Ezekiel
39 “Ni bo, gbɔmɔ bi,* gbaa oshi Gog+ ni okɛɛ lɛ akɛ, ‘Nɔ ni Nuŋtsɔ Ofe Yehowa kɛɛ nɛ: “Bo Gog, Meshek kɛ Tubal+ lumɔnukpa, mikɛ bo ená. 2 Madɔ oyi ni manyiɛ ohiɛ ni mahã okwɔ kɛjɛ kooyigbɛ hei ni yɔɔ shɔŋŋshɔŋŋ lɛ kɛba,+ ni mikɛ bo baaba Israel gɔji lɛ anɔ. 3 Matswa ogãi lɛ kɛje onine abɛku ni mahã ogãimlibii lɛ aje oninejurɔ ashwie shi. 4 Obaanyɔ yɛ Israel gɔji lɛ anɔ,+ bo kɛ osraafoi lɛ fɛɛ kɛ majimaji ni fata ohe lɛ. Mikɛ bo baahã loofɔji srɔtoi fɛɛ ni gbɔbiɔ kɛ ŋa mli kooloi lɛ akɛ niyenii.”’+
5 “‘Obaanyɔ yɛ ŋa nɔ,+ ejaakɛ mi diɛŋtsɛ miwie,’ Nuŋtsɔ Ofe Yehowa kɛɛ.
6 “‘Ni matsu la kɛba Magog kɛ mɛi ni yɔɔ ŋshɔkpɔi lɛ anɔ ni amɛyɔɔ shweshweeshwe lɛ anɔ,+ ni amɛbaaná amɛle akɛ miji Yehowa. 7 Mahã ale migbɛ́i krɔŋkrɔŋ lɛ yɛ mimaŋ Israel teŋ, ni mihãŋ abule migbɛ́i krɔŋkrɔŋ lɛ dɔŋŋ; ni jeŋmaji lɛ baaná ale akɛ miji Yehowa,+ Mɔ Krɔŋkrɔŋ ni yɔɔ Israel lɛ.’+
8 “‘Naa, enɛ miiba lɛɛlɛŋ, ni abaafee hu,’ Nuŋtsɔ Ofe Yehowa kɛɛ. ‘Enɛ ji gbi ni miwie he lɛ. 9 Mɛi ni yɔɔ Israel maji lɛ amli lɛ baaje kpo ni amɛkɛ tawuu nii lɛ—tsɛŋi bibii* lɛ kɛ tsɛŋi lɛ, gãii kɛ gãimlibii lɛ, tawuu tsokpotii lɛ kɛ akpɔlɔi lɛ—baafee lai kɛshɛre la. Ni amɛkɛbaashɛre la+ afii kpawo. 10 Amɛyalɛŋ lai kɛjɛŋ ŋa lɛ nɔ ni amɛyabuaŋ lai naa kɛjɛŋ koi lɛ amli ejaakɛ amɛkɛ tawuu nii lɛ baafee lai kɛshɛre la.’
“‘Amɛbaaloo mɛi ni baloo amɛnibii lɛ anibii, ni amɛbaashɔ̃ mɛi ni bashɔ̃ɔ amɛnibii lɛ anibii,’ Nuŋtsɔ Ofe Yehowa kɛɛ.
11 “‘Nakai gbi lɛ nɔ lɛ, mahã Gog+ fuuhe yɛ jɛmɛ yɛ Israel, yɛ mɛi ni fãa gbɛ yɛ ŋshɔ lɛ bokãgbɛ lɛ ajɔɔ lɛ mli, ni ebaatsĩ mɛi ni tsɔɔ jɛmɛ kɛhoɔ lɛ gbɛ. Jɛmɛ amɛbaafu Gog kɛ esafo babaoo lɛ yɛ, ni amɛbaatsɛ lɛ akɛ Hamon-Gog Jɔɔ.*+ 12 Israel shĩa lɛ kɛ nyɔji kpawo baafu amɛ koni shikpɔŋ lɛ nɔ atse.+ 13 Shikpɔŋ lɛ nɔ bii lɛ fɛɛ baafee ekome kɛfu amɛ, ni enɛ baahã amɛhe gbɛ́i yɛ gbi ni mawo mihiɛ nyam lɛ nɔ,’+ Nuŋtsɔ Ofe Yehowa kɛɛ.
14 “‘Abaahala hii koni amɛkpa shikpɔŋ lɛ nɔ daa ni amɛfu gbohii ni eshwɛ ni jwere shikpɔŋ lɛ nɔ lɛ koni shikpɔŋ lɛ nɔ atse. Amɛkɛ nyɔji kpawo baatao gbohii lɛ. 15 Kɛ́ mɛi ni kpaa shikpɔŋ lɛ nɔ lɛ na gbɔmɔ wu ko lɛ, amɛkɛ okadi ko baama he. Kɛkɛ lɛ, mɛi ni ahala ni amɛfu gbohii lɛ baayafu wu lɛ yɛ Hamon-Gog Jɔɔ lɛ mli.+ 16 Ni abaaná maŋ ko yɛ jɛmɛ ni abaatsɛ lɛ Hamona.* Ni amɛbaasaa shikpɔŋ lɛ nɔ koni enɔ atse.’+
17 “Shi bo, gbɔmɔ bi,* nɔ ni Nuŋtsɔ Ofe Yehowa kɛɛ nɛ: ‘Kɛɛmɔ loofɔji srɔtoi fɛɛ kɛ ŋa mli kooloi fɛɛ akɛ, “Nyɛbuaa nyɛhe naa ni nyɛbaa. Nyɛbuaa nyɛhe naa yɛ mifɔle ni misaa mitoɔ nyɛ lɛ he, afɔlei babaoo yɛ Israel gɔji lɛ anɔ.+ Nyɛbaaye loo ni nyɛbaanu lá.+ 18 Nyɛbaaye mɛi wuji aloo ni nyɛbaanu shikpɔŋ lɛ nɔ lumɛi alá—gwantɛŋhii, kɛ gwantɛŋbii, kɛ abotiai, kɛ tsinahii—Bashan kooloi ni eshwishwii lɛ fɛɛ. 19 Nyɛbaaye fɔ kɛyashi nyɛbaatɔrɔ ni nyɛbaanu lá kɛyashi afɔle ni misaa mito nyɛ lɛ baatɔrɔ nyɛ dãa.”’
20 “‘Nyɛbaatɔrɔ yɛ mikpɔlɔ lɛ he kɛ okpɔŋɔi kɛ mɛi ni taraa shwiilii amli aloo, mɛi wuji kɛ tawulɔi srɔtoi fɛɛ aloo,’+ Nuŋtsɔ Ofe Yehowa kɛɛ.
21 “‘Majie minunyam lɛ kpo yɛ jeŋmaji lɛ ateŋ, ni jeŋmaji fɛɛ baana toigbalamɔ ni mikɛba amɛnɔ lɛ kɛ hewalɛ* ni mijie lɛ kpo yɛ amɛteŋ lɛ.+ 22 Kɛjɛ nakai gbi lɛ nɔ kɛyaa lɛ, Israel shĩa lɛ baaná ale akɛ miji Yehowa, amɛ-Nyɔŋmɔ lɛ. 23 Ni jeŋmaji lɛ baaná ale akɛ aŋɔ Israel shĩa lɛ nom kɛtee yɛ amɛ diɛŋtsɛ amɛtɔmɔ lɛ hewɔ, ejaakɛ amɛje misɛɛ.+ No hewɔ lɛ, mikɛ mihiɛ tee amɛ,+ ni mikɛ amɛ wo amɛhenyɛlɔi lɛ adɛŋ+ ni amɛ fɛɛ amɛnyɔnyɔi yɛ klante lɛ naa. 24 Mikɛ amɛ ye yɛ amɛmuji nii lɛ kɛ amɛtɔmɔi lɛ anaa, ni mikɛ mihiɛ tee amɛ.’
25 “No hewɔ lɛ, nɔ ni Nuŋtsɔ Ofe Yehowa kɛɛ nɛ: ‘Mikɛ Yakob bii ni aŋɔ amɛ nom lɛ baaku sɛɛ aba,+ ni mana Israel shĩa lɛ fɛɛ mɔbɔ;+ ni mafã migbɛ́i krɔŋkrɔŋ lɛ he kɛ hiɛdɔɔ.+ 26 Kɛ́ ashwie amɛhiɛ shi yɛ misɛɛ ni amɛje lɛ hewɔ lɛ agbe naa lɛ,+ amɛbaaba amɛbahi shi yɛ shikpɔŋ lɛ nɔ ni sane fɔŋ ko ninaŋ amɛ, ni mɔ ko mɔ ko woŋ amɛhe gbeyei.+ 27 Kɛ́ mihã amɛku amɛsɛɛ kɛjɛ majimaji lɛ amli ni mibua amɛnaa kɛjɛ amɛhenyɛlɔi lɛ ashikpɔji lɛ anɔ lɛ,+ mafee mihe krɔŋkrɔŋ hu yɛ amɛteŋ yɛ jeŋmaji babaoo ahiɛ.’+
28 “‘Kɛ́ mihã aŋɔ amɛ nom kɛtee jeŋmaji lɛ ateŋ, ni mibua amɛnaa kɛba amɛshikpɔŋ lɛ nɔ ekoŋŋ ni mishiii amɛteŋ mɔ ko mɔ ko yɛ sɛɛ lɛ, amɛbaaná amɛle akɛ miji Yehowa, amɛ-Nyɔŋmɔ lɛ.+ 29 Mikɛ mihiɛ eteŋ amɛ dɔŋŋ,+ ejaakɛ mafɔse mimumɔ lɛ mashwie Israel shĩa lɛ nɔ,’+ Nuŋtsɔ Ofe Yehowa kɛɛ.”