Ezekiel
29 Yɛ afi ni ji nyɔŋma lɛ mli, yɛ nyɔɔŋ ni ji nyɔŋma lɛ mli, yɛ gbi ni ji 12 yɛ nyɔɔŋ lɛ mli lɛ nɔ lɛ, Yehowa kɛɛ mi akɛ: 2 “Gbɔmɔ bi,* tsɔ ohiɛ ohã Ejipt maŋtsɛ Farao, ni ogba oshi lɛ kɛ Ejipt fɛɛ.+ 3 Wiemɔ wiemɔi nɛɛ akɛ: ‘Nɔ ni Nuŋtsɔ Ofe Yehowa kɛɛ nɛ:
“Naa, mikɛ bo ená, bo Ejipt maŋtsɛ Farao,+
Bo ŋshɔŋ loo wulu ni kã e-Nilo* lɛ nui lɛ amli lɛ,+
Bo mɔ ni okɛɔ akɛ, ‘Mi-Nilo Faa lɛ, minɔ ni.
Mi diɛŋtsɛ mifee mihã mihe’ lɛ.+
4 Shi mikɛ kpoji baawo okadai amli ni mahã o-Nilo lɛ mli loi lɛ akpɛtɛ ohe totoi lɛ ahe.
Magbala bo kɛ Nilo lɛ mli loi ni ekpɛtɛ ohe totoi lɛ ahe lɛ kɛje kpo kɛjɛ o-Nilo lɛ mli.
5 Mashi bo mafɔ̃ shi yɛ ŋa kpataa lɛ nɔ, bo kɛ o-Nilo lɛ mli loi lɛ fɛɛ.
Obaagbee shi yɛ ŋa lɛ nɔ, ni awóŋ onɔ, ni abuaŋ onaa hu.+
Mikɛ bo baahã shikpɔŋ lɛ nɔ ŋa mli kooloi kɛ ŋwɛi loofɔji akɛ niyenii.+
6 Kɛkɛ lɛ, mɛi ni yɔɔ Ejipt lɛ fɛɛ baaná ale akɛ miji Yehowa,
Ejaakɛ amɛbaatsɔ tamɔ gãlã amɛhã Israel shĩa lɛ, ni amɛnyɛŋ amɛye amɛbua Israel shĩa lɛ dɔŋŋ.+
7 Be ni amɛmɔ onine mli lɛ, okumɔ,
Ni ohã amɛkɔɔŋ tse.
8 “‘No hewɔ lɛ, nɔ ni Nuŋtsɔ Ofe Yehowa kɛɛ nɛ: “Naa, mikɛ klante miiba onɔ,+ ni mafo gbɔmɔ kɛ kooloo fɛɛ mashɛ mafɔ̃ kɛje omli. 9 Ejipt shikpɔŋ lɛ baatsɔ amaŋfɔ kɛ shikpɔŋ ni akpãtã hiɛ;+ ni amɛbaaná amɛle akɛ miji Yehowa, ejaakɛ okɛɛ* akɛ, ‘Nilo Faa lɛ, minɔ ni; miji mɔ ni fee.’+ 10 No hewɔ lɛ, mikɛ bo ená, ni mikɛ o-Nilo lɛ hu ená, ni makpãtã Ejipt shikpɔŋ lɛ hiɛ ni ebaagbi, ni ebaatsɔ shikpɔŋ ni akɛfeee nɔ ko,+ kɛjɛ Migdol+ kɛyashi Sewene+ aahu kɛyashi Etiopia husu lɛ naa. 11 Gbɔmɔ nane tsɔŋ nɔ, ni kooloo nane hu tsɔŋ nɔ,+ ni ahiŋ nɔ afii 40 sɔŋŋ. 12 Mahã Ejipt shikpɔŋ lɛ atsɔ amaŋfɔ fe shikpɔji ni etsɔmɔ amaŋfɔi lɛ fɛɛ, ni mahã emaji lɛ hu atsɔmɔ amaŋfɔi fe maji krokomɛi fɛɛ ni etsɔmɔ amaŋfɔi, afii 40 sɔŋŋ;+ ni magbɛ Ejiptbii lɛ mashwã jeŋmaji lɛ amli ni mashwie amɛ kɛya shikpɔji lɛ anɔ.”+
13 “‘Ejaakɛ nɔ ni Nuŋtsɔ Ofe Yehowa kɛɛ nɛ: “Afii 40 sɛɛ lɛ, mabua Ejiptbii lɛ anaa kɛjɛ majimaji fɛɛ ni agbɛ amɛ ashwã mli lɛ amli kɛba;+ 14 mikɛ Ejiptbii ni aŋɔ amɛ nom lɛ baaku sɛɛ aba Patros+ shikpɔŋ lɛ nɔ, shikpɔŋ ni amɛjɛ nɔ lɛ, ni amɛbaatsɔ maŋtsɛyeli ni edaaa yɛ jɛmɛ. 15 Maba Ejipt shi fe maŋtsɛyelii krokomɛi, ni eyeŋ jeŋmaji krokomɛi anɔ dɔŋŋ,+ ni mahã amɛnɔ agbɔ aahu akɛ amɛnyɛŋ amɛye jeŋmaji krokomɛi anɔ.+ 16 Efeŋ nɔ ni Israel shĩa lɛ kɛ amɛhiɛ fɔ̃ɔ nɔ dɔŋŋ,+ shi moŋ, ebaakai amɛ tɔmɔ ni amɛtɔ̃ yɛ amɛhe ni amɛtsɔ kɛtee Ejiptbii lɛ aŋɔɔ kɛhã yelikɛbuamɔ lɛ. Ni amɛbaaná amɛle akɛ miji Nuŋtsɔ Ofe Yehowa.”’”
17 Agbɛnɛ, yɛ afi ni ji 27 lɛ mli, yɛ klɛŋklɛŋ nyɔɔŋ lɛ mli, yɛ klɛŋklɛŋ gbi lɛ nɔ yɛ nyɔɔŋ lɛ mli lɛ, Yehowa kɛɛ mi akɛ: 18 “Gbɔmɔ bi,* Babilon maŋtsɛ Nebukadnezar*+ hã etɔ esraafoi lɛ waa kɛwu amɛshi Tiro.+ Yiteŋ fɛɛ yiteŋ kpa, kɔɔŋ fɛɛ kɔɔŋ nɔ kpɔlɔ. Shi lɛ kɛ esraafoi lɛ náaa nyɔmɔwoo ko yɛ tɔ ni etɔ amɛ yɛ Tiro he lɛ mli.
19 “No hewɔ lɛ, nɔ ni Nuŋtsɔ Ofe Yehowa kɛɛ nɛ, ‘Naa, mikɛ Ejipt shikpɔŋ lɛ miihã Babilon maŋtsɛ Nebukadnezar,*+ ni ebaaloo enii babaoo lɛ kɛya, ni ebaaloo ta mli nii babaoo, ni ebaashɔ̃ nibii babaoo yɛ emli kɛya; ni no baatsɔ esraafoi lɛ anyɔmɔwoo.’
20 “‘Akɛni amɛtsu nii amɛhã mi hewɔ lɛ, mikɛ Ejipt shikpɔŋ lɛ baahã lɛ akɛ najiaŋtoo nɔ yɛ tɔ ni etɔ lɛ yɛ ehewɔ* lɛ hewɔ,’+ Nuŋtsɔ Ofe Yehowa kɛɛ.
21 “Nakai gbi lɛ nɔ lɛ, mahã akolonto ko akwɛ̃ ahã Israel shĩa lɛ,*+ ni mahã owie yɛ amɛteŋ; ni amɛbaaná amɛle akɛ miji Yehowa.”