔ amɛmaji lɛ ahe ka lɛ.
Atserɛɔ mɔ fɛɛ mɔ ni jeɔ kpo kɛjeɔ maji lɛ amli lɛ mli.
Ejaakɛ amɛmlatɔmɔi lɛ fa babaoo;
Amɛtuatsemɔi lɛ fa waa.+
7 Enɛ lɛ, te aaafee tɛŋŋ ni mikɛke bo hu?
Obii lɛ eje misɛɛ,
Ni amɛkɛ nɔ ni jeee Nyɔŋmɔ kãa kitã.+
Mihã amɛ nibii ni he hiaa amɛ,
Shi amɛyaa nɔ amɛfiteɔ gbãla,
Ni amɛkeɔ yuu kɛyaa ashawoi ashĩai.
8 Amɛtamɔ okpɔŋɔi ni amɛkɔnɔ ete shi ni amɛfee klalo,
Amɛteŋ mɔ fɛɛ mɔ bolɔɔ kɛnyiɛɔ nuu kroko ŋa sɛɛ.+
9 “Ani esaaa akɛ mihãa amɛbuɔ nibii nɛɛ ahe akɔntaa?” Yehowa kɛɛ.
“Ani esaaa akɛ mitɔɔ mihe* owele yɛ jeŋmaŋ ni tamɔ nɛkɛ lɛ nɔ?”+
10 “Nyɛkwɔa kɛbaa ni nyɛbafitea ewain ŋmɔji lɛ,
Shi nyɛkafitea lɛ kɛmɔa shi.+
Nyɛkpɔlɔa eniji ni etsɛ̃tsɛ̃ɛ lɛ,
Ejaakɛ jeee Yehowa nii ni.
11 Ejaakɛ Israel shĩa lɛ kɛ Yuda shĩa lɛ
Yeko mi anɔkwa kwraa,” Yehowa kɛɛ.+
Sane fɔŋ ko baŋ wɔnɔ;
Wɔnaŋ klante, ni wɔnaŋ hɔmɔ hu.’+
13 Kɔɔyɔɔ eyimɔ gbalɔi lɛ obɔbɔ,
Ni wiemɔ lɛ* bɛ amɛmli.
Nakai nɔŋŋ aba amɛnɔ!”
14 No hewɔ lɛ, nɔ ni Yehowa, Nyɔŋmɔ taiatsɛ lɛ kɛɛ nɛ:
“Akɛni hii nɛɛ miiwie nɛkɛ wiemɔi nɛɛ hewɔ lɛ,
Naa, mahã miwiemɔi lɛ atsɔ la yɛ onaa,+
Ni nɛkɛ maŋ nɛɛ baatsɔ lai,
Ni ebaashã amɛ wɛɛ.”+
15 “Nyɛ Israel shĩa, naa, mahã jeŋmaŋ ko ni jɛ shɔŋŋ aba nyɛnɔ,”+ Yehowa kɛɛ.
“Eji jeŋmaŋ ni etsɛ.
16 Amɛgãimlibii akotoku lɛ tamɔ gbonyobu ni naa kã;
Tawulɔi ji amɛ fɛɛ.
17 Amɛbaaye onikpamɔ nii lɛ kɛ oblodo* lɛ.+
Amɛbaagbe obihii kɛ obiyei lɛ.
Amɛbaaye otoi lɛ kɛ otsinai lɛ.
Amɛbaaye owain tsei lɛ kɛ ogbami tsei lɛ.
Amɛkɛ klante baakpãtã omaji ni atswa gbogboi awo amɛhe ni okɛ ohiɛ fɔ̃ɔ amɛnɔ lɛ ahiɛ.”
18 “Shi yɛ nakai gbii lɛ po amli lɛ,” Yehowa kɛɛ, “mikpãtãŋ nyɛhiɛ kɛmɔŋ shi.+ 19 Ni kɛ́ amɛbi akɛ, ‘Mɛni hewɔ Yehowa, wɔ-Nyɔŋmɔ lɛ, efee wɔ nibii nɛɛ fɛɛ?’ lɛ, kɛɛmɔ amɛ akɛ, ‘Bɔ ni nyɛje misɛɛ ni nyɛsɔmɔ jeŋmaŋ kroko nyɔŋmɔ yɛ nyɛshikpɔŋ lɛ nɔ lɛ, nakai nɔŋŋ nyɛbaayasɔmɔ gbɔi yɛ shikpɔŋ ni jeee nyɛnɔ nɔ.’”+
20 Nyɛshiɛa enɛ yɛ Yakob shĩa lɛ,
Ni nyɛjajea yɛ Yuda akɛ:
21 “Nyɛ maŋ ni feɔ buuluianii ni nyɛbɛ jwɛŋmɔ,*+ nyɛboa enɛ toi:
22 ‘Ani nyɛsheee mi gbeyei?’ Yehowa kɛɛ,
‘Ani esaaa akɛ nyɛhe kpokpoɔ yɛ mihiɛ?
Mi mikɛ shia fo husu miwo ŋshɔ lɛ he,
Naanɔ mla* koni ekatɛke lɛ.
23 Shi maŋ nɛɛ hiɛ toigbele kɛ atuatsemɔ tsui;
Amɛku amɛsɛɛ ni amɛkɔ amɛ diɛŋtsɛ amɛgbɛ.+
24 Ni amɛkɛɛɛ yɛ amɛtsui mli akɛ:
“Nyɛhãa wɔshea Yehowa, wɔ-Nyɔŋmɔ lɛ, gbeyei agbɛnɛ,
Mɔ ni hãa nugbɔ nɛɔ yɛ ebe mli,
Mra mli nugbɔ* kɛ sɛɛkpee nugbɔ* lɛ,
Mɔ ni buɔ nikpamɔ otsii ni ato lɛ ahe ehãa wɔ lɛ.”+
25 Nyɛ diɛŋtsɛ nyɛtɔmɔi lɛ ji nɔ ni hãaa nibii nɛɛ aba lɛ;
Nyɛ diɛŋtsɛ nyɛhe eshai lɛ ehã nibii kpakpai ebɔ nyɛ.+
26 Ejaakɛ mɛi fɔji yɛ mimaŋbii lɛ ateŋ.
Amɛyaa nɔ amɛkwɛɔ nii tamɔ bɔ ni loofɔlɔdulɔi feɔ kɛ́ amɛbumɔ shi lɛ.
Amɛtsɔɔ tsɔnei ni kpãtãa nii ahiɛ.
Gbɔmɛi amɛduɔ.
27 Bɔ ni loofɔlɔ tsũ mli eyi obɔ kɛ loofɔji lɛ,
Nakai amɛshĩai lɛ amli eyimɔ obɔbɔ kɛ lakamɔ.+
No hewɔ ni amɛtsɔmɔ gbɔmɛi wuji ni amɛná nii lɛ.
28 Amɛshwishwii ni amɛhe efee trotro;
Amɛfeɔ efɔŋ kɛtekeɔ nɔ.
Amɛtsuuu mɛi ni bɛ tsɛmɛi* lɛ asaji ahe nii amɛhãaa amɛ,+
Koni ehi ehã amɛ;
Ni amɛkwɛɛɛ ni aye ohiafoi sane ni ja.’”+
29 “Ani esaaa akɛ mihãa amɛbuɔ nibii nɛɛ ahe akɔntaa?” Yehowa kɛɛ.
“Ani esaaa akɛ mitɔɔ mihe* owele yɛ jeŋmaŋ ni tamɔ nɛkɛ lɛ nɔ?
30 Aafee nibii ni hãa mɔ naa kpɛɔ ehe kɛ nibii ni hãa mɔ he jɔ̃ɔ ehe yɛ shikpɔŋ lɛ nɔ:
31 Gbalɔi lɛ gbaa amale gbalɛi,+
Ni osɔfoi lɛ, amɛkɛ hegbɛ ni amɛyɔɔ lɛ yeɔ mɛi anɔ.
Ni mi diɛŋtsɛ mimaŋ lɛ sumɔɔ lɛ nakai.+
Shi kɛ́ naagbee lɛ ba lɛ, mɛni nyɛbaafee?”